Te tahi ravea maitai no te poro
1. No te aha te tumu parau “Te tahi tauaparauraa e te hoê Ite no Iehova” i faaineinehia ˈi?
1 I roto i Te Pare Tiairaa no te taatoaraa, i te tahi taime, e itehia te tumu parau “Te tahi tauaparauraa e te hoê Ite no Iehova.” No te aha te reira? Na mua, no te faaite i te mau haapiiraa Bibilia ma te anaanatae. Te piti, ia ite tatou e nafea ia haaferuri ma te aravihi i nia i te tahi mau tumu parau. (Pet. 1, 3:15) E nafea e faaohipa maitai ai i te reira?
2. E nafea e faaohipa ˈi i tera tumu parau i roto i te taviniraa?
2 A faaohipa i roto i te taviniraa: Te vai ra anaˈe te tumu parau “Te tahi tauaparauraa e te hoê Ite no Iehova” i roto i Te Pare Tiairaa, mea au ia faaherehere i te tahi no te taviniraa. Ua faahiti anei te tahi taata fare e piahi Bibilia i te uiraa aore ra patoiraa i hiˈopoa-aˈena-hia i roto? Mai te peu e e, a horoa ˈtu i Te Pare Tiairaa e a tauaparau i nia i te reira. Aita faahou anaˈe te vea neneihia, e nehenehe e rave mai i nia jw.org.
3. E nafea ia hiˈopoa i te tahi o tera tumu parau e vetahi ê?
3 E nafea ia hiˈopoa i te tahi o tera tumu parau e vetahi ê? Ua anihia te tahi ia taio i ta te taata fare e parau, e i te tahi atu, ta te Ite no Iehova e pahono. E ravea maitai tera! Eita te taata e huru ê i te mea e na ratou iho e hiˈopoa i ta tatou mau tiaturiraa.—Deut. 32:2.
4. E nafea tera tumu parau e tauturu mai ai ia faaineine no te poro?
4 A faaineine ia oe iho e ia vetahi ê: A taio ai i tera tumu parau, a uiui: Eaha te mau irava e faahohoˈaraa i faaohipahia? Eaha tei papaihia no te haaferuri i te taata? No te tamahanahana, faaitoito e aˈo anei tera tumu parau? Ma te pahono i tera mau uiraa e ite ai oe e nafea ia haafaufaa i tera tumu parau no te poro. (Mas. 1:5; 9:9) Ua parau te tahi tuahine: “Ia taio oe i tera tumu parau, e au e te poro ra oe e te hoê pionie ‘aravihi mau,’ o tei ite hoi eaha te parau i roto i te mau tupuraa ˈtoa!”
5. E nafea tera tumu parau e tauturu mai ai ia faaineine i te piahi no te poro?
5 E nehenehe atoa e faaohipa i tera tumu parau no te tauturu i te piahi ia faaineine no te poro. A taio ai orua i te reira, a vaiiho ia ˈna ia hauti i te tuhaa a te taata poro. Ma te na reira, e ite ïa te piahi e nafea ia faaite i ta ˈna mau tiaturiraa ma te mǎrû e te au. (Kol. 4:6) Ua riro mau tera tumu parau ei ravea e tauturu mai ai Iehova ia “rave faahope roa” i ta tatou taviniraa.—Tim. 2, 4:5.