A faariro ei fa na oe te faatereraa i te hoê haapiiraa bibilia
1 “E faateitei i to outou mata, e hiˈo i te mau aua ra, ua teatea ïa i teie nei ua auhune.” (Ioa. 4:35) E tano mau â teie mau parau a Iesu Mesia i te huru tupuraa o te mau tavini Kerisetiano i teie tau.
2 Te ite-noa-hia ra te feia aau haavare ore e hinaaro ra ia haapiihia ratou i te mau eˈa o Iehova. A hiˈo noa i te numera o te mau pǐpǐ apî e bapetizohia ra i te mau matahiti atoa. Mai te peu e te hinaaro mau ra oe e faatere i te hoê haapiiraa bibilia, eaha ta oe e nehenehe e rave?
3 A haamau i te hoê fa: A tahi, a haamau i te fa e haamata e e faatere i te hoê haapiiraa bibilia tamau. A haamanaˈo i ta oe fa a apiti ai oe i te taviniraa. I te mea e ua faauehia tatou te mau Kerisetiano ia haapii i te taata e ia poro atoa, e mea maitai ïa ia tutava tatou paatoa i te apiti atu â i te ohipa haapiiraa bibilia.—Mat. 24:14; 28:19, 20.
4 Te tahi atu mau manaˈo eiaha e haamoe: E titauraa te pure haavare ore no te feia poro i te Basileia. I te tahi taime, e ite tatou i te taata o tei pure no te ani i te tauturu pae varua. Auê ïa haamaitairaa ia faaohipahia tatou e Iehova no te ite e te haapii i taua mau taata ra!—Hag. 2:7; Ohi. 10:1, 2.
5 Ua pure te hoê tuahine no te hoê haapiiraa bibilia e ua faaite i te tahi mau api parau E hinaaro anei outou e ite hau atu â no nia i te Bibilia? i ta ˈna vahi raveraa ohipa. I to te hoê vahine raveraa i te hoê api parau, taioraa, e haamataraa i te faaî i te parau aniraa, ua paraparau te tuahine ia ˈna e ua haamata ˈtura i te hoê haapiiraa bibilia.
6 E nehenehe te feia poro aravihi i te haamata e i te faatere i te mau haapiiraa bibilia e tauturu ia oe ia raea ta oe fa e faatere i te hoê haapiiraa bibilia. A pure i te Atua no te reira, e a faaohipa i te mau tauturu atoa e vai ra ia raea taua fa ra. Peneiaˈe e ite oioi oe i te oaoa e faatere i te hoê haapiiraa bibilia.