Na vai e faaora i te feia o te ore e haere i te tamaˈi? Eaha ta te Bibilia e parau ra?

Ia au i te hoê faatiaraa a te Hau amui:

Mai te 7 tae atu te 23 no Atopa 2023, no te tamaˈi i tupu i Gaza, ua taiohia hau atu 6 400 taata tei pohe e 15 200 taata tei pepe e te rahiraa o ratou o te feia o te ore e haere i te tamaˈi. Hau atu â, ua horo ê hanere tausani taata.
I te 24 no Tetepa 2023, no te tamaˈi i tupu i rotopu ia Rusia e Ukraine, ua taiohia 9 701 taata tei pohe e 17 748 taata tei pepe i Ukraine.

Eaha te tiaturiraa ta te Bibilia e horoa ra no te feia e mauiui ra no te tamaˈi?

Te hoê tiaturiraa papu

Ua fafau te Bibilia e e ‘faaore te Atua i te mau tamaˈi ati aˈe i te fenua.’ (Salamo 46:9) E faaohipa oia i te hoê faatereraa i te raˈi o te mono i te mau faatereraa taata atoa. (Daniela 2:44) E horoa te Faatereraa arii a te Atua i te hoê tiaturiraa no te huitaata.

A tapao eaha ta Iesu Mesia, te Arii o te Faatereraa arii a te Atua, e rave:

“E faaora hoi oia i te taata veve o te hinaaro ra i te tauturu, oia atoa i te taata haihai e te taata aita e tauturu. E aroha oia i te taata haihai e te veve, e e faaora oia i te feia veve. E faaora oia ia ratou i te haavîraa e te hamani-ino-raa, e e riro to ratou toto ei mea faufaa roa no ˈna.”—Salamo 72:12-14.

Maoti te Faatereraa arii, e faaore roa te Atua i te veve e te mauiui faatupuhia na te tamaˈi e te haavîraa uˈana.

“E tamǎrô oia i te mau roimata atoa o to ratou mata. E ore roa te pohe, e ore atoa te oto e te auê e te mauiui. Ua mou hoi te mau mea tahito.”—Apokalupo 21:4.

Fatata roa te Faatereraa arii a te Atua e ohipa no te rave i te mau tauiraa i nia i te fenua. Ua fafau te Bibilia e e tupu “te tamaˈi e te parau o te tamaˈi” i teie mahana. (Mataio 24:6) Te faaite ra te reira e te tahi atu mau tupuraa e te ora ra tatou “i te mau mahana hopea” o te faatereraa taata.—Timoteo 2, 3:1.