E faaite anaˈe i te anaanatae mau—ma te hiˈo i te taata ma te faatura
1 Ia poro tatou i te vahi taata e i tera fare i tera fare, e hiˈo pinepine tatou i te taata hou tatou e haamata ˈi i te paraparau. I tera taime poto, e nehenehe tatou e taa na nia i te huru o to ratou hohoˈa mata eaha to ratou manaˈo no nia ia tatou e eaha atoa to ratou huru. E nehenehe atoa ratou e haroaroa rahi no nia ia tatou. Teie ta te hoê vahine i parau no nia i te farereiraa i te hoê Ite: “Te haamanaˈo ra vau e mea mǎrû to ˈna mata ataata. Ua maere au.” Ua turai tera huru i tera vahine ia faaroo i te parau apî maitai.
2 E ravea manuïa te haamauraa i te taairaa o te hohoˈa mata e te hiˈoraa i te tahi atu no te haamata i te horoa i te faaiteraa ia poro tatou na roto i te aroâ aore ra i te tahi atu vahi taata. E hiˈo te hoê taeae i te mata o te mau taata e haafatata mai ia ˈna. Ia hiˈo atu te taata ia ˈna, e ataata o ˈna e e pûpû i te mau vea. I te na reiraraa, ua fanaˈo e rave rahi tauaparauraa anaanatae e ua vaiiho o ˈna e rave rahi papai.
3 A haroaroa i to vetahi ê huru aau: E tauturu te hiˈoraa i te taata ia tatou ia haroaroa i to ratou mau huru aau. Ei hiˈoraa, mai te peu e mea fifi no te tahi ia taa ia tatou aore ra aita e mauruuru ra i te tahi mea o ta tatou i parau, e pinepine e nehenehe te reira e itehia i nia i to ˈna hohoˈa mata. Mai te peu e mea ohipa roa ta ˈna aore ra te haamata fiu ra o ˈna, e ite tatou i te reira na roto i te hiˈoraa i te huru o to ˈna hohoˈa mata. E e nehenehe tatou e faatano aore ra e haapoto i ta tatou faaiteraa ma te au. E ravea maitai te tâuˈaraa i to vetahi ê huru aau no te faaite i to tatou anaanatae mau ia ratou.
4 Te haavare ore e te tiaturi papu: I roto e rave rahi taˈere, e haapapuraa te hiˈoraa i te mata o te hoê taata e e taata haavare ore tera. A tapao na mea nafea to Iesu pahonoraa i to ta ˈna mau pǐpǐ uiraa: “O vai . . . te taata e ora?” Te na ô ra te Bibilia e: “Ua hiˈo atura Iesu ia ratou, na ô atura; Eita mau â ïa e tia i te taata nei; e tia râ te mau mea atoa nei i te Atua.” (Mat. 19:25, 26) Ma te feaa ore, ua haapapu atu â te tiaturi papu i roto i te mata o Iesu i ta ˈna mau parau. Oia atoa, e tauturu te hiˈoraa i te taata ma te faatura ia tatou ia faaite i te poroi o te Basileia ma te haavare ore e te tiaturi papu.—Kor. 2, 2:17; Tes. 1, 1:5.