A poro ma te tuutuu ore
1 I te tahi taime, e au ra e te poro-tamau-hia ra ta tatou tuhaa fenua, e mea iti roa râ te manuïaraa. E tumu papu râ ta tatou no te poro tamau.—Mat. 28:19, 20.
2 Ei faaiteraa: Ua faaite atea Iesu e e tuhaa faufaa te pororaa i te Basileia o te tapao rau o te faaotiraa o te faanahoraa o te mau mea e e ravehia te reira ei ‘faaiteraa i te mau fenua atoa.’ (Mat. 24:3, 14) Ia ite mai te taata ia tatou i te apitiraa ˈtu i te pororaa i te parau apî maitai o te Basileia, e faaiteraa puai ïa te horoahia. Ia faarue tatou i te tuhaa fenua, e paraparau paha vetahi taata no nia i to tatou tere tau hora aore ra tau mahana i muri aˈe, noa ˈtu e aita ratou i faaroo i te poroi. E tauturu te haafaufaaraa i te mau tumu o ta tatou taviniraa ia tatou ia tamau â. Ma te apiti atu i te faatupuraa i te parau tohu bibilia na roto i te horoaraa i te hoê faaiteraa e te pororaa i te hoê poroi faaararaa, te faaoaoa nei tatou ia Iehova.—Tes. 2, 1:6-9.
3 E titauhia ia tutava tamau â: No te rahi o te mau faaanaanataeraa e titauraa i to te taata taime, e titauhia ia tutava tamau tatou i te faatupu i to ratou anaanatae. Ua farereihia te hoê vahine i te mau hebedoma atoa hoê matahiti i te maoro hou oia a faaoti ai e titau i te mau Ite i to ˈna fare no te hoê aparauraa bibilia. Ua au roa oia i ta ˈna i faaroo, ua farii i te hoê haapiiraa bibilia, ua haamata i te haere i te mau putuputuraa, e aita i maoro faaite atura i to ˈna hinaaro e bapetizo.
4 Te taui oioi nei te mau tupuraa na te ao nei, oia atoa ïa to te taata. E nehenehe e rave rahi tei patoi na, e farii i teie nei i te tiaturiraa mahanahana ta tatou e faaite ra. Ia farii maitai mai hoê noa ˈˈe taata i te poroi o te Basileia, ua hoona ïa to tatou tamau-noa-raa.
5 Na te ao atoa nei, te rahi noa ˈtura te taata o ‘te autâ nei e te pii hua nei no te mau mea atoa e ravehia nei.’ (Ezek. 9:4) Te haapapu ra te mau faahopearaa maitatai o ta tatou ohipa pororaa e te farii nei te mau hoa o te parau-tia i te poroi o te Basileia. (Isa. 2:2, 3) E tamau noa anaˈe ïa i te poro ma te tuutuu ore na roto i te tamau-noa-raa ma te here i te ‘hopoi i te parau oaoa e te maitai.’—Isa. 52:7; Ohi. 5:42.