E ore roa te riri e a muri noa ˈtu!
Noa ˈtu e iriti ê tatou i te riri i roto i to tatou aau, eita tatou e nehenehe e tapea ia vetahi ê ia faaite i to ratou riri. Te tamau ra te taata i te mauiui no te riri o vetahi ê. Eaha ïa te nehenehe e faaore roa i te riri?
O Iehova anaˈe te nehenehe e faaore roa i te riri ta tatou e ite ra i teie mahana. Te fafau ra te Bibilia e tera iho â ta ˈna e rave.—Maseli 20:22.
E FAAORE ROA TE ATUA I TE MAU MEA ATOA E FAATUPU RA I TE RIRI
1. SATANI TE DIABOLO. O Satani, te melahi orure hau, to muri i te riri uˈana e vai ra i teie mahana. E haamou te Atua ia Satani e i te feia atoa i raro aˈe i to ˈna mana.—Salamo 37:38; Roma 16:20.
2. TE AO INO FAATEREHIA E SATANI. E haamou te Atua i te mau faanahoraa ino atoa o teie ao. Oia atoa te mau tia poritita e tia haapaoraa e turai ra ia faatupu i te riri. E haamou atoa te Atua i te faanahoraa tapihooraa nounou, oia atoa te ohipa peta e taviri taata.—Petero 2, 3:13.
3. TE HURU TIA ORE O TE TAATA. Te faataa ra te Bibilia ua roohia te taata atoa i te huru tia ore, no reira tatou e manaˈo e e rave ai i te mea ino. (Roma 5:12) No to tatou huru tia ore, e faatupu e e faaite tatou i te riri i nia ia vetahi ê. E tauturu te Atua i te taata ia upootia i nia i taua mau huru tano ore ra, a ore roa ˈtu ai te riri.—Isaia 54:13.
TE FAFAU RA TE BIBILIA I TE HOÊ AO AITA FAAHOU TE RIRI
1. E ORE ROA TE PARAU-TIA ORE. Na te Faatereraa arii a te Atua e faatere i te fenua, e faatereraa parau-tia e te mure ore haamauhia i te raˈi. (Daniela 2:44) E ore roa te hiˈo-ê-raa e te au-ore-raa. Na te Atua e faaafaro i te mau tupuraa parau-tia ore atoa ta te taata e faaruru nei.—Luka 18:7.
2. E FANAˈO TE TAATA ATOA I TE HAU. Eita te taata e mauiui faahou no te hamani-ino-raa aore ra te tamaˈi. (Salamo 46:9) E taata hau anaˈe te parahi i nia i te fenua e eita ratou e haapeapea faahou.—Salamo 72:7.
3. E FANAˈO TE TAATA I TE ORARAA MAITAI ROA E A MURI NOA ˈTU. E faaite te taata atoa i te here mau te tahi i te tahi. (Mataio 22:39) Eita te taata e ahoaho faahou e e haamanaˈo i te mau tupuraa ino ta ratou i farerei na mua ˈtu. (Isaia 65:17) I taua taime ra, eita te taata e riri faahou e e “au roa ratou i te rahi o te hau.”—Salamo 37:11.
Te tiai ru ra anei outou i te ora i roto i te hoê ao mai tera? I teie nei â, te haapii ra e rave rahi taata i te iriti ê i te riri ma te faaohipa i te mau aratairaa Bibilia. (Salamo 37:8) Tera ta e mirioni Ite no Iehova e rave ra na te ao nei. Noa ˈtu to ratou fenua e taere, te itehia ra te here e te auhoêraa i rotopu ia ratou.—Isaia 2:2-4.
E oaoa te mau Ite no Iehova i te faaite i ta ratou i haapii, o tei tauturu ia ratou ia faaoromai tamau i te parau-tia ore e te hiˈo-ê-raa. Maoti ta outou e haapii, e nehenehe outou e faaea i te faatupu i te riri e e faaite i te here. E haapii outou e nafea ia faaite i te hamani maitai i te taata, oia atoa i te feia e faaite ra i te mauruuru ore aore ra te riri. Ei faahopearaa, e oaoa ˈtu â outou e e maitai mai to outou auhoaraa e o vetahi ê. Hau atu, e haapii outou eaha te rave no te ora i raro aˈe i te Faatereraa arii a te Atua i roto i te hoê ao aita faahou te riri.—Salamo 37:29.