Ia mahanahana te taatoaraa te tahi i te tahi
1. Eaha te mau taime maitatai taa ê ta te mau tere farereiraa a te mau tiaau ratere e pûpû?
1 Ua papai te aposetolo Paulo i te amuiraa i Roma: “E hinaaro rahi . . . to ˈu ia ite atu ia outou, ia tuu atu vau i ta te varua ia outou na, ia itoito hoi outou. E ia mahanahana hoi au e outou atoa i to tatou faaroo, i to outou e i to ˈu atoa hoi.” (Roma 1:11, 12) Te pûpû ra te mau tere farereiraa a te mau tiaau ratere o teie tau i te hoê â mau taime maitatai no te tamahanahana te tahi i te tahi.
2. No te aha e faaara-oioi-hia ˈi te tere o te tiaau haaati?
2 Te amuiraa: E faaara-oioi-hia te tere o te tiaau haaati i roto i te amuiraa fatata e toru avaˈe na mua ˈˈe. E taime ïa to tatou no te faatanotano i ta tatou porotarama ia faufaa-rahi-hia tatou. (Eph. 5:15, 16) Mai te peu e te rave ra oe i te ohipa, peneiaˈe e nehenehe oe e ani ia vata oe no te turu i te taviniraa i tera hebedoma. E faanaho vetahi i te rave i te taviniraa pionie tauturu i te avaˈe e tere mai ai te tiaau haaati. Mai te peu e ua faanaho oe i te reva, e nehenehe anei oe e rave i te tahi mau faatanotanoraa ia tae mai iho â oe i tera hebedoma?
3. Eaha ta tatou iho e nehenehe e rave no te fanaˈo i te faaitoitoraa i te roaraa o te tere o te tiaau haaati?
3 Te tumu matamua o te tere o te tiaau haaati, no te horoa ïa i te faaitoitoraa taitahi e te faaineineraa i roto i te taviniraa. E nehenehe oe e ani ia ohipa e o ˈna aore ra e ta ˈna vahine mai te peu e mea faaipoipo oia? E oaoa te tiaau haaati i te ohipa e e rave rau taata poro, oia atoa tei iti aˈe te aravihi aore ra tei hinaaro ia aravihi aˈe i roto i te taviniraa. E nehenehe te taatoaraa e haapii mai i ta ˈna faaiteraa e e faaohipa i te mau manaˈo tauturu atoa ta ˈna e horoa maitai mai. (Kor. 1, 4:16, 17) E horoa ˈtu te titau-manihini-raa ia ˈna ia tamaa e o oe i te tahi atu â taime maitatai no te faaitoito ei hoa tavini. (Heb. 13:2) I te mea e ua faatanohia ta ˈna mau oreroraa parau i nia i te mau hinaaro o te amuiraa, a faaroo maite atu.
4. E nafea tatou e nehenehe ai e faaitoito i to tatou tiaau haaati?
4 Te tiaau haaati: Aita te aposetolo Paulo i taa ê atu i te mau taeae o te mau amuiraa. Ua faaruru oia i te fifi e te ahoaho, e ua mauruuru no te faaitoitoraa. (Kor. 2, 11:26-28) I to te amuiraa i Roma iteraa e ua tae mai Paulo, e taata tapeahia ïa, ua haere maira vetahi i Apio Phoro e farerei ia ˈna—hoê atearaa e 74 kilometera! “Ite aˈera Paulo ia ratou, haamaitai atura i te Atua e itoito atura.” (Ohi. 28:15) Oia atoa e nehenehe oe e faaitoito i to oe tiaau haaati. A faaite “rahi atu ïa i te faatura” na roto i ta oe turu aau tae i to ˈna tere. (Tim. 1, 5:17) A parau e a faaite atu i to oe mauruuru haavare ore no ta ˈna mau tutavaraa no oe. E oaoa oia e ta ˈna vahine a ite ai raua i to oe faaroo, here, e faaoromai.—Tes. 2, 1:3, 4.
5. No te aha tatou paatoa e hinaaro ai i te tamahanahanaraa i teie mahana?
5 I teie “mau taime ati rahi faaruru atâ,” o vai i rotopu ia tatou e ore e hinaaro i te faaitoitoraa? (Tim. 2, 3:1, MN) A faaoti i teie nei ia tae e ia haa roa i roto i te taviniraa i tera hebedoma taa ê e te tiaau haaati. E nehenehe tatou paatoa—tiaau ratere e feia poro atoa—e amui i te tamahanahanaraa te tahi i te tahi ma te oaoa. Ia na reira e ‘haamahanahana atoa ˈi tatou ia tatou iho, e e faatupu ai i te maitai te tahi i te tahi.’—Tes. 1, 5:11.