A tiaturi e faaore mau â Iehova i ta oe mau hara

1-2. Eaha to tatou huru ia faaore Iehova i ta tatou mau hara? (A hiˈo atoa i te hohoˈa.)

UA ITE maitai te arii Davida i te huru aau faahapa o te hoê taata tei hara. (Sal. 40:12; 51:3; upoo parau) Ua rave hoi Davida i te hara rahi. Tera râ, ua tatarahapa mau o ˈna e ua faaore Iehova i ta ˈna mau hara. (Sam. 2, 12:13) Ua oaoa roa ïa Davida i to ˈna iteraa i te reira.—Sal. 32:1.

² Mai ia Davida, e oaoa atoa tatou i te iteraa ua aroha hamani maitai Iehova ia tatou ma te faaore i ta tatou mau hara. Auê te mahanahana ia haamanaˈo ua ineine Iehova i te na reira ia tatarahapa mau tatou, ia faˈi i ta tatou mau hara, e ia tutava i te ore e tapiti faahou. (Mas. 28:13; Ohi. 26:20; Ioa. 1, 1:9) Mea oaoa atoa ia ite e ua faaore anaˈe Iehova i ta tatou mau hara, eita o ˈna e faahiti faahou i te reira.—Ezk. 33:16.

3-4. Eaha te huru o te hoê tuahine i muri iho i to ˈna bapetizoraahia, e eaha ta tatou e hiˈopoa i roto i teie tumu parau?

³ I te tahi râ taime, mea fifi no tatou ia tiaturi e ua faaore Iehova i ta tatou mau hara. Tera atoa te manaˈo o Jennifer, tei paari i roto i te parau mau. I rave na o ˈna i te ohipa haapaoraa ore i to ˈna apîraa e aita o ˈna i faaite i to ˈna na metua. Tau matahiti i muri aˈe, ua rave o ˈna i te mau tauiraa, ua pûpû oia i to ˈna ora ia Iehova, a bapetizohia ˈtu ai. Te faatia ra o ˈna: “Na mua ˈˈe, mea taiata vau, mea inu, e mea riri hanoa. O te moni te mea faufaa roa ˈˈe i roto i to ˈu oraraa. Ua ite au e maoti te tusia taraehara o Iesu, e faaore Iehova i ta tatou mau hara. Aita râ i papu ia ˈu ua faaore iho â Iehova i ta ˈu mau hara.”

⁴ E oe? Mea fifi anei no oe ia tiaturi e ua faaore Iehova i ta oe mau hara? Ua papu ia Davida e ua na reira Iehova i nia ia ˈna, e ua oaoa roa o ˈna. E Atua aroha hamani maitai hoi o Iehova. Tera atoa ta ˈna e hinaaro ra no tatou. I roto i teie tumu parau, e hiˈo mai tatou no te aha mea faufaa ia tiaturi e faaore iho â Iehova i ta tatou mau hara, e eaha te tauturu ia tatou ia papu i te reira.

NO TE AHA MEA FAUFAA IA TIATURI E FAAORE IEHOVA I TE HARA?

5. Eaha ta Satani e hinaaro ra ia manaˈo tatou? A horoa i te tahi hiˈoraa.

⁵ Eita ïa tatou e vare i ta Satani mau raveraa. A haamanaˈo e imi Satani i te mau ravea atoa ia faaea tatou i te tavini ia Iehova. E turai ïa o ˈna ia tatou ia manaˈo eita Iehova e faaore i ta tatou mau hara. A hiˈo na eaha tei tupu i nia i te hoê taata i Korinetia. Ua tuuhia o ˈna i rapae i te amuiraa no te mea ua rave o ˈna i te peu taotoraa tia ore. (Kor. 1, 5:1, 5, 13) Ua tatarahapa o ˈna i muri iho. Ua hinaaro râ Satani e turai i te amuiraa ia ore e faaore i te hara a teie taata, ia ore ïa e farii faahou ia ˈna i roto i te amuiraa. Ua hinaaro atoa Satani ia manaˈo teie taata aita Iehova i faaore i ta ˈna hara, e ia faaea o ˈna i te tavini ia Iehova no to ˈna “oto rahi.” I teie mahana, hoê â huru, aita Satani i taui i ta ˈna fa. Tera râ, “ua ite . . . tatou i ta ˈna mau raveraa.”—Kor. 2, 2:5-11.

