Eaha ta te Bibilia e parau ra no nia i te tiamâraa e maiti? Ua faataa aˈena anei te Atua i to oe oraraa?
Te pahonoraa a te Bibilia
Ua horoa te Atua ia tatou i te tiamâraa e maiti, oia hoi te mana no te rave i ta tatou iho mau faaotiraa. Aita te mau tupuraa o to tatou oraraa i faataa-aˈena-hia. Teie ta te Bibilia e haapii mai ra.
Ua hamani te Atua i te taata ia au i to ˈna hohoˈa. (Genese 1:26) Aita to te animara e feruriraa. Area te taata, e au ratou i te Atua poiete no te mea e nehenehe ratou e faaite i te mau huru maitatai mai te here e te parau-tia. E mai te Atua poiete, e tiamâraa e maiti to te taata.
I roto e rave rau tuhaa, e nehenehe tatou e faaoti eaha te tupu no tatou a muri aˈe. Te faaitoito ra te Bibilia ia “maiti . . . i te ora . . . ma te faaroo i to [te Atua] reo,” oia hoi ma te faaoti i te pee i ta ˈna mau faaueraa. (Deuteronomi 30:19, 20) Mai te peu e aita tatou i poietehia e te tiamâraa e maiti, mea tano ore ïa tera faaitoitoraa, e ere anei? Aita te Atua e faahepo ra ia tatou ia rave i to ˈna hinaaro. Ma te mǎrû râ, te faaitoito ra o ˈna ia tatou a na ô ai: “Ahani iho â oe i haapao i ta ˈu mau faaueraa! E riro ïa to oe hau mai te hoê anavai e ta oe parau-tia mai te are o te miti.”—Isaia 48:18.
Aita ta tatou mau manuïaraa aore ra ta tatou mau hape i faataa-aˈena-hia. Ia hinaaro tatou e manuïa i roto i te tahi ohipa, e mea tia ia haa rahi. Te parau ra te Bibilia: “Pauroa te ohipa ta to oe rima e nehenehe e rave, a rave ma to puai atoa.” (Koheleta 9:10) Te parau atoa ra te Bibilia: “E manuïa iho â te mau opuaraa a te taata itoito.”—Maseli 21:5.
E ô faufaa roa te tiamâraa e maiti no ǒ mai i te Atua. Maoti te reira, e nehenehe tatou e here ia ˈna ma to tatou “aau atoa,” no te mea te hinaaro mau ra tatou e na reira.—Mataio 22:37.
Aita anei e mana to te Atua no te aratai i te mau mea atoa?
Te haapii mai ra te Bibilia e mea Manahope te Atua, aita e taotiaraa to to ˈna puai inaha na ˈna noa iho â e aratai i te reira. (Ioba 37:23; Isaia 40:26) Tera râ, aita o ˈna e faaohipa i to ˈna puai no te aratai i te mau mea atoa. Ei hiˈoraa, te parau ra te Bibilia e ‘ua haavî o ˈna ia ˈna iho’ a ohipa ˈi i nia ia Babulonia i tahito ra, te enemi o to ˈna nunaa. (Isaia 42:14) I teie mahana, te haavî ra o ˈna ia ˈna iho i nia i te feia o te ore e faaohipa maitai ra i to ratou tiamâraa e maiti a hamani ino atu ai ia vetahi ê. Aita râ te Atua e vaiiho i te reira ia tupu e a muri noa ˈtu.—Salamo 37:10, 11.