A tauturu i ta oe piahi ia ite o vai Iehova

1. Mai te aha to oe huru ia ite oe i te mau tutavaraa a te hoê piahi Bibilia?

MAI te aha to oe huru, ia ite oe i te mau tutavaraa a te hoê piahi Bibilia? A tahi ra o ˈna a haere mai ai i te putuputuraa e a horoa ˈi i te pahonoraa. Eita anei oe e oaoa ia faaite oia ia vetahi ê i ta ˈna e haapii ra e ia pûpû oia i to ˈna ora ia Iehova? Oia ïa, e oaoa roa oe. Ua papu râ ia tatou maoti noa Iehova i nuu noa ˈi ta tatou mau piahi i mua i te pae varua. No reira, e arue tatou ia ˈna a ite ai mea nafea o ˈna i te tautururaa i te hoê taata ia riro mai ei tavini na ˈna.—Kor. 1, 3:5-9; Ioa. 3, 3, 4.

2. Eaha ta Iehova e hinaaro no te mau piahi? (Timoteo 1, 2:3, 4)

² Te oaoa atoa nei Iehova ia nuu te mau piahi i mua i te pae varua, inaha te hinaaro nei o ˈna ia noaa i te mau huru taata atoa “te ite papu i te parau mau.” (A taio i te Timoteo 1, 2:3, 4.) Hinaaro atoa Iehova ia ite te taata o vai o ˈna e ia taa maitai ia ratou eaha ta ˈna mau opuaraa. (Ier. 9:24) Oia hoi, ia fanaˈo ratou i “te ite papu.” Te na ô ra hoê taata tuatapapa Bibilia: “E faaohipahia teie parau ‘te ite papu’ no te faataa eiaha noa te mau mea atoa ta te hoê taata e haapii mai, oia atoa râ ‘te mau maitai ta ˈna e fanaˈo.’” Ei hiˈoraa, ia haapii te hoê piahi no nia ia Iehova, e taui roa to ˈna oraraa. Hau atu, e nehenehe o ˈna e fanaˈo i “te ora mure ore.”—Ioa. 17:3.

3. Eaha ta tatou e hiˈopoa i roto i teie tumu parau?

³ Ua horoa mai Iehova ia tatou te haamaitairaa e tauturu i te taata ia ite o vai o ˈna. I roto i teie tumu parau, e pahono mai tatou i teie mau uiraa: No te aha e titauhia ia matau maitai te mau piahi ia Iehova? E nafea tatou ia haapii ia ratou to Iehova huru? E e nafea ia tauturu ia ratou ia faaohipa i ta ratou e haapii mai?

A TAUTURU I TE PIAHI IA MATAU MAITAI IA IEHOVA

4. Ia au i te Mareko 12:30, eaha ta tatou fa ia faatere tatou i te haapiiraa Bibilia?

⁴ Ua faaite mai Iesu eaha te faaueraa faufaa roa ˈˈe: “Ia here oe ia Iehova to oe Atua ma to oe aau atoa, ma to oe ora atoa, ma to oe manaˈo atoa e ma to oe puai atoa.” (A taio i te Mareko 12:30.) Tera râ, no te here ia Iehova, e tia ia haapii na mua te piahi o vai o ˈna. Hinaaro tatou ia pûpû ta tatou piahi i to ˈna ora ia Iehova, eiaha râ no tatou, no te hoê tiaturiraa aore ra no ta Iehova faanahonahoraa. No reira, ia faatere tatou i te haapiiraa Bibilia, e tauturu tatou i te piahi ia ite o vai Iehova e ia here ia ˈna.

5. No to ˈna here ia Iehova, eaha ta te piahi e rave?

⁵ Te vai ra hoê taairaa piri i rotopu i te here e te faaroo ia Iehova. Ia haapii atu â te piahi no nia ia Iehova, e here roa ˈtu â oia ia ˈna. E no to ˈna here ia Iehova, e faaroo oia i ta ˈna parau. Ua parau hoi Iesu: “Ia ite to te ao e mea here na ˈu te Metua, te rave nei au i ta te Metua i faaue mai.” (Ioa. 14:31) Hoê â huru no te piahi. No to ˈna here ia Iehova, e hinaaro roa te piahi e auraro e e vai taiva ore ia ˈna.—Ioa. 1, 5:3.

