A pûpû i te tiaturiraa i tei veve
1 Ua anaanatae taa ê Iesu i tei veve. E rave rahi taime, ua horoa semeio oia i te tauturu materia e ua faaora oia i te feia maˈi, ta ˈna râ tapao o te parauraa ïa i “te parau oaoa” i te taata rii. (Mat. 11:5) I teie mahana, te tamau nei te taviniraa Kerisetiano i te hopoi i te haamaitairaa i te taata rii e i te tahi atu.—Mat. 24:14; 28:19, 20.
2 Tiaturiraa mau: Ua fafau pinepine te mau orometua o te Amuiraa faaroo Kerisetiano i te feia riirii e e maitaihia ratou i te pae faufaa ia horoa rahi ratou na te ekalesia. Te haapii ra râ te Bibilia e na te Basileia o te Atua anaˈe e faaore i te veve e te mau fifi atoa o te huitaata. (Sal. 9:18; 145:16; Isa. 65:21-23) Ma te faaite i tei veve eaha ta te Bibilia e haapii mau ra, e horoa ˈtu tatou i te tiaturiraa e e tauturu tatou ia ratou ia haamâha i to ratou mau hinaaro i te pae varua.—Mat. 5:3, MN.
3 Ua hiˈo ino te mau Pharisea i to Iesu tau i te feia rii, i te parau-faaino-raa ia ratou ‘am-ha·’aʹrets, aore ra “feia o te fenua.” Ua hiˈo râ Iesu i “to ratou toto,” aore ra to ratou ora, ei “mea taoˈa.” (Sal. 72:13, 14) E nehenehe tatou e pee ia Iesu e e “hamani maitai” i tera feia rii ma te faaite i te maitai e te aumauiui. (Mas. 14:31) Eita roa tatou e hinaaro e faaino i te feia e ora ra i te mau vahi tapiri veve aore ra e vahavaha i te poro ia ratou. E rave rahi o te feia e farii ra i te poroi o te Basileia, e feia rii ïa.
4 A tauturu i teie nei: E tauturu atoa te haapiiraa ˈtu tatou i te mau faaueraa tumu bibilia i te feia rii i te faaiti mai i te mau faahopearaa o te veve i teie nei â. Ei hiˈoraa, te faahapa ra te Bibilia i te inu hua, te pere moni, te hupehupe, te puhipuhi avaava, e te tahi atu mau peu e faatupu i te veve. (Mas. 6:10, 11; 23:21; Kor. 2, 7:1; Eph. 5:5) Te faaitoito ra te mau Papai i te haerea tia e te ohiparaa ma te “aau atoa,” e huru maitatai titauhia i te feia rave ohipa. (Kol. 3:22, 23; Heb. 13:18) Te mea mau, i roto i te hoê titorotororaa ua “faataa” te rahiraa o te mau paoti ohipa i te haerea tia e te taiva ore ei huru maitatai ta ratou e haafaahiahia roa ˈˈe i nia i te feia e imi ra i te ohipa.
5 Aita Iehova e tâuˈa ore ra i te mau mauiui o te taata veve. Ua fatata Iesu Mesia i te faaora i ‘tei veve e tiaoro ra.’ (Sal. 72:12) E tae roa ˈtu i tera taime, e fanaˈoraa taa ê ta tatou i te tamahanahanaraa ia vetahi ê, oia atoa tei veve, maoti to te Bibilia poroi o te tiaturiraa.