A tiaturi mea here iho â na Iehova ia oe

1. No te aha oe i pûpû ai ia oe ia Iehova? (A hiˈo atoa i te hohoˈa.)

TE HAAMANAˈO ra anei oe i to oe pûpûraa ia oe ia Iehova? Ua rave oe i tera faaotiraa no te mea ua haapii oe i te parau mau no nia ia ˈna, a here atu ai ia ˈna. Ua euhe oe i te rave na mua roa i to ˈna hinaaro, e i te here ia ˈna ma to aau, to ora, to manaˈo e to puai atoa. (Mar. 12:30) Mai reira mai, ua here roa ˈtu â oe ia ˈna. No reira, ia ui noa mai te tahi taata: “Mea here iho â anei na oe ia Iehova?” Oioi ïa oe i te pahono atu: “E, o ˈna anaˈe ta ˈu mea here roa.”

2-3. Te hinaaro ra Iehova ia aha tatou, e eaha ta tatou e ite mai i roto i teie tumu parau? (Ieremia 31:3)

² Teie râ, eaha ta oe e pahono ia ui mai tera taata: “Papu anei ia oe mea here na Iehova ia oe?” Taere rii paha ta oe pahonoraa. No oe, aita Iehova e here ra ia oe, no te mea e ere oe i te taata maitai. Tera hoi te manaˈo o te hoê tuahine, tei paari mai i roto i te hoê utuafare aita e here. Teie ta ˈna i parau: “Ua ite au mea here na ˈu ia Iehova. Mea papu te reira. Pinepine râ vau i te uiui mea here anei na Iehova ia ˈu.” Na te aha ïa e tauturu ia oe ia ite i to Iehova manaˈo?

³ Te hinaaro ra Iehova ia papu maitai ia oe e mea here na ˈna ia oe. (A taio i te Ieremia 31:3.) Na ˈna hoi i faafatata mai ia oe ia ˈna ra. I to oe pûpûraa ia oe ia ˈna a bapetizohia ˈtu ai, ua fanaˈo oe i te hoê ô faahiahia roa, to ˈna here taiva ore. Mea puai taua here ra e te mure ore. Mai tera to ˈna here no ta ˈna mau tavini taiva ore ei “faufaa taa ê” na ˈna, o oe atoa ïa. (Mal. 3:17, nota) Mea here iho â na Iehova ia oe, ta ˈna ïa e hinaaro ra ia tiaturi oe. Ua papu atoa i te aposetolo Paulo te reira. Ua papai hoi o ˈna: “Ua papu roa hoi ia ˈu e ore roa ˈtu te pohe, te ora, te mau melahi, te mau faatereraa, te mau mea e vai nei aore ra te mau mea e tupu mai, te mau puai atoa, e to te vahi teitei aore ra to te hohonuraa, e ore roa ˈtu te tahi atu mea i poietehia e nehenehe e faataa ê ia tatou i te here o te Atua.” (Roma 8:38, 39) I roto i teie tumu parau, e ite mai tatou no te aha mea faufaa ia tiaturi e mea here na Iehova ia tatou, e eaha te rave ia papu atu â ia tatou te reira.

NO TE AHA MEA FAUFAA IA TIATURI I TO IEHOVA HERE?

4. E nafea tatou e mau papu ai i mua i te mau ravea paari a Satani?

⁴ E mau papu tatou i mua i “te mau ravea paari” a Satani. (Eph. 6:11) Ta ˈna fa, ia faaea tatou i te tavini ia Iehova. E imi o ˈna i te mau ravea atoa ia manaˈo tatou e aita Iehova e here ra ia tatou. E haavare râ teie. I roto i te Bibilia, ua faaauhia Satani i te hoê liona. (Pet. 1, 5:8, 9) O te mau animara paruparu ta te mau liona e aˈuaˈu. Hoê â huru no Satani. E tairi o ˈna ia tatou ia paruparu e ia rohirohi tatou. I te taime atoa e toaruaru ai tatou no ta tatou i faaruru na, e faaruru nei aore ra ia haapeapea tatou no te tupu ananahi. (Mas. 24:10) E hinaaro Satani e haaparuparu ia tatou a ore atu ai tatou e tavini faahou ia Iehova. E nehenehe râ tatou e “patoi” i te Diabolo e i ta ˈna mau raveraa ia papu maitai ia tatou mea here na Iehova ia tatou.—Iak. 4:7.