6. Eaha te tauturu mai ia faaea i te faahapa noa ia tatou?

⁶ E faaea ïa tatou i te faahapa noa ia tatou. Ia hara tatou, e oto iho â tatou. (Sal. 51:17) E hauti atoa to tatou manaˈo haava, e turai ïa te reira ia tatou ia taui i to tatou haerea. (Kor. 2, 7:10, 11) Tera râ, ia tamau tatou i te faahapa ia tatou noa ˈtu ua tatarahapa tatou, e toaruaru roa ïa tatou a faaea ˈtu ai i te tavini ia Iehova. Ia tiaturi râ tatou e faaore Iehova i te hara, eita ïa tatou e faahapa noa ia tatou. E tavini ïa tatou ia Iehova ma te oaoa e maoti te hoê manaˈo haava mâ. (Kol. 1:10, 11; Tim. 2, 1:3) E nafea ïa e papu ai ia tatou e faaore iho â Iehova i te hara?

EAHA TE TAUTURU MAI IA TIATURI E FAAORE IEHOVA I TE HARA?

7-8. Eaha ta Iehova i parau ia Mose no nia ia ˈna, eaha ïa te auraa no tatou? (Exodo 34:6, 7)

⁷ A feruri mai te aha te huru o Iehova. Ei hiˈoraa, a tapao na i ta Iehova i parau ia Mose i te mouˈa Sinai.a (A taio i te Exodo 34:6, 7.) Noa ˈtu mea rahi to Iehova huru maitatai, ua maiti noa oia i te parau ia Mose “e Atua aroha hamani maitai [o ˈna] e te aumihi.” No reira, ia feruri oe, eita anei Iehova e faaore i te hara a te hoê taata e here ra ia ˈna e tei tatarahapa? Ia ore o ˈna e na reira, e Atua ino ïa o ˈna e te aroha ore. E ere roa ˈtu râ o ˈna mai tera!

⁸ Ia parau Iehova e Atua aroha hamani maitai o ˈna, e parau mau iho â. Eita roa ˈtu o ˈna e haavare. (Sal. 31:5) Te auraa ïa, e nehenehe tatou e tiaturi ia ˈna. Mai te peu aita â i papu atura ia oe e ua faaore Iehova i ta oe mau hara, a ui ia oe: ‘Te tiaturi ra anei au e Atua aroha hamani maitai Iehova e te aumihi, o te faaore i te hara a te taata atoa tei tatarahapa? Mai te peu e e, mea papu ïa ua faaore atoa Iehova i ta ˈu mau hara.’

9. Eaha ta te Salamo 32:5 e haapii mai ra no nia i ta Iehova huru faaoreraa i te hara?

⁹ A feruri i ta Iehova i faaite i roto i te Bibilia no nia i te faaoreraa i te hara. Ei hiˈoraa, a hiˈo na i ta Davida i parau no nia i te reira. (A taio i te Salamo 32:5.) Ua parau hoi o ˈna: “Ua faaore oe i ta ˈu hapa, ta ˈu mau hara.” Te auraa o te taˈo Hebera tei hurihia ei “faaore,” e “iriti,” ïa aore ra e “amo” i te reira. No reira, i to Iehova faaoreraa i te hara a Davida, mai te huru ra ua iriti o ˈna i ta ˈna hopoia teimaha, oia hoi te manaˈo faahapa, a hopoi ê roa ˈtu ai i te reira. Ua oaoa ïa Davida i te iteraa e ua faaore roa Iehova i ta ˈna mau hara. (Sal. 32:2-4) Hoê â huru no tatou. Ia tatarahapa mau tatou, e faaore roa Iehova i ta tatou mau hara. Eiaha ïa tatou e amo noa i ta tatou hopoia teimaha, no te mea ua iriti ê na Iehova i te reira.

