Ia hinaaro noa oe e ite atu â no nia ia Iehova!

1. Mai te aha to tatou huru ia feruri tatou no nia i te ite e te paari o Iehova, aore ra te rahiraa ohipa ta ˈna i faatupu?

UA FERURI aˈena anei oe i te hohonuraa o te ite e te paari o Iehova, aore ra te rahiraa ohipa ta ˈna i faatupu? Oti roa paha oe i te faahiahia, e ere anei? Oia nei, ia feruri tatou i te reira, e puta mai te manaˈo e mea haihai roa tatou i mua i to tatou Atua poiete. Ua tano iho â ta te aposetolo Paulo i papai: “Auê te rahi hau ê o ta te Atua mau haamaitairaa e te hohonu mau hoi o to ˈna ite e to ˈna paari! Eita e noaa ia tatou ia taa i ta ˈna mau haavaraa e to ˈna mau haerea!”—Roma 11:33, 34.

2. Eaha te haapapuraa e nehenehe tatou e ite mau â o vai Iehova?

² Noa ˈtu eita e noaa ia tatou ia ite pauroa no nia ia Iehova, e nehenehe râ tatou e ite mau â o vai o ˈna. Na te aha e haapapu i te reira? Ua parau te arii Davida i ta ˈna tamaiti o Solomona: “Ia ite oe o vai te Atua o to metua tane e ia tavini oe ia ˈna ma te aau taatoa . . . Ia imi oe ia ˈna, e vaiiho oia ia itehia mai oia e oe.” (Par. 1, 28:9) Tau hanere matahiti i muri aˈe, ua haamanaˈo te aposetolo Ioane i to ˈna mau taeae e tuahine e ua horoahia ia ratou ‘te maramarama ia ite ratou o vai te Atua mau.’ (Ioa. 1, 5:20) Ua parau atoa Iesu e e tauturu o ˈna i te taata atoa ta ˈna “e hinaaro e faaite atu o vai te Metua.”—Mat. 11:27.

3. Eaha ta tatou e hiˈopoa mai i roto i teie tumu parau?

³ Ei tavini na Iehova, mea rahi ta tatou i ite no nia ia ˈna. Eita râ tatou e faaea i te haapii no nia ia Iehova. (Ioa. 17:3) Inaha mea rahi â te haapiiraa ta tatou e nehenehe e apo mai, no nia anei i te mea e faaoaoa ra ia ˈna e e nafea ia haapuai i to tatou tiaturiraa ia ˈna. E faufaahia tatou pauroa i teie tumu parau, mea maoro anei tatou i roto i te parau mau aore ra eita. No reira, e hiˈopoa mai tatou i na toru uiraa: Eaha te auraa ia ite o vai Iehova? No te aha mea faufaa ia hinaaro noa tatou e haamatau atu â ia ˈna? E e nafea tatou ia haapii atu â no nia ia Iehova?

EAHA TE AURAA IA ITE O VAI IEHOVA?

4. Eaha te auraa ia ite o vai Iehova?

⁴ E taa ia tatou eaha te auraa ia ite o vai Iehova ia feruri tatou i ta ˈna i fafau i te ati Iuda tei hoˈi mai na Babulonia mai. Ua parau o ˈna: “E horoa vau no ratou i te hoê aau e hinaaro e ite mai ia ˈu, e ite o vau o Iehova.” (Ier. 24:7) Ua ite aˈena te ati Iuda o vai Iehova. Tera râ, ia piri atu â ratou ia ˈna e titauhia ia ratou “te hoê aau e hinaaro e ite mai [ia ˈna].” E ô atoa ïa to ratou mau huru aau e manaˈo turai. Te na ô ra te hoê buka maimiraa: “Mea taa ê roa te iteraa te tahi mau ohipa no nia i te Atua e te iteraa o vai mau na te Atua. Ei hiˈoraa, mea taa ê roa te taioraa i te tahi buka no nia i te here e te hereraa i te hoê apiti.” No reira, eita e navai ia ite noa i te iˈoa o te Atua. E hinaaro râ tatou e ite o vai mau â Iehova, e mai te aha to ˈna huru.

5. Ia taa ia tatou eaha te auraa ia ite o vai Iehova, eaha ta tatou e haapii mai i te arii Iosia?

⁵ Ia haapii tatou no nia ia Iehova, e taa ia tatou eaha ta ˈna e au e te mau ohipa ta ˈna e au ore. A hiˈo na i te arii Iosia. Te parau ra te Bibilia: “I te vaˈu o te matahiti te faatereraa oia, mea apî noa â oia, haamata ihora oia i te imi i te Atua o Davida to ˈna tupuna.” (Par. 2, 34:3) Aita Iosia i faaî noa to ˈna roro i te ite no nia ia Iehova, ua faaohipa atoa râ o ˈna i ta ˈna i haapii mai. Na roto i te peropheta Ieremia, ua parau Iehova no nia ia Iosia e “ua turu . . . oia i te mea afaro e te parau-tia.” Ua paturu o ˈna i te feia riirii e te veve. Ua na ô atoa Iehova: “Eita anei te feia tei matau ia ˈu e na reira?”—Ier. 22:15, 16.