6. E nafea te ite no nia ia Iehova e tauturu ai i te piahi ia rave i te faaotiraa maitai? A faataa na.

⁶ E rave te piahi i te mau faaotiraa paari ia matau maitai o ˈna ia Iehova. Teie te tahi hiˈoraa: Ia hinaaro te hoê taata e riro mai ei pairati manureva, eita e navai ia hiˈopoa noa oia i te tahi mau faatureraa no nia i te manureva. E titauhia ia haapii roa ˈtu o ˈna e nafea ia faatere hoê manureva. E taa ïa ia ˈna eaha te rave ia tupu te vero aore ra ia taui te huru o te reva. E feruri atoa o ˈna i ta ˈna mau faaotiraa ia ore o ˈna, te manureva e te mau horopatete ia fifihia. Hoê â huru no te piahi Bibilia. E matau atu â oia ia Iehova, eiaha noa na roto i te haapiiraa Bibilia, maoti atoa râ te feruriraa i te mau maitai ta ˈna e fanaˈo ia vaiiho oia na te Bibilia e aratai i ta ˈna mau faaotiraa. Rahi atu â o ˈna i te haapii no nia ia Iehova, rahi atu â o ˈna i te ite i to Iehova rima i roto i to ˈna oraraa. I reira ïa o ˈna e rave ai i te mau faaotiraa maitai i roto i te mau tupuraa atoa.

7. Inaha ua matau maitai Iosepha ia Iehova, eaha ïa ta ˈna i rave i mua i te faahemaraa?

⁷ A hiˈo na ia Iosepha. Aita oia i fati i mua i te faahemaraa a te vahine a Potiphara, no te mea ua ite Iosepha o vai Iehova. Eita e ore i to ˈna nainairaa ua faaroo oia i te aamu o Adamu raua Eva e to Aberahama raua Sara. (Gen. 2:24; 20:3, 6) Ua taa ïa ia ˈna eaha to Iehova manaˈo no nia i te faaipoiporaa e te taotoraa e te hoê apiti. No reira, noa ˈtu ua faahinaaro e ua onoono noa te vahine a Potiphara ia taoto Iosepha ia ˈna, aita o ˈna i fati. Ua patoi roa ˈtu oia ma te parau: “E nahea vau e nehenehe ai e rave i teie ino rahi, a hara ˈtu ai hoi i te Atua?” (Gen. 39:7-9) Ua taa ia Iosepha eaha te mea maitai e te mea ino. Ua taa atoa ia ˈna e maui roa Iehova ia rave o ˈna i te hara. No reira, ua faaoti Iosepha e vai taiva ore. Ia tauturu tatou i te mau piahi ia ite o vai Iehova, mai te aha to ˈna huru, e hinaaro atoa ratou e faaoaoa ia ˈna.

A HAAPII IA ˈNA MAI TE AHA TO IEHOVA HURU

8. E nafea oe ia faaohipa i te buka Ia ora oe e a muri noa ˈtu! no te tauturu i ta oe piahi ia ite o vai Iehova?

⁸ E nafea oe ia haapii i te piahi mai te aha to Iehova huru? Ua tauturu Iehova ia Ioba ia haapii atu â no nia ia ˈna na roto i te mau uiraa, hau i te 50 uiraa ta ˈna i tuu atu ia Ioba. (Ioba 38:1–41:34) Ia faaohipa atoa ïa tatou i te mau uiraa a faatere ai i te haapiiraa Bibilia. Ua faaineinehia te mau uiraa i roto i te buka Ia ora oe e a muri noa ˈtu! no te tauturu i te piahi ia haapii mǎrû noa no nia i te mau huru maitatai o Iehova. (A hiˈo i te tumu parau tarenihia “Uiraa e tauturu ia oe ia haapii i te piahi.”) No reira, a faaohipa i teie mau uiraa no te tauturu i te piahi ia matau maitai ia Iehova.