10-11. Eaha te auraa o te parau ‘ua ineine Iehova i te faaore i te hara’? (Salamo 86:5)

¹⁰ A taio i te Salamo 86:5. I ǒ nei, te parau ra Davida e “ua ineine [Iehova] i te faaore i te hara.” Te auraa, eita Iehova e riri oioi ia hapa anaˈe tatou, e te hinaaro ra o ˈna e faaore i te hara a te feia tatarahapa. No te aha hoi? Te parau atoa ra teie irava : “E here taiva ore rahi to oe i te feia e tiaoro ra ia oe.” I to na mua ˈtu tumu parau haapiiraa, ua ite mai tatou e faaite Iehova i to ˈna here taiva ore i ta ˈna mau tavini haapao maitai. Mea puai taua here ra e te mure ore. No to ˈna here taiva ore, “e faaore noa ˈtu . . . oia i te hara” a te feia atoa tei tatarahapa. No reira, mai te peu ua hara ratou e ua tatarahapa, e tamau Iehova i te faaite i to ˈna here taiva ore ia ratou. E faaore roa o ˈna i ta ratou mau hara. (Isa. 55:7, nota) Mai te peu aita â i papu atura ia oe ua faaore te Atua i ta oe mau hara, a ui ïa ia oe iho: ‘Te tiaturi ra anei au ua ineine Iehova i te faaore i te hara a te taata atoa tei tatarahapa, e tei ani ia aroha hamani maitai mai ia ratou? Mai te peu e e, mea papu ïa ua faaore atoa o ˈna i ta ˈu mau hara.’

¹¹ Mea mahanahana mau ia ite e te taa maitai ra ia Iehova i to tatou huru tia ore. (Sal. 139:1, 2) E ite mai ïa tatou eaha ta Davida i parau i roto i te tahi atu Salamo e e nafea te reira e tauturu mai ai ia tiaturi e faaore mau â Iehova i te hara.

EIAHA E HAAMOˈE I TA IEHOVA E HAAMANAˈO RA

12-13. Ia au i te Salamo 103:14, eaha ta Iehova e haamanaˈo ra no nia ia tatou e eaha ta te reira e turai ia ˈna ia rave?

¹² A taio i te Salamo 103:14. I ǒ nei, te parau ra Davida e ‘te haamanaˈo ra Iehova e e repo tatou.’ Na roto i teie parau, te faataa ra Davida hoê o te mau tumu e faaore ai Iehova i te hara a te feia tatarahapa. Oia hoi, te taa ra ia ˈna e taata hara tatou. No te taa maitai atu â i te reira, e faahohonu anaˈe i teie parau a Davida.

¹³ Ua parau Davida e “ua ite maitai hoi [Iehova] i to tatou hamaniraa.” Oia mau, ua hamani Iehova ia Adamu “i te repo fenua.” E ua ite o ˈna e noa ˈtu e taata tia Adamu raua Eva e taotiaraa to raua. Ua titauhia ia tamaa raua, ia taoto e ia huti i te aho. (Gen. 2:7) No te mea râ ua hara Adamu raua Eva, e auraa ê ïa to te parau “repo.” Te auraa, ei huaai na Adamu raua Eva, ua riro mai tatou ei taata hara. E titauhia ïa ia haavî tatou i te hinaaro e rave i te mea tano ore. No reira, aita noa Iehova i ite i to tatou huru tia ore, te parau ra Davida e te “haamanaˈo” atoa ra o ˈna i te reira. I te mea e te haamanaˈo ra Iehova e repo tatou, ua ite ïa o ˈna e hara iho â tatou i te tahi taime. E turai ïa te reira ia ˈna ia faaite i to ˈna aroha hamani maitai ma te faaore i ta tatou mau hara.—Sal. 78:38, 39.

14. (1) Eaha ta Davida i parau i roto i te Salamo 103:12? (2) E nafea te tupuraa o Davida e haapapu ai e faaore roa Iehova i te hara? (A hiˈo atoa i te tumu parau tarenihia “Ia faaore Iehova i te hara, eita o ˈna e haamanaˈo faahou i te reira.”)

¹⁴ Eaha mau na te auraa ia faaore Iehova i ta tatou mau hara? (A taio i te Salamo 103:12.) Ua parau Davida: “Mai te atea o te hitiraa mahana i te toparaa mahana, mai te reira atoa oia ia faaatea i ta tatou mau hara ia tatou nei.” Mea atea roa ino te vahi e hiti mai ai te mahana i te vahi e topa ˈi te mahana. Te auraa, e faaatea ê roa Iehova i ta tatou mau hara ia tatou. Eaha ta te reira e haapii mai ra no nia ia Iehova? Te na ô ra te tahi faahororaa: “Mai te peu mai tera te atea o ta tatou mau hara, ua papu ia tatou e tumâ roa Iehova i te hauˈa, te tafetafeta, e te haamanaˈoraa o te reira.” Oia mau, i te tahi taime, na nia noa i te hauˈa, e haamanaˈo roa tatou i te tahi ohipa. Ia faaore râ Iehova i ta tatou mau hara, e tumâ roa o ˈna i te reira, aita hoê aˈe hauˈa e toe mai o te haamanaˈo ia ˈna i ta tatou i rave.—Ezk. 18:21, 22; Ohi. 3:19.

