Eaha ta te Atua e hinaaro ra no ˈu?

Te pahonoraa a te Bibilia

Te hinaaro ra te Atua ia ite atu â oe o vai o ˈna, ia riro oe ei hoa no ˈna, ia here e ia tavini ia ˈna ma to oe aau atoa. (Mataio 22:37, 38; Iakobo 4:8) E nehenehe oe e haapii e nafea ia rave i te hinaaro o te Atua maoti to Iesu oraraa e ta ˈna mau haapiiraa. (Ioane 7:16, 17) Aita Iesu i faahiti noa no nia i to te Atua hinaaro, ua rave roa râ o ˈna i te reira. Ua parau Iesu eaha te fa o to ˈna oraraa, oia hoi ia “rave, eiaha i to ˈu hinaaro, i te hinaaro râ o tei tono mai ia ˈu.”—Ioane 6:38.

E titauhia anei te hoê tapao taa ê, orama aore ra piiraa no ǒ mai i te Atua no te ite eaha ta te Atua e hinaaro ra no ˈu?

Eita no te mea te faaite ra te Bibilia i ta te Atua poroi no te huitaata. I roto i te Bibilia, te vai ra te aratairaa “ia ineine roa [oe] no te mau ohipa maitatai atoa.” (Timoteo 2, 3:16, 17) Te hinaaro ra te Atua ia faaohipa oe i te Bibilia e to oe “feruriraa atoa” no te haapii eaha ta te Atua e hinaaro ra no oe.—Roma 12:1, 2; Ephesia 5:17.

E haere iho â anei ia ˈu ia rave i to te Atua hinaaro?

Papu, e haere ia oe no te mea te parau ra te Bibilia: “E ere ta [te Atua] mau faaueraa i te mea teimaha.” (Ioane 1, 5:3) E ere râ te auraa mea ohie noa ia pee i ta te Atua mau faaueraa. Tera râ, mea rahi aˈe te mau maitai fanaˈohia i te mau tutavaraa ravehia. Ua parau hoi Iesu: “Mea oaoa aˈe te feia e faaroo e e haapao i te parau a te Atua!”—Luka 11:28.