Mea puai rahi te Parau a te Atua
1. Eaha te manaˈo tumu o te mahana tairururaa taa ê o te matahiti taviniraa 2014?
1 Mea taa ê roa te Bibilia i te mau mea atoa no ǒ mai i te taata. E taui hoi te Parau a te Atua ia tatou ma te faaau i te manaˈo e haerea i to Iehova hinaaro. Mai te aha te puai o te Parau a te Atua? E nafea te reira e ohipa ˈi i roto i to tatou oraraa? E nafea ia faaohipa maitai atu â i te reira no te tauturu ia vetahi ê? Mea papu e e itoitohia te taatoaraa i te hiˈopoahia i te mahana tairururaa taa ê o te matahiti taviniraa 2014. Teie hoi te manaˈo tumu “Mea puai rahi te Parau a te Atua” no roto mai i te Hebera 4:12.
2. E faaroo tatou i te mau pahonoraa o teihea mau uiraa?
2 A pahono i teie mau uiraa: A faaroo noa ˈi i te porotarama, a tapao i te mau pahonoraa o te mau uiraa i muri nei.
• No te aha e mea tia ˈi ia tiaturi i te Parau a te Atua? (Sal. 29:4)
• E nafea ia vaiiho i te puai o te Parau a te Atua ia ohipa i roto i to tatou oraraa? (Sal. 34:8)
• E nafea ia vaiiho i te puai o te Parau a te Atua ia ohipa i roto i ta oe taviniraa? (Tim. 2, 3:16, 17)
• E nafea e ore ai e hema i te puai haavarevare o te ao a Satani? (Ioa. 1, 5:19)
• Ei taurearea, e nafea oe e oaoa ˈi? (Ier. 17:7)
• Ia paruparu tatou, e nafea ia puai noa? (Kor. 2, 12:10)
• Noa ˈtu te haerea e te peu ino na mua ˈˈe, ia aha tatou no te taui noa? (Eph. 4:23)
3. Taa ê atu i te faarooraa i te porotarama, e nafea ˈtu â tatou e faufaahia ˈi i te mahana tairururaa taa ê?
3 E faufaa-mau-hia tatou ia faaroo i te haapiihia mai! Mai te tairururaa haaati e mataeinaa, i te mahana tairururaa taa ê, e nehenehe tatou e faahoa i te mau taeae e tuahine no te tahi atu amuiraa a oaoa ˈtu ai e ratou. (Sal. 133:1-3; Kor. 2, 6:11-13) E rave anaˈe ïa i te taime no te farerei i ta tatou i matau ê na a faahoa ˈtu ai i te mea apî. Mai te peu e e oreroraa parau ta te tiaau mataeinaa aore ra ta te taeae no te Betela, a farii maitai ia ˈna e ta ˈna vahine! Ua rau ïa te tumu e tiai ru ai tatou i te mahana tairururaa taa ê, e ere anei?