Uiraa a te feia taio

Ia taoto te tahi Kerisetiano e te hoê e ere i to ˈna hoa faaipoipo i roto i te hoê â fare no te tahi tumu papu ore, e haapapuraa anei ua hara raua e e tia ia haamau i te hoê tomite haavaraa?

Mai te peu aita e tumu papu i taoto ai raua raua anaˈe i roto i te hoê â fare, e haapapuraa iho â tera ua rave raua i te peu taotoraa tia ore. E tia ïa ia haamau i te hoê tomite haavaraa.—Kor. 1, 6:18.

E hiˈopoa maite te tino matahiapo i te tupuraa no te ite e titauhia anei ia haamau i te hoê tomite haavaraa. Te haamatau ra anei na taata e piti? Ua horoa aˈena anei te mau matahiapo i te aˈoraa ia raua no nia i to raua haerea i nia i te tahi e te tahi? Eaha te tumu raua i taoto ai i roto i te hoê â fare? Mea opuahia anei na raua? I roto i taua tupuraa ra, aita ˈtu anei e ravea? Ua tupu anei te tahi ohipa manaˈo-ore-hia aore ra ru e titauhia ˈtura ia taoto raua i roto i te hoê â fare? (Koh. 9:12) Ihea raua i te taotoraa? Mea taa ê te mau tupuraa atoa, e hiˈopoa paha ïa te mau matahiapo i te tahi atu mau tuhaa.

Ua noaa mai anaˈe te mau haamaramaramaraa atoa i te tino matahiapo, e faaoti ïa ratou e haamau anei i te hoê tomite haavaraa aore ra eita.