Tumu parau apî no te haamata i te haapiiraa Bibilia
1. Eaha te tumu parau apî i roto i ta tatou Pare Tiairaa, e e tauturu mai te reira ia aha?
1 “Ta te Parau a te Atua e haapii maira.” O te tumu parau apî ïa i roto i Te Pare Tiairaa o te avaˈe i mua o te tauturu mai ia haamata i te haapiiraa Bibilia. E oaoa te taata i te taio i te mau tumu parau o teie anairaa. Ia faaohipahia râ te reira no te tauaparau.
2. Eaha to te reira mau tuhaa taa ê?
2 Tuhaa taa ê: E uiraa te upoo parau e upoo parau iti te faaohipahia paha ei aparauraa. Aita e irava papaihia. Ua horoahia te mau irava ia haapii te taata i roto roa i te Parau a te Atua. Mea poto te mau paratarafa ia nehenehe e hiˈopoa-roa-hia ˈtu i te pae opani. E faahiti te mau tumu parau atoa i te buka Bibilia haapii ia faahoro oe i te haapiiraa i nia i tera papai i te taime au.
3. E nafea ia faaohipa i te reira i tera e tera fare no te haamata roa ˈtu i te haapiiraa?
3 E nafea ia faaohipa? A pûpû ai i te mau vea, e tuu paha oe i te hoê uiraa e huti i te ara-maite-raa i nia i te tumu parau. Ei hiˈoraa, tei nia te numera o te 1 no Tenuare i te faufaaraa o te Bibilia. A ui ïa: “No oe, o te Parau a te Atua anei te Bibilia aore ra e buka maitai noa? [A vaiiho i te taata ia pahono.] E manaˈo anaanatae ta ˈu i ite mai.” A faaite i te uiraa matamua, a taio i to te reira paratarafa, e a hiˈo i te irava horoahia. A taio faahou i te uiraa, e a ani i to te taata manaˈo. Ia nehenehe, a hiˈopoa hau atu â ma te faaohipa i te mau uiraa. Hou a vaiiho ai ia ˈna, a faaite i to muri iho uiraa e a faanaho no te hoˈi mai e aparau. Ia na reirahia i te mau hebedoma atoa e tae roa mai ai to muri iho numera. Aore ra, a pûpû roa ˈtu i te haapiiraa Bibilia ma te faaohipa i te tumu parau no te faaite i to ˈna tereraa.
4. E nafea ia faaohipa i teie tumu parau i te mau farerei-faahou-raa?
4 Mea maitai atoa ia faaohipa i te reira e ta tatou mau opereraa vea e farerei-faahou-raa. A parau noa ˈtu ïa: “E tumu parau apî to roto i Te Pare Tiairaa. A hiˈo na e nafea ia faaohipa.” Ta matou e hinaaro, ia noaa ïa i te taata e rave rahi roa te “ite i te parau mau.”—Tim. 1, 2:4.