I te tau o te Oroa haamanaˈoraa, e pee anei oe i te hiˈoraa itoito o Iehova e Iesu?

1. Eaha te tutavaraa taa ê ta te mau Ite no Iehova e rave i te tau o te Oroa haamanaˈoraa?

¹ E rave Iehova i to ˈna hinaaro ma te itoito. No nia i te tahi mau haamaitairaa a te Basileia o te Atua, te na ô ra te Isaia 9:7: “Na te itoito o Iehova sabaota teie e rave.” Ua faaite atoa te Tamaiti a te Atua i to ˈna itoito rahi no te haamoriraa mau a tavini ai i nia i te fenua nei. (Ioa. 2:13-17; 4:34) I te mau matahiti atoa, i te tau o te Oroa haamanaˈoraa, e rave e mirioni feia poro na te ao nei i te hoê tutavaraa taa ê no te pee i te itoito o Iehova e Iesu ma te poro rahi atu â. E na reira atoa oe?

2. I te 7 no Mati, eaha ta tatou e rave ma te itoito?

² Titau-manihini-raa no te Oroa haamanaˈoraa: E haamata te opereraa i te mau titau-manihini-raa no te Oroa haamanaˈoraa i te Mahana maa 7 no Mati. A faaineine ia oe i teie nei iho â no te poro ma te itoito. E oaoa roa te mau amuiraa i te poro i roto i ta ratou tuhaa fenua atoa mai te peu e e nehenehe. A rave i te hoê tutavaraa taa ê no te titau manihini i ta oe mau piahi Bibilia, taata ta oe e hoˈi faahou e farerei, hoa ohipa, fetii e hoa haapiiraa. A horoa ia ratou i te tahi titau-manihini-raa aore ra a faaohipa i te jw.org.

3. Eaha ta tatou e rave no te poro atu â i te avaˈe no Mati e Eperera?

³ Pionie tauturu: Mea faufaa te itoito no te poro atu â. Papu maitai, e rave rahi te nehenehe e riro ei pionie tauturu ma te poro e 30 hora i te avaˈe no Mati e Eperera. I ta oe haamoriraa utuafare aore ra ta oe iho haapiiraa, a pure no te ite e nafea oe ia na reira atoa. (Mas. 15:22) A ite ai vetahi ê i to oe oaoa no te apiti i tera opereraa, e itoito atoa ratou no te pororaa. Ia rave oe i te mau faatanoraa no te poro atu â, e pee oe i te hiˈoraa itoito o Iesu.—Mar. 6:31-34.

4. Eaha te mau haamaitairaa ta tatou e fanaˈo a pee ai i te hiˈoraa itoito o Iehova e Iesu?

⁴ Ia pee tatou i te hiˈoraa itoito o Iehova e Iesu i te tau o te Oroa haamanaˈoraa, e fanaˈo tatou i e rave rahi haamaitairaa. E rahi atu â te taata ta tatou e poro atu. E ite atoa tatou i te oaoa a tavini ai ia Iehova e a horoa ˈi ia vetahi ê. (Ohi. 20:35) E te mea faufaa roa ˈˈe, e faaoaoa tatou i te Atua itoito mau e ta ˈna Tamaiti.