5. No te aha mea faufaa ia papu ia tatou to Iehova here ia tatou?

⁵ E piri atu â tatou ia Iehova. Ua poiete Iehova ia tatou no te here ia vetahi ê e ia herehia tatou e ratou. Tera iho â. Ia herehia mai tatou e here atoa ˈtu tatou. No reira, ia papu ia tatou mea here na Iehova ia tatou, e rahi roa ˈtu to tatou here ia ˈna. (Ioa. 1, 4:19) E ia here atu â tatou ia Iehova, e rahi atu â to ˈna here no tatou. Te parau ra te Bibilia: “A faafatata ˈtu i te Atua, e e faafatata mai oia ia outou.” (Iak. 4:8) Eaha râ te rave ia papu maitai ia tatou te reira?

NA TE AHA E TAUTURU MAI IA TIATURI I TO IEHOVA HERE?

6. No te tiaturi i to Iehova here, eaha ta oe e rave?

⁶ A tamau i te pure ia Iehova no te taa no te aha o ˈna e here ai ia oe. (Luka 18:1; Roma 12:12) A pure ia ˈna noa ˈtu ehia taime i te mahana, ia tapea oe i to ˈna manaˈo no nia ia oe. No te mea i te tahi taime, e faahapa mai to oe aau ia oe, a manaˈo atu ai oe aita Iehova e here ra ia oe. A haamanaˈo râ mea rahi aˈe Iehova i to oe aau. (Ioa. 1, 3:19, 20) Ua ite o ˈna i te mau mea atoa no nia ia oe. O to oe mau huru maitatai ta ˈna e hiˈo, o oe râ aita oe e ite ra. (Sam. 1, 16:7; Par. 2, 6:​30) No reira, “a haamahora i to [oe] aau” ia ˈna. A ani i ta ˈna tauturu no te tiaturi i to ˈna here ia oe. (Sal. 62:8) I muri iho, a faaohipa i to muri nei mau manaˈo tauturu.

7-8. E nafea te mau Salamo e haapapu ai mea here na Iehova ia tatou?

⁷ A tiaturi i ta Iehova e parau ra. Ua faaohipa Iehova i to ˈna varua moˈa no te haapapai i roto i ta ˈna Parau, te Bibilia mai te aha to ˈna huru. A hiˈo na eaha ta Davida i parau: “Tei pihai iho Iehova i te feia o te mauiui ra, e faaora nei oia i te feia o te toaruaru ra.” (Sal. 34:18, nota) Ua toaruaru anaˈe tatou, e moˈemoˈe roa tatou. Ua fafau mai râ Iehova tei pihai iho o ˈna ia oe i tera taime, ua ite hoi o ˈna e te hinaaro ra oe i ta ˈna tauturu. Ua papai atoa Davida: “A tuu i to ˈu mau roimata i roto i ta oe pute pape.” (Sal. 56:8) Te ite ra Iehova e te mauiui ra oe, e eita o ˈna e au ia mauiui oe. Ia tahe to oe pape mata, e ohi Iehova ei auraa parau i to oe mau roimata atoa a haaputu atu ai i roto i te hoê mohina pape. Mea faufaa roa hoi te pape i roto i ta ˈna farii ia na roto te hoê taata i te medebara. Hoê â huru no Iehova. Eita e moˈe ia ˈna te mau taime atoa i taˈi ai oe. Te na ô ra te Salamo 139:​3: “Ua matau oe [Iehova] i to ˈu mau haerea atoa.” Te mau mea atoa ta oe e rave, te ite ra Iehova. Ta ˈna râ e haapao, ta oe ïa mau ohipa maitatai. (Heb. 6:10) No te aha? No te mea te haafaufaa ra o ˈna i ta oe mau tutavaraa no te faaoaoa ia ˈna.a

⁸ Mea mahanahana mau teie mau irava ta tatou i ite mai nei. Mai te huru ra e te parau mai ra Iehova: “Hinaaro vau ia ite oe e mea here na ˈu ia oe e te tâuˈa ra vau ia oe.” Teie râ, te haaparare ra Satani i te haavare e aita Iehova e here ra ia oe. No reira, ia feaa noa ˈtu to oe manaˈo, a ui ia oe iho: ‘O vai ta ˈu e tiaturi, “te metua no te haavare” anei aore ra “te Atua parau mau”?’—Ioa. 8:44; Sal. 31:5.

