E rave faahope roa i te taviniraa
1. Eaha te hiˈoraa maitai ta te aposetolo Paulo i vaiiho mai i roto i te taviniraa?
1 “E rave faahope roa i to toroa [aore ra taviniraa].” (Tim. 2, 4:5) E mea tano na Paulo e horoa i teie aˈoraa ia Timoteo. Mai i 47 e tae atu i 56, ua faahope roa Paulo i to ˈna na tere mitionare e toru. Ua faahiti pinepine te buka Ohipa ia Paulo e “faaite ra i te parau.” (Ohi. 23:11; 28:23) E nafea tatou e na reira ˈi i teie mahana?
2. I tera e tera fare, e nafea tatou ia rave faahope roa i ta tatou taviniraa?
2 I tera fare e tera fare: Ia farerei tatou i te mau taata fare i ore i faaroo atura i te parau apî maitai, e titauhia ia poro i te tahi atu taime. Tei te fare paha te taata i te ahiahi aore ra i te hopea hebedoma. Aita anaˈe e taata i te fare, e tutava tatou i te hoˈi atu e farerei ia porohia iho â te taata atoa. E aita anaˈe iho â ratou i te fare? Mea maitai aˈe paha ïa ia papai i te hoê rata aore ra ia niuniu atu.
3. E nafea tatou e poro ai i te vahi taata e ma te faanaho-ore-hia?
3 I te vahi taata e ma te faanaho-ore-hia: Te faaite nei te mau tavini a Iehova i “te paari [mau]” i te feia atoa e faaroo. I te tahi taime, e na reira ratou “i te mau aroâ” aore ra “i te mau vahi taata.” (Mas. 1:20, 21) A rave noa ˈi tatou i ta tatou ohipa o te mau mahana atoa, te manaˈo ra anei tatou i te poro? E nehenehe anei e parau e ua itoito roa tatou i te pororaa? (Ohi. 18:5) Mai te peu e e, te haapao nei ïa tatou i ta tatou hopoia e “faaite hua ˈtu i te evanelia.”—Ohi. 10:42; 17:17; 20:20, 21, 24.
4. E nafea te pure e te feruriruriraa e tauturu ai ia tatou ia poro?
4 I te tahi râ taime, e taiâ tatou ia poro no to tatou iho mau paruparu aore ra mamahu. Mea papu e te taa ra Iehova i to tatou mau taotiaraa. (Sal. 103:14) I tera mau taime, e nehenehe e pure ia ˈna ia faaitoito ia tatou ia poro. (Ohi. 4:29, 31) A rave ai tatou i ta tatou iho haapiiraa e a feruriruri ai i te Parau a te Atua, e rahi atu â ˈi to tatou mauruuru no te faufaa rahi o te parau apî maitai. (Phil. 3:8) E itoito roa ïa tatou i te poro!
5. Ia au i te parau tohu a Ioela, e nafea ia rave faahope roa i ta tatou taviniraa?
5 Ua tohu Ioela e hou te mahana rahi riaria o Iehova, e “haapao â” te nunaa o te Atua i te pororaa ma te ore e vaiiho i te tahi noa ˈˈe mea e haafifi i te reira. (Ioe. 2:2, 7-9) E rave faahope roa anaˈe ïa i teie ohipa pororaa o te ore e tupu faahou!