15. Mai te peu te faahapa noa ra tatou ia tatou iho, eaha ïa te rave?

¹⁵ E nafea ta Davida i parau i roto i te Salamo 103 e tauturu mai ai ia tiaturi ua faaore iho â Iehova i ta tatou mau hara? Mai te peu te faahapa noa ra tatou ia tatou, e feruri anaˈe ïa: ‘Te haamanaˈo ra Iehova e taata hara tatou. Ua faaore o ˈna i te hara a te feia atoa tei tatarahapa e tei tutava i te rave i te mau tauiraa. Ta oe ïa i rave.’ A haamanaˈo atoa e ua faaoti anaˈe Iehova eiaha e haamanaˈo faahou i ta oe mau hara, eita ïa o ˈna e faahapa noa mai ia oe. Ia na reira atoa ïa oe. (Sal. 130:3) No reira, ua papu anaˈe ia oe teie parau, a haere ïa i mua, e a huri i te api.

16. A faataa na no te aha mea atâta te manaˈo faahapa. (A hiˈo atoa i te hohoˈa.)

¹⁶ Teie te tahi hiˈoraa. Mai te peu paˈi te faahapa noa ra oe ia oe, mai te huru ra ïa te faahoro ra oe i te pereoo. To oe râ mata, to nia noa ïa i te hiˈo o te pereoo. Mea au iho â i te tahi taime no te ite aita anei e fifi to muri. Tera râ, ia tere maitai noa oe, mea maitai aˈe ia hiˈo noa i mua. Hoê â huru no tatou. I te tahi taime, mea maitai ia haamanaˈo i ta oe mau hara i rave no te huti mai i te haapiiraa, eiaha e tapiti faahou. Mai te peu râ e manaˈonaˈo noa oe i teie mau mea, i ǒ ïa oe e maemae maitai ai, a faahapa noa ˈi ia oe. Mea atâta roa teie manaˈo, e nehenehe hoi oe e faaea i te tavini ia Iehova. No reira, a tiatonu noa i mua. Tei nia tatou i te eˈa e tae atu ai i te ora i roto i te ao apî. I reira noa, “eita to mutaa iho ra mau mea e haamanaˈohia.”—Isa. 65:17; Mas. 4:25.

A HAAPAPU NOA I TO OE AAU

17. No te aha mea faufaa ia haapapu noa i to tatou aau mea here na Iehova ia tatou e ua faaore o ˈna i ta tatou mau hara?

¹⁷ Mea faufaa ia haapapu noa i to tatou aau mea here na Iehova ia tatou e ua faaore o ˈna i ta tatou mau hara. (Ioa. 1, 3:19, nota) No te aha? No te mea te imi noa ra Satani i te ravea ia feaa tatou. Aita ta ˈna fa i taui, oia hoi ia faaea tatou i te tavini ia Iehova. Papu roa ïa eita o ˈna e tuu, no te mea e taime poto to ˈna e toe ra. (Apo. 12:12) Eiaha râ tatou e vaiiho ia ˈna ia upootia!

18. Eaha te rave no te haapapu noa i to oe aau mea here na Iehova ia oe e ua faaore o ˈna i ta oe mau hara?

¹⁸ Ia papu maitai ia oe mea here na Iehova ia oe, a faaohipa ïa i te mau manaˈo faataahia i to na mua ˈtu tumu parau. No te haapapu noa i to oe aau ua faaore Iehova i ta oe mau hara, a feruri ïa i to ˈna huru. A haamanaˈo eaha ta te Bibilia e parau ra no nia i to ˈna aroha hamani maitai. Te haamanaˈo ra Iehova e taata hara oe. E turai ïa te reira ia ˈna ia faaore i ta oe mau hara. E ia faaore Iehova i te hara, e tumâ roa o ˈna. No reira, mai ia Davida tei tiaturi papu i to Iehova aroha hamani maitai, ia parau atoa oe e tia ˈi: “Mauruuru Iehova, ua faaore oe i ‘ta ˈu mau hapa, ta ˈu mau hara’!”—Sal. 32:5.