E NAFEA IA HAAPAE ROA I TE RIRI?
4 | A upootia i nia i te riri maoti te tauturu a te atua
Te parau ra te Bibilia:
“Area te mau huru maitatai ta te varua moˈa e faatupu, o te here ïa, te oaoa, te hau, te faaoromai, te hamani maitai, te maitai, te faaroo, te mǎrû, te haavîraa ia ˈna iho.”—GALATIA 5:22, 23.
Te auraa:
E nehenehe tatou e upootia i nia i te riri maoti te tauturu a te Atua. E faatupu to ˈna varua moˈa i te mau huru maitatai, aita e haere ia tatou ia faatupu atu o tatou anaˈe. No reira, no te haapae roa i te riri, mea maitai aˈe ia turui i nia i te Atua, eiaha râ i nia i to tatou iho puai. A na reira ˈi, e ite tatou i ta te aposetolo Paulo i papai: “E puai to ˈu ia faaruru i te mau mea atoa maoti tei horoa mai i te puai.” (Philipi 4:13) Hau atu, e parau atoa tatou: “No ǒ mai ta ˈu tauturu ia Iehova ra.”—Salamo 121:2.
Te faaohiparaa:
“Ua taui roa Iehova ia ˈu. Na mua ˈˈe, e taata ino roa vau, i teie nei râ, e taata hau ïa.”—WALDO
A pure ia Iehova ma te aau tae no te ani atu i to ˈna varua moˈa. (Luka 11:13) A ani ia ˈna ia tauturu ia outou ia faatupu i te mau huru maitatai ta ˈna e au ra i roto i to outou oraraa. A haapii i ta te Bibilia e parau ra no nia i te mau huru maitatai o te tauturu ia iriti ê i te riri, mai te here, te hau, te faaoromai e te haavîraa ia ˈna iho. A imi i te ravea no te faatupu i taua mau huru ra i roto i to outou oraraa. Hau atu, a amui i te feia o te tutava atoa ra i te faatupu i teie mau huru maitatai. E nehenehe ratou e tauturu ia outou, “a turai atu ai te tahi i te tahi ia faaite i te here e ia rave i te ohipa maitai roa.”—Hebera 10:24.