A faaohipa maitai i to oe taime i roto i te taviniraa
I te matahiti taviniraa 2014, ua faataa te mau Ite no Iehova 1 945 487 604 hora i roto i te taviniraa. Te auraa ïa e ua faaoti papu tatou i te ohipa maitai i roto i ta Iehova taviniraa! (Sal. 110:3; Kor. 1, 15:58) I te mea e “te poto nei te taime,” e nehenehe anei e faaohipa maitai aˈe i to tatou taime faufaa mau i roto i te taviniraa no te farerei hau atu â taata?—Kor. 1, 7:29.
E titauhia ia faatano i ta tatou porotarama no te faaohipa maitai i to tatou taime. Ei hiˈoraa, eaha te rave ia faataa tamau oe hoê hora aore ra hau atu i roto i te hoê tuhaa taa maitai o te taviniraa ma te ore e paraparau i te hoê noa ˈˈe taata? E nehenehe anei oe e rave i te tahi mau faatanoraa no te farerei e no te paraparau i e rave rahi atu â taata? Mea taa ê te hoê vahi i te tahi atu. Teie râ, e tauturu to muri nei mau manaˈo ia oe ia faaohipa maitai aˈe i to oe taime no te ore e “moto i te mataˈi.”—Kor. 1, 9:26.
Pororaa i tera e tera fare: Ua matau te feia poro i te haamata i ta ratou taviniraa ma te poro i tera e tera fare. I te mea râ e mea rahi te taata te rave nei i te ohipa, no te aha e ore ai e tamata i te na reira i te ahiahi? Tei te fare ïa te rahiraa o te taata e mea mǎrû aˈe ratou. I te roaraa o te mahana, e nehenehe tatou e fanaˈo i te mau faahopearaa maitai aˈe a poro ai na te mau aroâ aore ra i te mau vahi tapihooraa.
Pororaa i te vahi taata: E tuuhia te mau iri vairaa papai e vairaa papai afaifai i te mau vahi mea rahi te taata te hahaere e i roto noa iho â i te tuhaa fenua a te amuiraa. (A hiˈo i Ta tatou taviniraa i te Basileia no Tiurai 2013, api 5.) Ia iti mai te taata te na reira i te haere, e faaoti paha te tomite tiaauraa a te amuiraa i te afai i te reira i te tahi atu vahi mea rahi aˈe te taata.
Farerei-faahou-raa e haapiiraa Bibilia: E nehenehe anei oe e rave i te mau farerei-faahou-raa e i te mau haapiiraa Bibilia mea iti anaˈe te taata te farereihia i roto i te tahi atu mau tuhaa o te taviniraa? Ei hiˈoraa, mea rahi anei te taata te farereihia i tera e tera fare i te Mahana maa poipoi? E nehenehe paha ïa oe e faatere i ta oe haapiiraa Bibilia i te avatea aore ra i te ahiahi. E nehenehe anei te feia poro e haere e hiˈo i ta ratou mau piahi o te faaea ra i roto i te hoê â tuhaa fenua i te hoê taime taa maitai no te poro rahi atu â?
E tapao iho â ïa tatou i te taime ta tatou e rave ra a poro ai. E oaoa ˈtu â râ tatou a ite ai i te mau faahopearaa maitai. Ia taa ia oe e mea iti te taata te farereihia i te hoê taime taa maitai, a tamata i te tahi atu tuhaa o te taviniraa. A pure ia Iehova, te “Fatu o te ohipa,” no te aratai ia oe ia faaohipa maitai i to oe taime i roto i te taviniraa!—Mat. 9:38.