Te faaohipa ra anei oe i te mau tuhaa atoa?
1 “Te hinaaro ru nei au e faaohipa i te reira i roto i te taviniraa!” Tera ïa ta te hoê tuahine i papai i muri iho i te taioraa i te Tour de Garde o te 1 no Tenuare 2008. Ua hiˈopoa anei oe vetahi mau tuhaa tamau o te neneiraa no te taatoaraa, e ua itea anei ia oe te ravea no te faaohipa maitai i te reira i roto i ta oe taviniraa?
2 “Ta Iesu e haapii maira”: Peneiaˈe ua tauturu te reira tuhaa ia oe ia haamata i te mau haapiiraa bibilia. Mai te peu e aitâ, a tamata i te taio i te upoo parau o te tumu parau i te fatu fare e a huti i to ˈna ara-maite-raa i nia i ta Iesu i parau no nia i te reira, mai tei faahitihia i te paratarafa matamua. Ia anaanatae mai te taata i taua taime ra, a tutava ïa i te tamau â i te aparauraa ma te faaohipa i te mau upoo parau iti, o tei faataahia ei uiraa haaferuri. A ani i te taata ia faataa mai i te uiraa. A faataa poto i te mau hohoˈa, e a haere i nia i to muri iho paratarafa. E nehenehe ïa ta oe e paraparau i nia i te afaraa o te tumu parau i te farereiraa matamua e e tauaparau i te hopearaa ia hoˈi faahou oe. A faaineine ia oe no te faahaere i te haapiiraa i nia i te buka Bibilia haapii.
3 “Ravea faufaa e oaoa ˈi te utuafare”: Te fa o teie anairaa tumu parau, o te matara mai i te mau toru avaˈe atoa, o te tautururaa ïa i te mau tane e vahine faaipoipo e te mau metua ia ite e nafea ia faaohipa i te mau faaueraa tumu bibilia ia haapeapea te mau fifi i te hau o te utuafare. E nehenehe atoa oe e faaohipa i tera mau tumu parau no te tauturu i te feia e ere i te Ite ia ite i te paari i roto i te Bibilia.—Tim. 2, 3:16, 17.
4 Tumu parau no te feia apî: Te anairaa tumu parau “No to tatou feia apî,” mai te hoê ïa aparauraa o te horoa ra i te hoê ravea no te feruri i te aamu bibilia e o te nehenehe e faaohipahia no te faahohonu i te tahi. E nehenehe ta oe e faaohipa i teie mau tumu parau no te tauturu i te feia apî ta oe e farerei i roto i ta oe taviniraa ia ite i te faufaaraa mau o te haapiiraa i te Parau a te Atua. (Sal. 119:9, 105) Ia tauaparau oe e te mau metua, e haamahitihiti paha oe i te anairaa tumu parau “A haapii i ta oe mau tamarii,” o te matara mai i te mau piti avaˈe atoa. E nehenehe teie mau tumu parau e tauturu i te mau tamarii apî ia apo mai i te mau haapiiraa faufaa no ǒ mai i te mau taata o te Bibilia. Ua rave anei oe i te taime no te taio i teie mau tumu parau e ta oe mau tamarii?
5 Te tahi atu tumu parau: I te mau avaˈe atoa, e hiˈopoa te tuhaa “Uiraa a te feia taio” i te hoê uiraa te faahitihia paha e te hoê taata e ere i te Ite. E nehenehe ta oe e haamahitihiti i teie tumu parau ia pûpû oe i te mau vea i tera i tera fare. E faatiaraa a te hoê taata te tuhaa “Te hoê rata no . . .” o te faaite ra i te mau fifi ta te mau mitionare e vetahi atu e faaû ra a rave ai ratou i ta ratou taviniraa. E tauturu teie mau tumu parau i te mau taata e anaanatae ra ia ite e te porohia ra te parau apî maitai e ati aˈe te ao nei, ei faatupuraa i te tapao o te vairaa mai o te Mesia.—Mat. 24:3, 14.
6 E nehenehe te tuhaa taavaˈe “E haafatata ˈtu i te Atua,” niuhia i nia i te taioraa bibilia no te Haapiiraa o te taviniraa teotaratia, e turai i te hoê taata aau haavare ore ia hinaaro e haapii hau atu â no nia ia Iehova. Ua faataahia te anairaa tumu parau “A pee i to ratou faaroo,” o te matara mai e maha taime i te matahiti, no te tauturu i te taata ia faahohoˈa i te mau aamu bibilia, ia faaoraora i te mau taata o te Bibilia—ta ratou mau maitiraa, to ratou mau fifi, to ratou faaroo—no te feia taio no teie tau.
7 Auê tatou i te oaoa e te fanaˈo ra tatou i te mau avaˈe atoa i te Tour de Garde i roto i to ˈna taatoaraa, tei faataahia no te taviniraa! Ia ite e ia faaohipa maitai ïa tatou i tei papaihia i roto ia poro tatou.