6. Ia au i te Salamo 9:10, eaha te tupu ia matau atu â tatou ia Iehova?

⁶ A taio i te Salamo 9:10. Rahi atu tatou i te matau ia Iehova, rahi atu â tatou i te tiaturi ia ˈna. Tera ïa tei tupu no te aposetolo Paulo. I te pae hopea o to ˈna tapearaahia e hou o ˈna a haapohehia ˈi, ua na parau oia: “Aita . . . vau e haama ra. Ua ite hoi au o vai te Atua ta ˈu e tiaturi ra.” (Tim. 2, 1:12) Ua tauturu te mau mea ta Paulo i haapii mai e ta ˈna i faaruru i roto i to ˈna oraraa ia tiaturi papu ia Iehova. Te na ô ra te tahi nota haapiiraa no nia i teie irava: “Ua papu ia Paulo e eita o ˈna e moˈehia ia Iehova e to ˈna itoito rahi i roto i te taviniraa. Ua tiaturi oia faatia faahou mai Iehova ia ˈna.”

NO TE AHA MEA FAUFAA IA HINAARO NOA TATOU E HAAMATAU ATU Â IA ˈNA?

7. I muri aˈe e rave rahi matahiti i roto i te parau mau, eaha te nehenehe e tupu?

⁷ Ia tatou i haapii i te parau mau, ua anaanatae roa tatou i te ite hau atu â no nia Iehova. I muri mai râ, ua mohimohi roa paha teie anaanatae. No te aha? Ia taio tatou i te Bibilia i te fare anei aore ra i te putuputuraa, e haapao noa paha tatou i te mau haapiiraa mea faufaa no to tatou oraraa. Aore ra te tahi mau manaˈo no te tauturu ia vetahi ê. Mea au roa, tera iho â ta te Bibilia e faaitoito mai ia rave. (Tim. 2, 3:16, 17) Tera râ, mea rahi atoa ta te Bibilia e faaite mai no nia i te Atua. (Sal. 25:8-10) Eiaha ïa tatou e faaea noa i nia i te mau haamaitairaa ta tatou e fanaˈo aore ra e nafea ia faaohipa i te hoê irava no te tauturu ia vetahi ê. Mea faufaa atoa ia feruri: “Eaha ta teie irava e haapii mai ra no nia ia Iehova?”a

8. Ia matau maitai tatou ia Iehova, mai te aha to tatou auhoaraa e o ˈna? (Salamo 73:24-28)

⁸ Ia matau maitai tatou ia Iehova, e puai atu â to tatou taamuraa ia ˈna. Ei hiˈoraa, mai te aha to oe huru i muri aˈe i ta oe taioraa i te Bibilia, i te mataitairaa i te JW Haapurororaa teata, aore ra ia hope te hoê tairururaa? Eita anei oe e piri atu â ia Iehova? Papu maitai ïa. No te aha hoi? No te mea ua apo mai oe te tahi mea apî no nia ia ˈna. Hinaaro roa ˈtura oe e arue e e haamauruuru ia ˈna. E au tatou ia Asapha. Ua feruri o ˈna i to Iehova here rahi ia ˈna e ua parau o ˈna: “O te Atua . . . te mato o to ˈu aau e ta ˈu tuhaa e a muri noa ˈtu.” (A taio i te Salamo 73:24-28.) Ia tutava tatou i te matau maitai ia Iehova, e poihere atu â tatou i to tatou auhoaraa e o ˈna.

9. Ia haapao tatou i te manaˈo o Iehova, eaha ïa ta tatou e rave? A faataa na.

⁹ Ia ‘haapao tatou i te manaˈo’ o Iehova, oia hoi ia feruri tatou i ta tatou i ite no nia ia ˈna e i to ˈna manaˈo i ta tatou e rave nei, e rave ïa tatou i te mau faaotiraa maitai. (Mas. 3:5, 6) Ei hiˈoraa, e rave rahi taeae e tuahine e tuu ra i te hohoˈa o to ratou hoa faaipoipo i nia i te iri papairaa, i roto i ta ratou pute moni aore ra i nia i te paruai o ta ratou vini. E tauturu te reira ia ratou ia manaˈo noa i to ratou hoa faaipoipo, ia rave i te faaotiraa maitai e ia ore e rave i te tahi noa ˈˈe ohipa o te haamauiui ia ˈna. Hoê â huru no Iehova. Ia manaˈo noa tatou ia ˈna, e hinaaro iho â tatou e faaoaoa noa ia ˈna.—Sal. 19:13, 14.

