AAMU
Ua tuu vau ia Iehova na mua roa i roto i ta ˈu mau faaotiraa atoa
I TE hoê poipoi i 1984, te haere ra vau i te ohipa. Te feruriruri ra vau i te hoê tumu parau ta ˈu i taio i roto i Te Pare Tiairaa no nia i ta te feia tapiri e manaˈo ra no nia ia tatou. Hiˈo aˈera râ vau i te mau fare ati aˈe i to ˈu nohoraa e feruri atura vau eaha te manaˈo o te feia tapiri no nia ia ˈu. Te hiˈo ra anei ratou ia ˈu mai te hoê taata rahi i te fare moni? Aore ra mai te hoê tavini a te Atua o te ohipa ra i te fare moni no te aupuru i to ˈna utuafare? Taa ˈtura ia ˈu e tauiraa te titauhia ia ˈu ia rave.
Ua fanauhia vau i te 19 no Me 1940 i te oire o Amioun i Lebanona. Tau matahiti i muri aˈe, ua haere matou e ora i te oire no Tripoli. E utuafare oaoa matou o te haamori ra ia Iehova. E pae matou tamarii, e toru tamahine e e piti tamaroa, o vau te hopea. E ere te moni te mea faufaa roa ˈˈe i roto i to matou oraraa, o te haapiiraa râ i te Bibilia, te mau putuputuraa e te pororaa.
I roto i ta matou amuiraa, mea rahi te Kerisetiano faatavaihia. O Michel Aboud hoê, na ˈna i faatere i ta matou haapiiraa buka. Ua ite o ˈna i te parau mau i New York e haamata ˈtura o ˈna i te ohipa pororaa i Lebanona i 1921. Te haamanaˈo ra vau i to ˈna hamani maitai i nia ia Anne e ia Gwen Beavor, e piti piahi no te Haapiiraa no Gileada. Ua riro mai ratou ei hoa piri no matou. E rave rahi matahiti i muri aˈe, ua farerei au ia Anne i Marite. E i muri aˈe, farerei atura vau ia Gwen e ta ˈna tane o Wilfred Gooch e te tavini ra raua i te Betela no Beretane.
TE PORORAA I LEBANONA
I to ˈu apîraa, aita i rahi te Ite no Iehova i Lebanona. Mea au roa râ na matou e haapii i te Bibilia i te taata noa ˈtu te patoiraa a te tahi mau tia haapaoraa. E faatia ˈtu vau i te tahi mau tupuraa.
I te hoê mahana, te poro ra mâua to ˈu tuahine o Sana i roto i te hoê fare tahua. Faura mai nei te hoê tia haapaoraa e tuhi mai nei i to ˈu tuahine. Turai atura o ˈna ia Sana i raro i te eˈa paumaraa e pepe atura o ˈna. Niuniu atura te hoê taata i te mutoi. Tae mai nei ratou e tauturu atura ia Sana. I to te mau mutoi raveraa i te tia haapaoraa, ite atura ratou e pupuhi to nia ia ˈna e afaihia ˈtura o ˈna. Na ô atura te mutoi rahi i te tia haapaoraa: “E taata no te Atua iho â oe? Aore ra e taata ohipa ino?”
I te tahi mahana ê, ua tarahu te amuiraa i te hoê pereoo mataeinaa no te haere e poro i te hoê vahi atea. Mea au maitai ta matou pororaa. Ua faaroo râ te aratai haapaoraa o tera vahi te haere mai ra matou e poro, haaputuputu ihora o ˈna i te hoê pǔpǔ taata. Haere maira ratou e imi peapea ia matou e pehi maira ia matou i te ofai. Ua pepe maitai to ˈu papa! Aratai atura to ˈu mama ia ˈna i pihai iho i te pereoo mataeinaa e pee atoa ˈtura matou ia raua. Te haamanaˈo ra vau i ta mama i parau a horoi noa ˈi i te toto i nia i te hohoˈa o papa: “E Iehova, a faaore i ta ratou hara, aita hoi ratou i ite i ta ratou e rave nei.”
Teie te tahi atu tupuraa. I to matou haereraa e farerei i to matou papa ruau, e tia haapaoraa tei to ˈna fare. Ua ite o ˈna e Ite no Iehova to ˈu na metua. Ua paraparau mai o ˈna ia ˈu, e ono matahiti noa to ˈu i tera taime. Ui mai nei o ˈna ia ˈu: “No te aha oe i ore i bapetizohia?” Pahono atura vau e tamarii noa â vau e e titauhia ia ˈu ia haapii atu â i te Bibilia e ia faatupu i te faaroo puai. Aita roa ˈtu o ˈna i au i ta ˈu pahonoraa e parau atura o ˈna i to ˈu papa ruau e tamarii faatura ore roa vau.
E ere râ tera mau tupuraa i te mea pinepine roa, e feia farii maitai hoi te taata no Lebanona. Mea rahi ïa tei hinaaro e ite hau atu â no nia i te Bibilia e mea rahi te haapiiraa ta matou i faatere.
