“Mea rahi te taata i ore i au ia ˈu”

NA MUA ˈˈE:

Ua paari au i Santiago, te oire rahi o Tireni, i te tahi vahi e mea matauhia te ohipa ino, te raau taero e te mau pǔpǔ taata hamani ino. A pae ai to ˈu matahiti, ua haapohehia to ˈu metua tane. I muri aˈe, ua faaea mama e te tahi taata ino mau. E pinepine oia i te taparahi ia matou. Tau matahiti i muri aˈe, ua haamanaˈo noa vau i te reira.

A paari noa ˈi au, ua taui to ˈu huru a riro roa ˈi ei taata ino mau. E faaroo na vau te pehe heavy metal, e inu hua na i te ava e i te tahi taime e rave atoa i te raau taero. E pinepine au i te apiti i te mau aroraa e te feia hoo raau taero i roto i te mau aroâ. E rave rahi taime to tera mau taata i te tamataraa i te haapohe ia ˈu. I te tahi mahana, ua aufau te pǔpǔ enemi i te hoê taata no te haapohe ia ˈu. Ua horo ê au, ua pepe atoa râ. I te tahi atu taime, ua tuu te hoê pǔpǔ taata hoo raau taero i te pupuhi i nia i to ˈu upoo ma te hinaaro e haapohe ia ˈu.

I 1996, ua here mau vau i te tahi vahine o Carolina te iˈoa e i 1998, ua faaipoipo ia ˈna. No to ˈu huru ino mau, a fanau ai ta maua tamarii matamua, ua riaria vau i te hamani ino i to ˈu utuafare a riro atu ai mai te tane apî a to ˈu metua vahine. Ua haere au i te tahi pu e tauturu ra i te taata ia ora e vetahi ê. Ua rapaauhia vau e te taote e ua rave i te raau, aita râ i apî mai. E pinepine au i te riri hanoa no te mau mea iti haihai; eita ta ˈu e nehenehe e haavî ia ˈu. Ma te hape, ua opua vau i te haapohe ia ˈu ia ore to ˈu utuafare ia mauiui faahou. Auaˈe, aita te reira i manuïa.

E rave rahi matahiti, ua farii au e aita te Atua e vai mau ra noa ˈtu e ua hinaaro noa na vau e tiaturi atu. No reira, i apiti na vau i te tahi taime i te hoê haapaoraa. Ta ˈu râ vahine, ua haapii ïa i te Bibilia e te mau Ite no Iehova. Mea au ore roa na ˈu ia ratou, e pinepine au i te parau faufau atu. Ua maere au e e vai hau noa ratou.

I te tahi mahana, ua ani mai Carolina ia taio i te Salamo 83:18 i roto i ta ˈu Bibilia. Te faaite maitai ra tera irava e o Iehova te iˈoa o te Atua. Ua huru ê au a taa ˈi e ua haapii mai ta ˈu haapaoraa no nia i te hoê atua eiaha râ no nia ia Iehova. I 2000, ua haamata vau i te haapii i te Bibilia e te mau Ite no Iehova.

UA TAUI TE BIBILIA I TO ˈU ORARAA:

I muri aˈe, ua itea ia ˈu i te tamahanahanaraa a haapii ai e e Atua aroha rahi Iehova e te faaore i te hapa. Te faaite ra iho â te Bibilia i roto i te Exodo 34:6, 7: “O Iehova, e Atua aroha noa, e te hamani maitai rahi, e te faaoromai rahi, e te maitai rahi, e te parau mau; e te vaiiho maite i te aroha e tausani noa ˈtu te ui; e te faaore i te parau-tia ore, e te hara, e te ino.”

E ere râ i te mea ohie ia faaohipa i ta ˈu e haapii ra. Ua manaˈo na vau e eita roa ta ˈu e nehenehe e haavî i to ˈu huru ino. I te taime fifi, ma te here, e faaitoito mai Carolina. E haamanaˈo mai oia e te ite ra Iehova i ta ˈu mau tutavaraa. No te turu o ta ˈu vahine, ua itoitohia vau i te rave noa i ta Iehova e au noa ˈtu e i manaˈo na vau e eita vau e taui.

I te tahi mahana, ua ani mai te taeae e haapii ra ia ˈu, Alejandro, ia taio i te Galatia 5:22, 23. Te faaite ra tera na irava e o ‘te here, te oaoa, te hau, te faaoromai, te mǎrû, te maitai, te faaroo. Te mamahu, te hitahita ore’ te hotu o te varua moˈa o te Atua. Ua faataa mai Alejandro e eita e tia ia ˈu ia faatupu i tera mau huru maitatai ma to ˈu noa puai ma te turu râ o te varua moˈa o te Atua. Ua taui roa vau a taa ˈi i tera parau mau!

I muri aˈe, ua haere au i te tahi tairururaa rahi a te mau Ite no Iehova. Ua ite au i te naho, te hoê vahi mâ e te auhoêraa. Na te reira i haapapu mai e ua itea ia ˈu i te haapaoraa mau. (Ioane 13:34, 35) Ua bapetizohia vau i Fepuare 2001.

TO ˈU FAUFAARAAHIA:

Ua taui roa Iehova ia ˈu. Na mua ˈˈe, e taata ino roa, i teie nei, e taata hau. No ˈu, e au e ua huti mai Iehova ia ˈu mai roto mai i te vari. Mea rahi te taata i ore i au ia ˈu, aita vau e faahapa ˈtura. I teie nei râ, ma te hau, te oaoa nei au i te tavini ia Iehova e ta ˈu vahine e ta maua na tamaroa e piti.

Ua maere roa to ˈu fetii e hoa e ua taui au. E rave rahi o ratou tei hinaaro e haapii i te parau mau no roto mai i te Bibilia. Te mauruuru nei au i te fanaˈoraa taa ê e tauturu ia vetahi ê ia ite o vai Iehova. Auê te oaoa ia taui te parau mau i te oraraa o te taata!