10. Eaha te tupu, ia haapii atu â tatou no nia i to Iehova mau huru maitatai?

¹⁰ Inaha ua poietehia tatou ia au i to Iehova huru, e nehenehe ïa tatou e faatupu i to ˈna mau huru maitatai. (Gen. 1:26) Rahi atu â tatou i te haapii no nia i to ˈna mau huru maitatai, ohie noa ïa no tatou ia pee i to ˈna hiˈoraa. I to ˈna ra tau, ua faahapa Iesu i te mau papai parau e te mau Pharisea no te mea aita ratou i pee i te huru o to ˈna Metua. Ua haafaufaa ratou i te mau tuhaa rii o te Ture, area “te mau mea faufaa aˈe o te Ture, oia hoi te parau-tia, te aroha hamani maitai e te taiva ore” ua haapae ia ratou. (Mat. 23:23) Eiaha ïa tatou e riro mai ia ratou. E hiˈopoa tatou i ta Iehova mau faaueraa e te mau aratairaa Bibilia, a feruri atu ai i ta te reira e faaite mai no nia i to ˈna huru. Ma te na reira, e noaa ia tatou ia pee i to ˈna hiˈoraa.—Ioa. 1, 4:8, 11.

E NAFEA TATOU IA HAAPII ATU Â NO NIA IA IEHOVA?

11. Mea nafea oe i te iteraa o vai Iehova?

¹¹ Mea nafea oe i te iteraa o vai Iehova? Peneiaˈe ua paari oe i roto i te parau mau, na to metua ïa i haapii ia oe. Ua faaite mai paha raua eaha ta te Bibilia e parau ra no nia ia Iehova. Ua haapii mai raua e nafea oe ia ite i to ˈna mau huru maitatai na roto i ta ˈna i poiete. Aore ra peneiaˈe ua haapii oe i te Bibilia na muri i te hoê Ite no Iehova maoti te buka Ia ora oe e a muri noa ˈtu! Ua haapii ïa oe i te tahi mau aamu Bibilia e ua taa ia oe i to Iehova mau huru maitatai maoti te poieteraa.b (Neh. 8:8; Ohi. 14:17) E hiˈo anaˈe e nafea tatou e haapii atu â no nia ia Iehova.

12-13. Eaha ta tatou e haapii mai, ia taio tatou i te Bibilia? A horoa i te hoê hiˈoraa. (Ieremia 39:15-18) (A hiˈo atoa i te hohoˈa .)

¹² A tahi, e taio e e haapii tatou i te Bibilia. I te tahi taime, e faaite roa mai te Bibilia i to Iehova mau huru maitatai. (Exo. 34:6, 7) Tera râ, te rahiraa o te taime, e faahiti-noa-hia eaha ta te taata i tahito ra i faaruru e te faaotiraa ta ratou i rave. Ia taio oe i to ratou aamu, a feruri eaha ta te reira e haapii mai ra no nia ia Iehova.

¹³ Teie te hoê hiˈoraa. I roto i te Ieremia 38:6-13, e taio oe na Ebeda-meleka te taata Etiopia, ia faaora i te peropheta Ieremia. Oioi oe i te feruri e nafea ia pee i to ˈna here, i to ˈna itoito inaha ua ineine o ˈna i te horoa i to ˈna ora no to mau hoa. Ua ite râ anei oe eaha ta teie aamu e haapii mai ra no nia ia Iehova? (A taio i te Ieremia 39:15-18.) Eaha te irava e faaite ra i to Iehova mauruuru, mea au na ˈna i te parau-tia? Te ite ra anei oe e eita o ˈna e maitiiti i te taata? Eaha ˈtu â ta oe i tapao mai i roto i teie aamu? Ia taio oe i te Bibilia, a feruri i to Iehova huru. A haamauruuru ia ˈna e a arue ia ˈna no to ˈna huru nehenehe mau.

14. No te aha mea faufaa ia feruri maite a mataitai ai i ta Iehova i poiete?

¹⁴ A piti, e feruri tatou i ta Iehova i poiete. (Sal. 145:9, 10) Papu, eita e navai ia mataitai noa i te natura. Te vai ra vetahi, ehia maororaa ratou i te hiˈopoaraa i te natura, aita râ i haapii no nia i to Iehova huru. Aita atoa ratou i ite te vai ra hoê Atua poiete. Ua papai Paulo: “E ite-maitai-hia hoi to ˈna mau huru maitatai eita e ite-mata-hia, no te mea e taa-maitai-hia te reira na roto i te mau mea i hamanihia.” (Roma 1:20) Te na ô ra te tahi atu huriraa Bibilia: “E nehenehe te hoê taata haroˈaroˈa e ite papu i to te Atua mau huru maitatai.” Te auraa, no te ite i te mau huru maitatai o Iehova e tia ia tatou ia haamanaˈo e ia feruri i ta tatou e mataitai ra i roto i te natura.