9-10. (1) E nafea te piahi e faufaahia ˈi i ta ˈna taioraa Bibilia? (Iakobo 5:11) (2) A faataa na e nafea te hoê aamu Bibilia e tauturu mai ai ia ite eaha ta Iehova e au e ta ˈna e au ore.

⁹ I te omuaraa iho â o te haapiiraa, e faaitoito tatou ia ˈna ia taio i te Bibilia i te mau mahana atoa.a Eaha te rave ia apo mai o ˈna i te haapiiraa faufaa i ta ˈna taioraa? E faaitoito ïa tatou ia ˈna ia feruri: ‘Eaha ta teie irava e haapii mai ra no nia ia Iehova? No te aha o ˈna i faahiti ai teie tupuraa? Ua tapao anei au te tahi o to ˈna mau huru maitatai?’ A hiˈo na ia Iakobo. Parau mau, ua faahiti o ˈna i “te faaoromai tamau o Ioba.” E ere râ tera anaˈe. Ua faahiti atoa Iakobo i te mau huru maitatai o Iehova, to ˈna here rahi e to ˈna aroha hamani maitai.—A taio i te Iakobo 5:11.

¹⁰ E hinaaro tatou ia haapii mai te piahi eaha ta Iehova e au e ta ˈna e au ore. Ei hiˈoraa, e hiˈo te piahi i te tapura “Ta ˈu taioraa Bibilia i te mahana” i roto i te buka Ia ora oe e a muri noa ˈtu! E faaite mai paha o ˈna e hinaaro oia e taio i te aamu o Daniela tei taorahia i roto i te apoo o te mau liona. E nehenehe tatou e faaitoito atu ia feruri i na uiraa: ‘No te aha Iehova i faaora ˈi ia Daniela? Eaha ta teie aamu e faaite ra no nia ia Iehova e te mea ta ˈna e au?’ (Dan. 6:10, 22) E ui atoa paha oia: ‘Eaha tei tupu no te mau taata o tei pari ia Daniela? Eaha ta teie aamu e faaite ra no nia ia Iehova e te mea ta ˈna e au ore?’ (Dan. 6:4, 5, 24) I muri iho, nehenehe ta ˈna e imi i te tahi atu mau huru maitatai o Iehova i roto i teie aamu.—Dan. 6:26, 27.

11. E nafea tatou ia tauturu i te piahi ia haamauruuru noa ia Iehova?

¹¹ E oaoa roa tatou ia ite e ua au roa ta tatou piahi i ta ˈna taioraa Bibilia. E faataa tatou ia ˈna o Iehova te Tumu o teie mau maitai pae varua ta ˈna e fanaˈo nei. O ˈna hoi to tatou Orometua Rahi roa ˈˈe. (Isa. 30:20, 21) Eaha ïa te rave ia haamauruuru mai teie piahi ia tatou? E faahiahia roa paha o ˈna ia tatou. E parau roa mai paha o ˈna e mea au na ˈna ia faatere tatou i ta ˈna haapiiraa. E ere mea ino teie mau parau ta ˈna. Tera râ, mea faufaa ia faahoˈi noa tatou i te hanahana ia Iehova ra.

A TAUTURU IA ˈNA IA FAAOHIPA I TA ˈNA I HAAPII MAI

12-13. Ua taio te piahi i te tahi aamu Bibilia mea huru fifi ia taa. E nafea oe ia tauturu ia ˈna? (A hiˈo atoa i te hohoˈa.)

