A haaferuri i te taata
1. Eaha na ravea maitai aˈe no te pahono i te taata?
1 Ia tuu mai te tahi taata i te hoê uiraa aore ra patoiraa, e piti ravea ta tatou. Eaha ïa? E pahono roa ˈtu aore ra e haaferuri ia ˈna a ite atu ai oia i te pahonoraa tano? Ua haaferuri Paulo i te mau ati Iuda i Tesalonia e ua riro mai vetahi ei feia faaroo. (Ohi. 17:2-4) E nafea ia haaferuri?
2. E nafea ia pee i te hiˈoraa o Paulo a poro ai?
2 A haapao i te huru aau e te huru oraraa o te taata: No te haaferuri i te taata, ia haapao tatou i to ratou huru aau. A orero ai Paulo i te Areopago i mua i te mau Heleni, ua faahiti na mua oia i ta ratou i ite e i farii. (Ohi. 17:22-31) Oia atoa, a faaineine ai oe, a feruri i ta te rahiraa o te taata e tiaturi e e manaˈo ra. (Kor. 1, 9:19-22) I mua i te patoiraa, e imi anaˈe i te tahi tumu parau ta ˈna e farii a tauaparau atu ai i nia iho.
3. E nafea ia faaohipa i te uiraa ma te aravihi no te haaferuri i te taata?
3 A faaohipa i te uiraa ma te aravihi: No te tauturu i te hoê taata ia tapae i te tahi vahi, e tia ia tatou ia ite e teihea roa oia. Oia atoa, no te tauturu ia ˈna ia pahono maitai, ia ite ïa tatou i to ˈna manaˈo. I uiui na Iesu i te manaˈo o te taata hou a haaferuri ai ia ratou. ‘Ia aha vau e noaa ˈi te ora mure ore?,’ ta te hoê taata ïa i ui atu. Ua hinaaro Iesu e ite na mua i to ˈna manaˈo hou a pahono atu ai. (Luka 10:25-28) I te tahi atu taime, ua hape Petero i te pahonoraa. Ma te aravihi, ua faaafaro Iesu i to ˈna manaˈo. (Mat. 17:24-26) No reira, ia tuu mai te taata i te uiraa aore ra i te hoê manaˈo hape, e haaferuri anaˈe ia ˈna ma te faaohipa i te uiraa.
4. Ia haaferuri tatou i te taata, no te aha?
4 Ia haaferuri tatou i te taata, te pee ra ïa tatou i te hiˈoraa o te Orometua Rahi ra o Iesu, e te feia poro aravihi o te senekele matamua. Te faatura atoa ra ïa tatou ia ˈna. (Pet. 1, 3:15) Peneiaˈe e farii oia ia tauaparau faahou.