E nafea ratou e faaroo ai?
1. No te aha e mea fifi ai ia poro vetahi taime, e no te aha tatou e tamau ai?
1 I te mea e te fatata oioi maira te mahana o Iehova, e mea ru ia tauturu ia vetahi ê ia noaa ia ratou te ite mau i te Atua e ta ˈna opuaraa no te huitaata. (Ioa. 17:3; Pet. 2, 3:9, 10) E mea fifi paha vetahi taime, i te mea e e rave rahi te tâuˈa ore mai aore ra te faaooo mai paha no ta tatou pororaa. (Pet. 2, 3:3, 4) Atira noa ˈtu, te vai mau nei te tumu e tiaturi ai tatou e e taatâ i roto i ta tatou tuhaa fenua te farii i te parau apî maitai ia faaroo atu ratou. E nafea ïa taua mau taata ra e faaroo ai aita anaˈe e taata e faaite atu?—Roma 10:14, 15, MN.
2. E nafea te hiˈoraa o te aposetolo Paulo e mea faaitoito ai?
2 I mua i te patoiraa: No te feia e hinaaro nei e faaroo i te poroi o te Basileia, eiaha tatou e haaparuparu. O Philipi te oire matamua i Europa tei faaroo i te aposetolo Paulo ia poro i te parau apî maitai. I to Paulo raua o Sila pari-haavare-raahia, ua papaihia raua i te raau e ua hurihia i roto i te tapearaa. (Ohi. 16:16-24) Aita râ tera tupuraa mauiui mau i tapea ia Paulo eiaha e poro, no te mǎtaˈu hoi. Ia ˈna i haere i Tesalonia, te oire ta ˈna i tere atu i muri iho ei mitionare, ‘ua itoito â oia i te Atua.’ (Tes. 1, 2:2) Eita anei te hiˈoraa o Paulo e faaite ra i te tumu ‘eiaha ˈi tatou e rohirohi’?—Gal. 6:9.
3. Na te aha paha i faataui i te huru o vetahi tei ore hoi i anaanatae na mua ˈˈe?
3 Ua taui e rave rahi o tei ore i faaroo tau matahiti i te maoro i to ratou huru i mua i ta tatou poroi. Na te mau fifi paha i te pae moni, te maˈi, te hoê fetii tei pohe, aore ra te faarooraa i te mau tupuraa arepurepu na te ao nei, i faatupu i te reira tauiraa. (Kor. 1, 7:31) Ua riro vetahi feia apî, e metua patoi hoi to ratou i na mua ˈˈe, ei taata paari o te hinaaro e faaroo mai. Te horoa ra to tatou poro-tamau-raa i te ravea i taua mau taata ra ia ‘tiaoro i te iˈoa o Iehova’ hou a maoro roa ˈi.—Roma 10:13.
4. Na te aha e turai ra ia tatou ia tamau i ta tatou taviniraa “aore e mahana tuua”?
4 “Aore e mahana tuua”: E turai to tatou here i te Atua e i te taata-tupu ia tatou ia tamau “aore e mahana tuua” i te poro e i te faariro i te taata ei pǐpǐ, mai ta te mau aposetolo i rave i te senekele matamua. (Ohi. 5:42) E rave rahi i teie mahana e ‘autâ noa nei e e pii hua nei i te mau parau faufau atoa.’ (Ezek. 9:4) Eaha râ paha ratou i te au i te tiaturiraa e te tamahanahanaraa ia ratou e faaroo i te parau apî maitai! Noa ˈtu e eita te rahiraa o te taata e faaroo mai, te haapapu ra te mau Papai e te mauruuru roa ra Iehova i ta tatou mau tutavaraa.—Heb. 13:15, 16.