9. Eaha ta Iehova i fafau i te feia e here ra ia ˈna? (Exodo 20:5, 6)

⁹ A feruri i to Iehova manaˈo i te feia e here ra ia ˈna. A hiˈo na i ta Iehova i parau ia Mose e i te ati Iseraela. (A taio i te Exodo 20:5, 6.) Ua fafau o ˈna e tamau o ˈna i te faaite i to ˈna here taiva ore i te feia e here ra ia ˈna. No to ˈna taiva ore, eita ta ˈna e nehenehe eiaha e here i te feia e here ra ia ˈna. (Neh. 1:5) No reira, ia puta noa mai tera manaˈo aita Iehova e here ra ia oe, a feruri: ‘O vau, mea here na ˈu ia Iehova e te tutava nei au i te faaoaoa ia ˈna. Ua haapapu mai o ˈna e mea here roa na ˈna ia ˈu.’ (Dan. 9:4; Kor. 1, 8:3) No te aha ïa oe e uiui faahou ai mea here anei na Iehova ia oe? To ˈna here taiva ore ia oe mea papu maitai tera parau.

10-11. Eaha ta Iehova e hinaaro ra ia haamanaˈo oe no nia i te hoo? (Galatia 2:20)

¹⁰ A feruriruri i te hoo. O te tusia taraehara o Iesu te ô faahiahia roa ˈˈe ta Iehova i horoa no te huitaata. (Ioa. 3:16) No oe atoa anei teie ô? E! Ua papu atoa ia Paulo teie parau. Hou a riro mai ai ei tavini na Iehova, e ohipa ino ta ˈna i rave. E i muri mai, ua titauhia ia tamau o ˈna i te haavî i to ˈna huru tia ore. (Roma 7:24, 25; Tim. 1, 1:12-14) Ua taa râ ia ˈna e ô te tusia taraehara o Iesu ta Iehova i horoa no ˈna. (A taio i te Galatia 2:20.) E ere noa no Paulo tera manaˈo, na Iehova i haapapai ia ˈna i te reira. Te mau parau atoa i tuuhia i roto i te Bibilia, ei haapiiraa ïa na tatou. (Roma 15:4) Te haapiiraa: Te hinaaro ra Iehova ia papu maitai ia oe, te hoo ta Iesu i horoa mai, no oe atoa ïa teie ô. Ia tapea noa oe i tera manaˈo, e papu atu â ïa ia oe to Iehova here rahi ia oe.

¹¹ Mauruuru roa tatou ia Iehova i to ˈna tonoraa mai ia Iesu i te fenua nei no te horoa i to ˈna ora no tatou. E ere râ tera noa te tumu i haere mai ai Iesu i te fenua, no te faaite atoa i te parau mau no nia ia Iehova. (Ioa. 18:37) Ua haapii atoa Iesu e mea here roa na Iehova i ta ˈna mau tamarii.

E NAFEA IESU E TAUTURU MAI AI IA TIATURI I TO IEHOVA HERE?

12. No te aha tatou e tiaturi ai i ta Iesu i parau no Iehova?

¹² A ora ˈi i te fenua, ua faaite Iesu i te parau mau no nia ia Iehova. (Luka 10:​22) E nehenehe tatou e tiaturi ia Iesu no te mea mea maoro to ˈna oraraa i pihai iho i to ˈna Metua. (Kol. 1:15) I tera roaraa, ua ite maitai Iesu e mea here roa na Iehova ia ˈna. Ua ite atoa o ˈna mea nafea to ˈna Metua i te faaiteraa i to ˈna here i ta ˈna mau melahi taiva ore, e pauroa ta ˈna mau tamaiti e tamahine haapao maitai i te fenua. E nafea Iesu e tauturu ai ia vetahi ê ia tiaturi i to Iehova here?

13. Eaha ta Iesu e hinaaro ra ia ite tatou no nia ia Iehova?

¹³ Te hinaaro ra Iesu ia ite tatou eaha to Iehova manaˈo no tatou. I roto i na Evanelia, ua hau atu 160 taime to Iesu faahitiraa ia Iehova ei “Metua.” Ia paraparau o ˈna i ta ˈna mau pǐpǐ, e faahiti atoa o ˈna i teie parau “to outou Metua i te raˈi.” (Mat. 5:16; 6:26) Hou Iesu a haere mai i te fenua nei, i pii noa na te mau tavini haapao maitai a Iehova ia ˈna te “Manahope,” “Tei Teitei Roa ˈˈe,” te “Atua poiete rahi” e te vai ra ˈtu â. O Iesu râ, pinepine o ˈna i te pii ia Iehova ei “Metua” no tatou. Te auraa ïa, ua ite Iesu e te hinaaro ra Iehova ia piri roa ta ˈna mau tavini ia ˈna, mai te hoê tamarii e piri roa i to ˈna papa î i te here. E hiˈo mai tatou e piti taime i faaohipa ˈi Iesu i te parau “Metua.”

14. Mea nafea Iesu i te haapapuraa e mea poihere na Iehova ia tatou tataitahi? (Mataio 10:29-31) (A hiˈo atoa i te hohoˈa.)