¹² Ia faufaahia tatou i te “ite papu” no roto mai i te Bibilia, e titauhia ia faaohipa tatou i ta tatou e haapii mai. E nafea oe ia faaitoito i te piahi ia faaohipa i ta ˈna e haapii mai ra? Na mua roa, mai te peu mea fifi no ˈna ia taa i te tahi aamu Bibilia, a faaitoito atu ia haamanaˈo i ta ˈna i ite ê na no nia ia Iehova. Ei hiˈoraa, e taio paha o ˈna no nia i te tahi faautuaraa a Iehova. E ui paha o ˈna no te aha Iehova i haamou ai i teie mau taata, area te tahi atu ua faaora mai o ˈna. E nafea ïa oe e tauturu ai ia ˈna?

¹³ E nehenehe oe e parau atu ia haamanaˈo o ˈna i ta ˈna i ite no nia ia Iehova. Teie te tahi mau uiraa mea faufaa ia feruri o ˈna: Eaha to Iehova manaˈo i te ora? (Pet. 2, 3:9) Eaha ta ˈna i rave no te faaora ia tatou, noa ˈtu e taata hara tatou pauroa? (Eph. 2:4, 5) E faautua anei Iehova i te taata aita ta ratou e hara? E paruru anei Iehova i te feia ohipa ino? E vaiiho anei oia ia ratou ia ora ma te ore e amo i ta ratou utua? (Exo. 34:6, 7) I te tahi taime, eita te Bibilia e faaite pauroa te mea i tupu. Eita ïa tatou e taa maitai no te aha Iehova i na reira ˈi. Noa ˈtu râ, aita e faufaa ia taa ia tatou pauroa teie mau mea. Ua papu hoi ia tatou te mea faufaa roa ˈˈe, oia hoi e Atua parau-tia Iehova.

14. Aita ta oe piahi e afaro ra i te tahi mero o te amuiraa. E nafea oe ia tauturu ia ˈna?

¹⁴ Teie te tahi atu ravea ia faaohipa te piahi i ta ˈna i haapii mai no nia ia Iehova. A feruri na i teie tupuraa. Te haere tamau nei o ˈna i te mau putuputuraa, tera râ aita o ˈna e afaro ra i te tahi mero o te amuiraa. Ua haamauiui paha teie taata poro i ta oe piahi. E nafea ïa oe? A faaitoito ia ˈna ia feruri i to Iehova manaˈo i to tatou mau taeae e tuahine maoti teie mau uiraa: Eaha ta Iehova i rave no te faaite i to ˈna here ia ratou? (Ioa. 3:16) No te aha mea faufaa roa no Iehova ia vai hoê noa tatou? (Sal. 133:1) Eaha to ˈna manaˈo ia ite mai o ˈna e te tutava ra tatou pauroa i te paruru i teie auhoêraa? (Kor. 2, 13:11) A tauturu i ta oe piahi ia taa e te oaoa nei Iehova ia tiatonu noa tatou i te mau huru maitatai o te mau taeae e tuahine, eiaha râ i ta ratou mau peu.

15-16. (1) Ia titauhia i te piahi ia rave i te hoê faaotiraa, e nafea te hiˈoraa o Iesu e tauturu ai ia ˈna? (Ioane 8:29) (2) Mea nafea tuahine Marianne i te tautururaa i ta ˈna piahi ia rave i te hoê faaotiraa maitai? (A hiˈo atoa i te hohoˈa.)

¹⁵ E nehenehe atoa oe e tauturu i ta oe piahi ia faaohipa i ta ˈna i haapii mai no te rave i te faaotiraa maitai. E nehenehe oe e faaohipa i te haapiiraa 35 o te buka Ia ora oe e a muri noa ˈtu! i te tumu parau “Nafea ia rave i te mau faaotiraa maitai?” E mai te peu ua pure o ˈna, ua rave atoa i te mau maimiraa e aita iho â o ˈna i ite eaha te faaotiraa tano ia rave, e nafea ïa oe? Peneiaˈe ua painu roa o ˈna inaha mea rahi te mau aratairaa Bibilia e tano no ta ˈna e faaruru ra. A faaitoito ïa ia ˈna ia pee i te hiˈoraa o Iesu. Ua parau hoi o ˈna: “E rave noa vau i te mau mea atoa e mauruuru ai [to ˈu Metua].” (A taio i te Ioane 8:29.) Mea faufaa ia ui ta oe piahi ia ˈna iho: ‘Ia au i ta ˈu mau maimiraa e ta ˈu i haapii mai no nia ia Iehova, eaha te tia ia ˈu ia rave ia oaoa to ˈna aau?’ Mai te peu e oaoa Iehova i ta oe faaotiraa, mea maitai roa ïa.

