Ta te Atua mau ravea no te tamahanahana

Ua faaite te aposetolo Paulo, o Iehovaa “te Atua no ˈna anaˈe te mahanahana; o tei haamahanahana mai ia matou i to matou mau pohe atoa nei.” (Korinetia 2, 1:3, 4) Te haapapu mai ra ïa te Bibilia, o te Atua anaˈe te tauturu maitai aˈe ia tatou, e o to tatou Metua i te raˈi te nehenehe e tamahanahana mai i roto i te mau huru ati atoa.

E titauhia râ ia rave i te tahi mea ia hinaaro tatou ia tamahanahana mai te Atua. E nafea te taote e tauturu mai ai ia ore tatou e farerei ia ˈna? Ua ani te peropheta Amosa: “E tia anei i te toopiti ia amui i to raua haerea, ia ore raua ia [faa]au?” (Amosa 3:3) No reira te Bibilia e faaitoito mai ai: “E haafatata ˈtu i te Atua, e na ˈna e haafatata mai ia outou na.”—Iakobo 4:8.

E nafea ia papu e na reira iho â te Atua? Na mua roa, te faaite mai ra o ˈna e rave rahi taime e te hinaaro ra oia e tauturu ia tatou. (A hiˈo i te tumu parau tarenihia.) E te piti, no te mea e nehenehe te feia ta te Atua i tamahanahana i na mua ˈˈe e i teie tau e haapapu mai i te reira.

Ua faaruru atoa te arii Davida i te ati mai te feia e rave rahi i teie mahana o te imi i te tauturu a te Atua. I te tahi taime, ua taparu oia ia Iehova ma te na ô: “E faaroo mai oe i ta ˈu aniraa, ia pure atu vau ia oe.” (Salamo 28:2, 7) Ua pahono anei te Atua i ta ˈna pure? E, ua parau hoi Davida: “Ua turuhia mai au; i rahi ai te oaoa o to ˈu nei aau.”—Salamo 28:2, 7.

TA IESU HOPOIA I ROTO I TE TAMAHANAHANARAA I TEI OTO RA

Ua hinaaro te Atua e faaohipa ia Iesu no te tamahanahana i te taata. Ua horoa atoa te Atua ia ˈna i te hopoia no te “faaora hoi i te feia aau oto” e no te “haamahanahana i te feia i mihi ra.” (Isaia 61:1, 2) Mai tei tohuhia, ua haapeapea mau Iesu no “te feia atoa i haˈa rahi, e tei teiaha i te hopoia.”—Mataio 11:28-30.

Ua tamahanahana Iesu i te taata na roto i ta ˈna mau aˈoraa î i te paari e to ˈna mǎrû i nia ia ratou. I te tahi taime, ua faaora atoa oia i tei roohia i te maˈi. I te hoê mahana, teie ta te tahi lepera i taparu ia Iesu: “Ia tia ia oe ra, e mâ vau ia oe.” Aroha aˈera Iesu ia ˈna e ua na ô atu: “Ua tia ïa ia ˈu, ia mâ oe.” (Mareko 1:40, 41) Ora ihora te maˈi o tera lepera!

Aita te Tamaiti a te Atua i te fenua nei no te haere roa mai e tamahanahana ia tatou i teie mahana. Te tamau ra râ to ˈna Metua o Iehova, “te Atua no ˈna anaˈe te mahanahana” i te tauturu i te feia i roto i te ati. (Korinetia 2, 1:3) E hiˈo anaˈe e maha ravea ta te Atua e faaohipa ra no te tamahanahana i te taata.

• Te Bibilia. “Te mau parau atoa hoi i papaihia i mutaa ihora, i papaihia ïa ia ite tatou; ia noaa to tatou tiairaa, i te faaoromai e te mahanahana o te parau i papaihia.”—Roma 15:4.

• Te varua moˈa o te Atua. I muri iti noa ˈˈe i te poheraa o Iesu, ua vai hau noa te amuiraa Kerisetiano. Eaha te tumu? No to ratou “mǎtaˈu hoi [ia Iehova]” e no “te aˈo hoi a te Varua Maitai.” (Ohipa 9:31) Mea puai roa te varua moˈa, te puai ohipa o te Atua. E nehenehe Iehova e faaohipa i te reira no te tamahanahana noa ˈtu eaha te tupuraa.

• Te pure. Teie te faaitoitoraa a te Bibilia: “Eiaha outou e ahoaho noa ˈtu i te mau mea atoa nei; e faaite hua râ i to outou hinaaro i te mau mea atoa nei i te Atua.” Eaha te noaa mai? “E na te hau a te Atua, o tei hau ê atu i te ite taata nei, e faaitoito mai i to outou aau, e to outou manaˈo.”—Philipi 4:6, 7.

• Te mau hoa Kerisetiano. E nehenehe tatou e tiaturi mau ia ratou i te taime fifi. Ua faaite te aposetolo Paulo o to ˈna mau hoa Kerisetiano “tei haamahanahana” ia ˈna i to ˈna “mau pohe e te ati.”—Kolosa 4:11; Tesalonia 1, 3:7.

E na ô râ paha oe, ‘E nafea te taata e faufaa-mau-hia ˈi i tera mau ravea i roto i te ati?’ E hiˈo anaˈe i te tupuraa o te feia i faaruru i te fifi faahitihia i te tuhaa na mua ˈtu. Mai ia ratou, e ite atoa paha oe te tapea noa ra te Atua i teie parau fafau mahanahana mau ta ˈna: “Mai tei [tauahihia] e to ˈna ra metua vahine; o to ˈu ïa [tauahiraa] ia outou.”—Isaia 66:13.