TO MATOU HAERERAA E ORA I TE TAHI FENUA Ê
Ua ratere mai te hoê taeae no Vénézuéla i Lebanona. Ua haere mai o ˈna i roto i ta matou amuiraa e haamatau atura i to ˈu tuahine o Wafa. I muri iho, faaipoipo atura raua e reva ˈtura e faaea i Vénézuéla. Ua mihi noa Wafa ia matou i ǒ. Taparu atura o ˈna ia papa i roto i ta ˈna mau rata ia haere e ora i ǒ e tera iho â ta matou i rave.
Ua tae matou i Vénézuéla i 1953 e faaea ˈtura matou i Caracas i pihai iho i te nohoraa o te peretiteni. Mea au roa na ˈu ia ite i te peretiteni ia tere mai na mua i to matou fare. Ua riro râ teie tauiraa ei mea fifi no to ˈu na metua no te mea mea taa ê te fenua, te reo, te mau peu e te maa. Aita raua i matau roa ˈtura i teie oraraa apî, tupu mai nei te tahi ati.
Mai te pae aui e tae atu i te pae atau: To ˈu papa. To ˈu mama. O vau i 1953 i to matou haereraa e ora i Vénézuéla
UA ROOHIA TO MATOU UTUAFARE I TE ATI
Ua maˈihia to ˈu papa. Ua maere roa matou aita hoi o ˈna i maˈihia aˈenei mai tera. I te hiˈopoaraahia o ˈna, itehia mai nei e mariri ai taata to ˈna. Ua tâpûhia o ˈna e hoê hebedoma i muri aˈe, ua pohe o ˈna.
E 13 matahiti noa to ˈu i tera taime. E tupuraa mauiui mau ta matou i faaruru, ua oti roa matou, o mama iho â râ. Ua moˈemoˈe roa o ˈna aita faahou o papa. Ua tauturu rahi râ Iehova ia matou ia faaruru i teie ati. I te 16raa o to ˈu matahiti, ua oti ta ˈu tau haapiiraa tuarua e ua hinaaro vau e rave i te ohipa no te tauturu i to ˈu utuafare.
Ua tauturu mai te hiˈoraa o Sana e ta ˈna tane o Rubén ia ˈu ia faafatata ˈtu â ia Iehova
I tera atoa taime, ua faaipoipo Sana e te hoê taeae tei haere i te Haapiiraa no Gileada e tei hoˈi mai i Vénézuéla. O Rubén Araujo to ˈna iˈoa. I muri aˈe, ua haere raua e ora i New York. Ua faaoti to ˈu utuafare e haere au i te haapiiraa teitei. Ua haere ïa vau i New York e ua faaea vau i ǒ raua. Ua tauturu mai to raua hiˈoraa ia ˈu ia faafatata ˈtu â ia Iehova. Hau atu â, mea rahi te taeae paari i te pae varua i roto i ta matou amuiraa reo Paniora i Brooklyn. O Milton Henschel raua Frederick Franz e piti o ratou. Tei te Betela i Brooklyn raua i tera ra tau.
Ua bapetizohia vau i 1957
A fatata ˈi ta ˈu matahiti haapiiraa matamua i te hope, ua feruri au i to ˈu oraraa. Ua taio vau i te tahi mau tumu parau i roto i Te Pare Tiairaa no nia i te mau fa ta te tahi mau Kerisetiano i haamau no te tavini hau atu â ia Iehova. I roto i ta matou amuiraa, ua ite au i te oaoa o te mau pionie e te mau taeae no te Betela e ua hinaaro vau e oaoa atoa mai ia ratou. Tera râ, aita vau i bapetizohia ˈtura. I reira to ˈu iteraa i te faufaaraa mau ia pûpû i to ˈu ora ia Iehova e i te 30 no Mati 1957, ua bapetizohia vau.
TE MAU FAAOTIRAA RAHI TA ˈU I RAVE
I muri aˈe, ua hinaaro vau e riro ei pionie. Ua taa râ ia ˈu eita teie faaotiraa e riro ei mea ohie no te mea eita ta ˈu taviniraa e tuati i ta ˈu mau hora haapiiraa. Hapono atura vau i te rata i to ˈu utuafare no te faaite e faaea vau i te haapiiraa, e hoˈi au i Vénézuéla no te tavini ei pionie.
Ua hoˈi au i Caracas i Tiunu 1957. I reira to ˈu iteraa mea fifi te oraraa o to ˈu utuafare. Ua titauhia ia ˈu ia tauturu ia ratou. Ua itehia mai ia ˈu te tahi ohipa i te fare moni. Ua rave atoa râ vau i te taviniraa pionie, tera hoi te tumu vau i hoˈi mai ai. I ohipa na vau taime taatoa i te fare moni a tavini noa ˈi ei pionie. Noa ˈtu mea ohipa roa vau, mea oaoa to ˈu oraraa!
