E nehenehe anei te hoê Kerisetiano e farii i te mau ravea rapaauraa e vai nei?
Te pahonoraa a te Bibilia
E. Ua parau Iesu: “E ere te taote no te feia oraora maitai, no te feia maˈi râ.” (Mataio 9:12) Te auraa ïa e e nehenehe ta ˈna mau pǐpǐ e imi i te mau ravea rapaauraa e vai nei. Papu, e ere te Bibilia i te hoê buka no te ea. Te horoa mai nei râ i te mau faaueraa no te aratai i te taata o te hinaaro ra e faaoaoa i te Atua.
Te mau uiraa mea faufaa ia pahono atu
1. Ua taa iho â anei ia ˈu te ravea rapaauraa horohia mai? Te faaitoito ra te Bibilia ia rave tatou i te mau maimiraa papu, eiaha râ ia “tiaturi . . . i te mau parau atoa.”—Maseli 14:15.
2. E imi anei au i te manaˈo o te tahi atu taote? Mea faufaa ia “rahi anaˈe te taata aˈo” no te rave i te faaotiraa maitai, i te taime iho â râ ua roohia oe i te maˈi rahi.—Maseli 15:22.
3. Te tu ra anei tera ravea rapaauraa i te faaueraa Bibilia “ia haapae . . . i te toto”?—Ohipa 15:20.
4. E faaohipahia anei te peu tahutahu i roto i tera ravea rapaauraa? Te patoi nei te Bibilia i “te peu tahutahu.” (Galatia 5:19-21) No te ite te faaohipahia ra anei te peu tahutahu, a hiˈopoa i to muri nei mau uiraa:
Te faaohipa ra anei te taata rapaau i te peu tahutahu?
Ua niuhia anei te ravea rapaauraa i nia i te tiaturiraa e ua maˈihia oe no te mau atua inoino aore ra te mau enemi tei faaohipa i te peu tahuˈa?
Ua hamanihia anei te raau e e inuhia anei te reira, ma te faaohipa i te mau tusia, parau tahutahu aore ra peu e taoˈa tahutahu?
5. Te tapitapi noa ra anei au no nia i to ˈu ea? Te faaitoito ra te Bibilia: “Ia itehia to outou huru au noa e te taata atoa.” (Philipi 4:5) E tauturu te manaˈo aifaito ia oe ia tiatonu i nia i “te mea faufaa roa ˈˈe,” oia hoi te taime faaohipahia no te tavini i te Atua.—Philipi 1:10; Mataio 5:3.