A tamahanahana i te feia aau oto
1 Aita i itehia aˈenei i roto i te aamu o te taata te hoê hinaaro rahi i te tamahanahanaraa. Mai to tatou Arii, te Mesia ra o Iesu, te tutava nei tatou i ‘te faaora i te feia aau oto.’—Isa. 61:1.
2 Ravea: No te tamahanahana i te taata, e mea tia ia horoa tatou i te hoê faaiteraa faito noa e te faaitoito. Ma te aparau rii no nia i te mau ohipa iino o te ao e te mau haapiiraa hape, o te parau mau bibilia e te tiaturiraa oaoa o ta te Atua mau parau fafau mahanahana te mau tumu parau rahi roa ˈˈe i roto i te aparauraa. E ere te auraa e eita e tano ia tauaparau no nia ia Aramagedo. Inaha ta tatou tuhaa, o te pororaa ïa i “te matahiti hinaarohia e Iehova; e te mahana tahooraa na to tatou Atua,” e o te “aˈoraa ˈtu i te taata hara i ta ˈna parau ino.” Tera râ, eiaha te faaararaa no nia ia Aramagedo e te haamouraa i muri aˈe ia faaiti mai i te manaˈo tumu o te parau apî maitai o te Basileia o te Atua.—Isa. 61:2; Ezek. 3:18; Mat. 24:14.
3 I tera fare i tera fare: I roto i te pororaa, e farerei pinepine tatou i te feia e aau oto to ratou no te maˈi, te pohe o te hoê taata here, te parau-tia ore, aore ra te mau fifi i te pae moni. Mai te Mesia, e “aroha” e e aumihi tatou ia ratou. (Luka 7:13; Roma 12:15) Noa ˈtu e e taio tatou i te taata hoê aore ra e piti irava e au i to ˈna fifi, e mea tia ia ‘ru tatou i te faaroo’ ia nehenehe oia e faaite mai i to ˈna manaˈo hohonu. (Iak. 1:19) I muri aˈe noa i te faarooraa ia ˈna e nehenehe ai tatou e tamahanahana ia ˈna.
4 I te taime tano maitai o te aparauraa, e nehenehe tatou e parau, “Te hinaaro nei au e faaite atu i te tahi mau parau tamahanahana no roto mai i te Bibilia.” E titauhia ia faaohipa i te manaˈo maitai eiaha e tutava i te patoi i te mau manaˈo tano ore atoa ta te taata e parau mai paha. To tatou râ hinaaro, o te horoaraa ïa i te faaitoitoraa e te tamahanahanaraa maoti te mau Papai no te haapaari i te aau. No reira, e nehenehe oe e hiˈo i te buka Haaferuriraa i nia i te mau Papai api 91-5 i te tumu parau “Faaitoitoraa.” Aore ra e nehenehe oe e horoa na te fatu fare i te api parau Te tamǎrûraa no te feia e taiâ ra e e hiˈo faahou i te mau manaˈo faaitoito i roto.
5 A imi i te mau taime maitatai no te tamahanahana ia vetahi ê: Ua matau anei oe i te hoê taata tapiri, hoa ohipa, hoa haapiiraa, aore ra fetii e hinaaro ra i te tamahanahanaraa? No te aha ïa e ore ai e tutava i te farerei ia ratou i ǒ ratou ma te fa e horoa ˈtu i te tamahanahanaraa no roto mai i te mau Papai? Ia ite oe no te aha ratou e hinaaro ai i te tamahanahanaraa, e nehenehe oe e faaineine ia oe no taua tupuraa taa ê ra. No reira vetahi i papai ai i te mau rata aore ra i niuniu ai. E turai te here mau i te taata-tupu ia tatou ia faaite i te aumauiui e ia horoa i te tamahanahanaraa e hinaarohia no roto mai i te mau Papai.—Luka 10:25-37.
6 Oia, ua faauehia tatou e tamahanahana i te feia e oto ra, e tamǎrû i te feia aau peapea, e e horoa ˈtu i te tiaturiraa o te hoê tau faahiahia no a muri aˈe. Teie te tamahanahanaraa ta te taata e ati aˈe te ao nei e hinaaro ra. A paraparau ma te oaoa i nia e rave rahi mea maitatai ta te Atua i fafau, e horoa ïa oe i te tamahanahanaraa e te tiaturiraa na te feia aau haavare ore. Ia haamanaˈo noa tatou i te faufaaraa ia faaora i te feia aau oto.