A aro i te oraraa moˈemoˈe ma te faahoa ia vetahi: E nafea te Bibilia e nehenehe ai e tauturu?

Ua riro te aroraa i te oraraa moˈemoˈe ei tuhaa faufaa no te feia îite i te pae ea i 2023. E nehenehe anei e upootia mai i nia i te reira?

• “E haafifi mau â te oraraa moˈemoˈe i to tatou ea e to tatou oaoa,” ta te taote Vivek Murthy no Marite i parau. Tera râ, ua parau faahou oia: “Te vai ra te hoê ravea.” E nafea? “Ma te rave riirii i te tahi mea i te mau mahana atoa no te haapuai i to tatou auhoaraa e o vetahi.”a

Te oraraa moˈemoˈe e ere noa i te faaearaa o tatou anaˈe. Te moˈemoˈe atoa ra vetahi, noa ˈtu ua haaatihia ratou i te taata. Noa ˈtu eaha te tumu o to tatou oraraa moˈemoˈe, e nehenehe te Bibilia e tauturu mai. Te itehia ra te mau aˈoraa papu o te tauturu ia tatou ia aro i te oraraa moˈemoˈe ma te haapuai i to tatou auhoaraa.

E nehenehe te mau faaueraa Bibilia e tauturu ia tatou

Ei taata o te tauaparau maitai. Te auraa, eiaha noa e faaite i to tatou iho huru aau, oia atoa râ, e horoa i te tariˈa faaroo. Rahi atu â outou i te faaite i te anaanatae ia vetahi, rahi atu â to outou auhoaraa i te puai.

• Faaueraa Bibilia: “A imi atoa ˈi i to vetahi ê maitai, eiaha noa râ i to outou iho.”—Philipi 2:4.

A faahoa i te mau huru taata. A faahoa i te feia paari aˈe aore ra apî aˈe ia outou, e mea taa ê to ratou taere e nunaa.

• Faaueraa Bibilia: “Ia haamahora . . . i to outou aau.”—Korinetia 2, 6:13.

No te ite hau atu â e nafea ia faaite i te auhoaraa puai e o vetahi, a taio i te tumu parau “Comment combler notre besoin d’amitié.”