¹⁶ A hiˈo na i teie piahi no Tireni. Ua titauhia ia rave teie vahine i te hoê faaotiraa. Ua faahepohia o ˈna na to ˈna utuafare ia farii i te hoê ohipa aufau-maitai-hia. Te na ô ra Marianne, te tuahine e faatere ra i ta ˈna haapiiraa: “Ua faaitoito vau ia ˈna ia haamanaˈo ia Iehova. E oaoa anei Iehova i ta ˈna faaotiraa? Aore ra e oto anei o ˈna? Ua faaitoito atoa vau ia ˈna ia faahiti pauroa to ˈna tupuraa ia Iehova na roto i te pure, e ia hiˈo eaha ta Iehova e pahono mai. Aita ˈtura o ˈna i farii i teie ohipa aufau-maitai-hia. E i muri iho, ite atura oia i te tahi atu ohipa e tano maitai ia nehenehe oia e haere tamau i te mau putuputuraa.” Ua tapao anei outou? Aita tuahine Marianne i parau i ta ˈna piahi eaha te titauhia ia rave. Ua tauturu noa ˈtu o ˈna i teie vahine ia haamanaˈo i ta ˈna i haapii no nia ia Iehova. Eaha te haamaitairaa? Ua piri atu â raua te tahi i te tahi. Hau atu â râ, ua piri roa ˈtu teie piahi ia Iehova. Te na ô ra Marianne: “Ua taa ia ˈna e aupuru noa mai Iehova ia tuu tatou i te mau ohipa pae varua i te parahiraa matamua.”

TE MAU HAAMAITAIRAA IA ITE MAU Â O VAI IEHOVA

17. E rave rahi tumu parau faufaa ta te piahi e haapii mai, eaha râ te mea faufaa roa ˈˈe?

¹⁷ I roto i ta ˈna haapiiraa Bibilia, e rave rahi tumu parau faufaa ta te piahi e hiˈopoa mai. E haapii mai o ˈna no nia i te feia pohe, te hoo, e te Faatereraa arii a te Atua. E haapii atoa mai o ˈna no nia i ta Iehova faanahonahoraa, te mau putuputuraa, te hopoia a te mau matahiapo e te tuhaa a te Tino aratai. Tera râ, eita tatou e hinaaro ia haapii noa te mau piahi i teie mau tuhaa. Te mea faufaa roa, ia matau maitai ratou ia Iehova.

18. Eaha te mau haamaitairaa ta tatou e fanaˈo?

¹⁸ Auê ïa haamaitairaa rahi ia haapii i te taata e ia tauturu ia ratou ia ite o vai Iehova! Te oaoa nei te feia e haapii ra o vai Iehova, a haamori atu ai ia ˈna. (Sal. 25:12-15) A muri aˈe, e fanaˈo te feia atoa tei horoahia ˈtu “te maramarama ia ite [ra]tou o vai te Atua mau” i te tahi atu haamaitairaa, oia hoi te ora mure ore. (Ioa. 1, 5:20) E ere râ tera anaˈe. Te faaite ra te Bibilia e te feia o te tutava nei i te haapii o vai Iehova a here roa ˈi ia ˈna, o taua mau taata ra “tei itehia e ana.” (Kor. 1, 8:3) Oia nei, ua ite Iehova te Atua Manahope ia tatou e te hinaaro ra oia ia riro tatou ei hoa no ˈna. Teie te haamaitairaa rahi roa ˈˈe ta te feia e haapii ra o vai Iehova e fanaˈo.