¹⁴ E hiˈo mai tatou na mua i ta Iesu i faahiti i te Mataio 10:29-31. (A taio.) Teie mau manu rii e faahitihia ra i ǒ nei, eita roa ˈtu ratou e here aore ra e haamori ia Iehova. Tera râ, ia mairi noa ˈtu hoê noa ˈˈe manu rii i raro, e ite roa mai Iehova. Te auraa, mea faufaa roa no Iehova teie mau manu. Mai te peu mea faufaa ratou no Iehova, eaha ˈtu â ïa tatou o te tavini ra ia ˈna. Ua parau atoa Iesu e ua ite to tatou Metua ehia rouru to tatou. Tapao faaite ïa mea tâuˈa roa o ˈna ia tatou. E nehenehe iho â tatou e tiaturi i te reira. E tera iho â ta Iesu e hinaaro ia papu maitai ia tatou, mea poihere na Iehova to tatou Metua i te raˈi ia tatou tataitahi.

15. Eaha ta te Ioane 6:44 e haapii mai ra no nia i to tatou Metua i te raˈi?

¹⁵ Teie te tahi atu faahitiraa a Iesu i te parau “Metua.” (A taio i te Ioane 6:44.) Ia au i teie irava, na to oe Metua i te raˈi i faafatata mai ia oe ia ˈna ra ia ite oe i te parau mau no nia ia ˈna. No te aha? No te mea ua ite o ˈna e aau farii to oe. (Ohi. 13:48) I roto i te Ioane 6:44, te faahiti ra o Iesu i ta Iehova i parau i to ˈna nunaa i te Ieremia 31:3, oia hoi: “No reira vau i faafatata mai ai ia oe ia ˈu nei ma te here taiva ore [aore ra i tamau noa ˈi i te here ia oe ma te taiva ore].” (A hiˈo atoa i te Hosea 11:4.) Eaha ïa te auraa? E tamau noa ïa to oe Metua i te raˈi i te hiˈo i to oe mau huru maitatai, ta oe hoi e ore e ite ra.

16. (1) Eaha ta Iesu e hinaaro ra e parau mai ia tatou, e no te aha mea tano ia tiaturi tatou ia ˈna? (2) E nafea ia papu atu â ia oe o Iehova te Metua maitai roa ˈˈe? (A hiˈo i te tumu parau tarenihia “Te Metua maitai roa ˈˈe.”)

¹⁶ Ma te faahiti ia Iehova ei Metua no tatou mai te huru ra e te parau mai ra Iesu: “E Metua Iehova no ˈu, e Metua atoa râ o ˈna no oe. Mea here na Iehova ia oe, e te tâuˈa ra o ˈna ia oe, te haapapu ra vau ia oe i te reira.” No reira, ia puta noa mai tera manaˈo aita Iehova e here mai ra ia oe, a feruri: ‘Ua matau maitai te Tamaiti i to tatou Metua e te parau mau noa ta ˈna e haapii mai. Eaha ïa oe e feaa faahou ai?’—Pet. 1, 2:22.

A TIATURI NOA I TO IEHOVA HERE

17. No te aha mea faufaa ia tiaturi noa tatou i to Iehova here?

¹⁷ Mea faufaa roa ia tamau tatou i te tiaturi e mea here na Iehova ia tatou. Mai ta tatou i ite mai nei, eita to tatou enemi o Satani e tuu ia tatou. Ta ˈna fa, ia faaea tatou i te tavini ia Iehova. E imi ïa o ˈna i te mau ravea atoa ia feaa tatou no nia i to Iehova here. Eiaha râ tatou ia vaiiho ia Satani ia upootia!—Ioba 27:5.

18. E nafea ia papu atu â ia oe mea here na Iehova ia oe?

¹⁸ Ia papu atu â ia oe mea here na Iehova ia oe, a ani i ta ˈna tauturu na roto i te pure ia hiˈo oe ia oe mai ta ˈna e hiˈo mai ra ia oe. A feruri i te mau irava Bibilia e haapapu mai ra mea tâuˈa na Iehova i te feia e here ra ia ˈna. A haamanaˈo atoa eita ta ˈna e nehenehe eiaha e here i te feia e here ra ia ˈna. A feruriruri atoa i te parau o te hoo, e ô teie ta Iehova i horoa mai no oe. A tiaturi o Iehova to oe Metua i te raˈi mai ta Iesu i parau. No reira, ia ui noa mai te tahi taata: “Papu ia oe, mea here na Iehova ia oe?” Oioi oe i te pahono: “E. Ua papu maitai ia ˈu te reira, e te tutava nei au i te mau mahana atoa no te faaite i to ˈu here ia ˈna.”