Ia tapea tatou i to tatou itoito rahi no te taviniraa e tia ˈi
1 I te mau matahiti atoa mai 1992 mai â, ua rave te mau Ite no Iehova ma te itoito rahi hau atu i te hoê miria hora i roto i te ohipa pororaa i te Basileia e faariroraa i te taata ei pǐpǐ i te ao nei. Auê tatou i te oaoa i te apiti-rii-raa ˈtu i taua ohipa faahiahia ra!—Mat. 28:19, 20.
2 Parau mau, na Iehova te mau haamauruururaa e arueraa atoa, na ˈna hoi i turu ia tatou i roto i ta tatou taviniraa i teie “mau taime ati rahi.” (Tim. 2, 3:1, MN) Eaha tei titauhia mai no te tamau i te rave ma te itoito rahi i teie ohipa faufaa?
3 Niu o te itoito rahi: Na te here rahi i te Atua e i te taata-tupu, oia atoa te hinaaro-mau-raa e haapao i ta tatou pûpûraa, e turai ra ia tatou i roto i ta tatou taviniraa no te Basileia. (Mat. 22:37-39; Ioa. 1, 5:3) Te turai ra te here ia tatou ia rave i te mau haapaeraa ia nehenehe tatou e apiti taatoa i te pororaa.—Luka 9:23.
4 A tutava i te tapea noa i te itoito rahi: Te rave nei to tatou enemi te Diabolo i te mau tutavaraa atoa no te faaiti mai i to tatou itoito rahi no te taviniraa. Te tâuˈa ore o te taata o ta tatou tuhaa fenua, te mau faaanaanataeraa a teie nei ao, te mau faaheporaa o te oraraa o te mau mahana atoa, e te tapitapi i to tatou iho ea e ino noa ˈtura, o te tahi noa ïa o te mau mea ta ˈna e faaohipa ra no te tamata i te faatoaruaru ia tatou.
5 No reira, e titauhia ia haa puai tatou no te faaoraora noa i to tatou itoito rahi. E mea faufaa ia atuatu tatou i ‘to tatou hinaaro matamua.’ E titauhia ïa ia taio e ia feruriruri tamau i te Parau a te Atua, te Bibilia, e ia faaohipa i te mau faanahoraa pae varua atoa a “te tavini haapao maitai e te paari.”—Apo. 2:4; Mat. 24:45; Sal. 119:97.
6 Mai ta te mau parau tohu bibilia e faaite maitai ra, te fatata oioi maira te mahana e haamou ai Iehova i te feia paieti ore. (Pet. 2, 2:3; 3:10) Ma te haamanaˈo maitai i te reira, e haa puai anaˈe no te atuatu i to tatou itoito rahi no te taviniraa, a apiti taatoa ˈtu ai i te ohipa pororaa i te Basileia e faariroraa i te taata ei pǐpǐ e ravehia ra na te ao atoa nei i teie nei!