Ua rahi atu â to ˈu oaoa i to ˈu faaipoiporaa ia Sylvia, te hoê tuahine no Heremani. Ua haere mai o ˈna e to ˈna na metua e faaea i Vénézuéla. Ua fanau mai mâua i ta mâua tamaiti o Michel (Mike) e ta mâua tamahine o Samira. I te mea ua paari to ˈu mama, ua haere mai o ˈna e ora ia matou ra. Ua vaiiho ïa vau i ta ˈu taviniraa pionie no te haapao i to ˈu utuafare. Ua tapea noa râ vau i te hoê feruriraa pionie. E rave mâua Sylvia i te taviniraa pionie tauturu i te mau taime atoa e nehenehe ai mâua e na reira.
TE TAHI ATU TAUIRAA RAHI
E hoˈi mai tatou i tera poipoi i 1984 ta ˈu i faahiti atu i te omuaraa. I tera taime, te haere noa ra ta ˈu tamarii i te haapiiraa e e oraraa fanaˈo to matou. Mea faaturahia vau i te mau fare moni, ua hinaaro râ vau ia hiˈo mai te taata ia ˈu ei tavini na Iehova. Tauaparau atura mâua ta ˈu vahine no te mau tauiraa ta mâua e rave. Ia faaea vau i ta ˈu ohipa i te fare moni, e aufauhia mai te hoê tino moni rahi. E navai roa tera moni no te ora.
Noa ˈtu e ere i te mea ohie, ua turu mai ta ˈu vahine e to ˈu mama i tera faaotiraa. Rave faahou atura vau i te taviniraa pionie. Auê te oaoa! Tae mai nei râ te hoê ô manaˈo-ore-hia.
TE HOÊ Ô MANAˈO-ORE-HIA
Mâua e ta mâua hopea o Gabriel
Ua parau mai te taote ua hapû Sylvia. Auê ïa parau oaoa! Ua feruri râ vau i ta ˈu taviniraa. Titauhia ˈtura ia rave faahou i te mau faatanoraa i roto i to matou oraraa.
Hiˈopoa faahou atura mâua i ta mâua fa e faaoti atura e rave mai ta mâua iho â i opua. Ua fanauhia Gabriel i Eperera 1985. Noa ˈtu râ, ua faarue iho â vau i ta ˈu ohipa e ua rave i te taviniraa pionie i te avaˈe Tiunu. I muri aˈe, ua riro mai au ei mero o te Tomite amaa. E 80 kilometera te atea o te amaa ia Caracas, e tere vau i ǒ e piti aore ra toru mahana i te hebedoma.
UA FAARUE MATOU IA CARACAS
Tei La Victoria te amaa, ua faaoti ïa matou e haere e faaea i ǒ no te tapiri atu i te Betela. E faaotiraa rahi teie ta matou i rave. Na to ˈu tuahine o Baha i haapao i to matou mama. Ua faaipoipohia o Mike, tei pihai iho noa ra râ o Samira raua Gabriel ia mâua. Te auraa, eita raua e ite faahou i to raua mau hoa i Caracas. Ua titauhia ia haamatau Sylvia i te huru oraraa i roto i te hoê oire iti. Ua faahiahia roa vau i to ratou huru feruriraa, ua turu rahi hoi ratou ia ˈu.
Ua taui faahou râ to matou oraraa. Ua faaipoipohia o Gabriel e ua faarue Samira i te fare. I 2007, ua riro mâua Sylvia ei mero o te utuafare o te Betela e tae roa mai i teie mahana. E matahiapo o Mike i teie nei e te tavini ra raua ta ˈna vahine o Monica ei pionie. E matahiapo atoa o Gabriel e te tavini ra raua ta ˈna vahine o Ambra i Italia. E pionie Samira e te ohipa atoa ra o ˈna no te Betela.
Mai te pae aui e tae atu i te pae atau: Mâua Sylvia, i te amaa no Vénézuéla. Ta mâua matahiapo o Mike e ta ˈna vahine o Monica. Ta mâua tamahine o Samira. Ta mâua tamaiti o Gabriel e ta ˈna vahine o Ambra
E TAPITI FAAHOU VAU!
E faaotiraa rahi ta ˈu i rave i roto i to ˈu oraraa e aita roa ˈtu vau e tatarahapa nei. Ahani e titau-faahou-hia mai ia rave i te faaotiraa mai ta ˈu i rave i te roaraa o to ˈu oraraa, e tapiti faahou vau! Ua oaoa mau vau i te mau mea atoa ta ˈu i rave i roto i te taviniraa ia Iehova. I te roaraa o te mau matahiti, ua ite mau vau i te faufaaraa ia vai piri noa ia Iehova. I roto i te mau faaotiraa atoa te titauhia ia tatou ia rave, e nehenehe o ˈna e horoa i te hau o “tei hau ê i te mau manaˈo atoa.” (Phil. 4:6, 7) Te oaoa nei mâua Sylvia i roto i ta mâua taviniraa i te Betela e ua haamaitai mau Iehova i te mau faaotiraa atoa ta mâua i rave no te mea ua tuu noa mâua ia Iehova na mua roa i roto i to mâua oraraa.