15. Eaha ta Patrick i rave, e e nafea oe ia pee i to ˈna hiˈoraa? (A hiˈo atoa i te hohoˈa.)

¹⁵ E rave rahi o tatou e ora ra i te vahi mea rahi aˈe te paturaa i te natura. O oe aˈe tera, e nafea ia oe ia haapii no nia Iehova maoti te poieteraa? Teie te hiˈoraa o Patrick. Te ora ra oia i Brazzaville, te hoê oire i Congo. Te parau ra oia: “E imi au i te ravea no te hiˈopoa i te poieteraa mai nia mai i ta ˈu taupee. Pinepine au i te ite i te mau manumanu e te manu iti e imi ra i te maa aore ra hoê vahi na ratou. I te hoê mahana, ua ite au i te mau manu e hamani ra i ta ratou ofaaraa. Ua faaohipa ratou i tei noaa mai ia ratou no te hamani e ia naho maitai ta ratou ofaaraa no ta ratou mau fanauˈa.” Feruri atura Patrick ia Iehova. Ua parau oia: “Ua taa ia ˈu mea haapao roa Iehova i ta ˈna i poiete, tae noa ˈtu te mea haihai roa i roto i te natura. Papu roa ïa e haapao e aupuru atoa mai oia ia ˈu.”

16. Eaha tei tauturu ia Maria ia ite maitai o vai Iehova e e nafea ia pee i to ˈna hiˈoraa? (A hiˈo atoa i te hohoˈa.)

¹⁶ A toru, e feruri anaˈe i ta tatou i faaruru na. Tera ta Maria te metua vahine o Iesu i rave. Ua ite maitai o ˈna o vai Iehova, e ‘ua farii-maitai-hia hoi oia e te [Atua].’ (Luka 1:30) A feruri na râ i te hopoia rahi ta ˈna i fanaˈo, e riro ei metua vahine no te Tamaiti a te Atua. Ua faaitoito Iehova ia ˈna na roto i te melahi ra o Gaberiela e hoê fetii to ˈna o Elisabeta. I muri iho, ua feruri oia i ta raua i faaite ia ˈna e i to Iehova puai hope, to ˈna aroha hamani maitai, to ˈna here rahi i te taata tae noa ˈtu te feia haehaa. (Luka 1:46-55) Ua oaoa roa Maria i to Iehova tururaa ia ˈna. Hoê â huru no tatou. E haamauruuru anaˈe ia Iehova inaha tei pihai iho mai o ˈna “ia hinaaro tatou i te tauturu.” (Heb. 4:16) No reira, ia ite oe i te rima o Iehova i roto i to oe oraraa, a ui ia oe iho: ‘Ia ˈna i tauturu mai ia ˈu i roto i teie fifi, eaha ta ˈu i haapii mai no nia ia ˈna? Eaha te mau huru maitatai ta ˈu i tapea mai no nia ia Iehova?’

EITA TATOU E FAAEA I TE HAAPII NO NIA IA IEHOVA

17-18. E tamau noa tatou i te haapii no nia ia Iehova e a muri noa ˈtu. No te aha?

¹⁷ A feruri na i ta tatou e haapii mai no nia ia Iehova i roto i te ao apî. E horoahia mai te mau otaro apî ua papaihia ta ˈna e titau mai ia tatou. (Apo. 20:12) E piri atu â tatou i te mau animara e e haapii atu â tatou no nia i te natura. (Isa. 11:6-9) E oaoa atoa tatou i te farerei faahou i te feia herehia tei pohe, i te riro mǎrû noa ˈi ei taata tia roa e i te faahohonu atu â to tatou ite no nia ia Iehova.

¹⁸ E tamau noa tatou i te haapii no nia ia Iehova e a muri noa ˈtu. Inaha mai te tau mai â o ˈna i te ora-noa-raa “e maramarama hau ê [ïa] to ˈna.” (Sal. 90:2; 147:5) “Eita [tatou] e ite mai i te ohipa ta te Atua mau i rave mai te haamataraa e tae roa i te hopea.” (Koh. 3:11) No reira, mea maoro tatou i roto i te parau mau aore ra eita, e tamau anaˈe i te haapii no nia i to tatou Metua î i te here.