E nehenehe anei te hoê Kerisetiano e turu i te mau ohipa poritita?

Ati aˈe te ao nei, e rave rahi taata te parau nei e te pee ra ratou ia Iesu Mesia. E mau taata atoa râ tei ô roa i roto i te mau ohipa poritita. Te tamata ra vetahi i te paturu i to ratou mau tiaturiraa e ta ratou mau ture aveia ma te turu i te tahi tia aore ra pǔpǔ poritita. Hau atu, pinepine te mau tia poritita i te faaohipa i te mau ohipa ino o te fenua e te mau fifi i te pae totiare no te fanaˈo i te turu o te mau taata faaroo. Pinepine atoa te mau tia faaroo i te horo no te hoê tiaraa poritita. I roto i te tahi mau fenua, e faaohipahia te taˈo “Kerisetiano” no te faaite e tera te haapaoraa tumu o tera fenua.

Eaha to oe manaˈo? E nehenehe anei te mau pǐpǐ a Iesu Mesia e turu i te mau ohipa poritita? E itehia te pahonoraa a hiˈopoa ˈi i te hiˈoraa o Iesu. Ua parau o ˈna: “Ua horoa ˈtu hoi au i te hiˈoraa, mai ta ˈu i rave ia outou, ia na reira atoa ïa outou e tia ˈi.” (Ioane 13:15) I te pae o te poritita, eaha te hiˈoraa ta Iesu i horoa mai?

Ua ô anei Iesu i roto i te mau ohipa poritita?

Aita roa ˈtu Iesu i turu i te mau ohipa poritita o teie ao.

Aita Iesu i imi i te tiaraa poritita. Aita o ˈna i farii i te tiaraa i roto i te mau faatereraa taata i te taime i pûpû ai Satani te Diabolo ia ˈna “i te mau faatereraa arii atoa o te ao nei.” (Mataio 4:8-10)a I te tahi atu taime, ua ite te taata i te mau huru maitatai o Iesu e ua turai ratou ia ˈna ia riro ei tia faatere. Te parau ra te Bibilia: “Reva faahou atura Iesu i nia i te mouˈa o ˈna anaˈe, ua ite hoi oia e e haere mai ratou e haru ia ˈna no te faaarii ia ˈna.” (Ioane 6:15) Aita Iesu i rave mai ta te taata i hinaaro. Ua patoi etaeta o ˈna i te ô i roto i te tahi noa ˈˈe ohipa poritita.

Aita Iesu i horoa i to ˈna manaˈo no nia i te tahi fifi poritita. Ei hiˈoraa, i te tau o Iesu, ua riri to te ati Iuda i te mau tute faahepohia na te hau Roma. No ratou, mea parau-tia ore te reira. Ua tamata ratou i te ite i to Iesu manaˈo no nia i tera fifi. Aita râ Iesu i horoa ˈtu i to ˈna manaˈo no te faaite e mea tano anei ia aufau i tera mau tute. Ua parau o ˈna: “A faahoˈi i ta Kaisara ia Kaisara ra, ta te Atua râ i te Atua ïa.” (Mareko 12:13-17) Ua tapea o ˈna i to ˈna tiaraa amui ore i mua i te mau fifi poritita. Tera râ, ua faaite o ˈna e mea tia ia aufau i te tute a Kaisara, oia hoi te mana faatere Roma. Hau atu, ua faaite o ˈna e taotiaraa to tera mana, aita te taata e pee pauroa ta te mau tia faatere e faahepo. Eiaha te taata e horoa i te faatereraa taata te mea titauhia e te Atua, mai ta ˈna haamoriraa.—Mataio 4:10; 22:37, 38.

Ua turu e ua haapii Iesu ia vetahi ê no nia i te hoê faatereraa i te raˈi, oia hoi te Faatereraa arii a te Atua. (Luka 4:43) Aita o ˈna i ô i roto i te mau ohipa poritita no te mea ua ite o ˈna o te Faatereraa arii a te Atua anaˈe te faatupu i te opuaraa a te Atua i nia i te fenua, eiaha râ te mau faatereraa taata. (Mataio 6:10) Ua taa ia ˈna eita te Faatereraa arii a te Atua e ohipa na roto i te mau faatereraa taata. E mono râ te Faatereraa arii a te Atua i te mau faatereraa taata.—Daniela 2:44.

Ua turu anei te mau Kerisetiano matamua i te mau ohipa poritita?

Aita. Ua parau Iesu no ta ˈna mau pǐpǐ e “e ere [ratou] no teie nei ao.” (Ioane 15:19) Ua pee ratou i to Iesu hiˈoraa ma te ore e ô i roto i te mau ohipa poritita. (Ioane 17:16; 18:36) Hau atu, ua rave ratou i ta Iesu i faaue atu, oia hoi ia poro e ia haapii ia vetahi ê no nia i te Faatereraa arii a te Atua.—Mataio 28:18-20; Ohipa 10:42.

Te mea faufaa roa ˈˈe no te mau Kerisetiano matamua, o te peeraa ïa i te mau faaueraa a te Atua. Tera râ, ua taa ia ratou e mea titauhia ia faatura ratou i te mau tia faatere. (Ohipa 5:29; Petero 1, 2:13, 17) Ua pee ratou i te mau ture e ua aufau ratou i te mau tute. (Roma 13:1, 7) Noa ˈtu aita ratou i ô i roto i te mau ohipa poritita, ua fanaˈo ratou i te mau parururaa i te pae o te ture e te mau tauturu ta te hau fenua i haamau no te huiraatira.—Ohipa 25:10, 11; Philipi 1:7.

Te tiaraa amui ore o te mau Kerisetiano i teie mahana

Ma te papu, te faaite ra te Bibilia e aita Iesu e ta ˈna mau pǐpǐ i turu i te mau ohipa poritita. No reira, ei Kerisetiano, e tapea te mau Ite no Iehova na te ao nei i to ratou tiaraa amui ore. Mai te mau Kerisetiano matamua, te rave ra ratou i ta Iesu i faaue atu. Te poro ra ratou i “te parau apî oaoa o te Faatereraa arii.”—Mataio 24:14.