Réveillez-vous! taa ê e pûpûhia i Novema!
1 E uiraa haavare ore ta te taata e rave rahi no nia i te faufaaraa o te Bibilia. Mai te peu e na te taata i papai i te reira, no te aha ïa i parauhia ˈi te Parau a te Atua? Eaha te mau tumu e tiaturi ai i te Bibilia no te aratai i to ˈu taahiraa avae? Mai te peu e e taio e e haapii au i te Bibilia, e nafea ïa to ˈu taime e ta ˈu tutavaraa e hoona ˈi? Eaha te huriraa bibilia e mea tia ia faaohipa vau? Tera vetahi o te mau uiraa e pahonohia i roto i te Réveillez-vous! taa ê no Novema “E nehenehe anei oe e tiaturi i te Bibilia?”
2 E hinaaro tatou e faatupu i te hoê opereraa rahi o teie Réveillez-vous! taa ê i roto i ta tatou tuhaa fenua. Mai te peu e e nehenehe, a opere i roto i te taviniraa e te amuiraa i tera fare i tera fare i te mau Mahana maa atoa i te roaraa o te avaˈe Novema. A faaite i teie Réveillez-vous! i to oe mau fetii, feia tapiri, hoa ohipa, orometua haapii, hoa haapiiraa, e te taata ta oe e hoˈi e farerei. A rave i te tahi mau vea ia hoohoo haere e ia ratere haere oe. Ua ani te mau matahiapo i te mau vea hau ia navai maitai ta te amuiraa.
3 A haamata i te haapiiraa bibilia: Ia vaiiho oe i te vea, e nehenehe oe e faaineine no te hoê haapiiraa bibilia hou oe a faaoti ai i te aparauraa. Ei hiˈoraa, e nehenehe oe e parau, “I mua nei, e hinaaro vau e faaite atu ia oe i ta te Bibilia pahonoraa i teie uiraa, ‘Eaha te opuaraa a te Atua no te fenua?’” E a hoˈi atu e te buka Bibilia haapii e a faaite i te mau api 4-5 i te fatu fare, aore ra a hiˈopoa i te mau paratarafa 1-3 o te pene 3. Te tahi atu raveraa, o te parauraa ïa, “I mua nei, e hinaaro vau e aparau i nia i te hoê parau tohu o te Bibilia o te tupu nei i teie nei.” Ia hoˈi atu oe, a faaite i te pene 9 o te buka i te fatu fare e a hiˈopoa i te mau paratarafa 1-3. Aore ra e nehenehe noa oe e parau i te fatu fare e: “Te fifi nei e rave rahi i te taa i ta ratou e taio ra i roto i te Bibilia. I mua nei, e hinaaro vau e faaite ia oe e nafea oe e nehenehe ai e taa maitai aˈe i ta oe Bibilia.” A hoˈi atu e faaite i te buka Bibilia haapii, e a faataa i te tereraa o te hoê haapiiraa.
4 To te Bibilia anaˈe “te parau moˈa i papaihia,” o te nehenehe e tauturu ia tatou ia ‘paari e tae noa ˈtu i te ora.’ (Tim. 2, 3:15) No reira, e hinaaro tatou paatoa e opere ma te itoito rahi i teie Réveillez-vous! taa ê no te tauturu i te taata ia tiaturi i te Bibilia!