E faaite anaˈe i te anaanatae mau: ma te ui i te mau uiraa e ma te faaroo atu
1 Mea au na te rahiraa o te taata e faaite i to ratou mau manaˈo eita râ e au ia haapiihia aore ra ia titorotorohia ˈtu. No reira, ei tavini Kerisetiano, e mea tia ia haapii tatou i te aravihi i te haaparaparau i te taata ma te faaohipa i te mau uiraa.—Mas. 20:5.
2 E mea tia ia turai ta tatou mau uiraa i te hoê ia feruri, eiaha râ ia faataiâ. Ia poro te hoê taeae i tera fare i tera fare, e ui oia, “Te manaˈo ra anei oe e te vai ra te hoê tau e haa ˈi te taata i nia te tahi i te tahi ma te tura e te faatura?” Ia au i te pahonoraa, e na ô faahou oia e, “Ia manaˈo oe eaha te titauhia no te faatupu i te reira?” aore ra “No te aha oe e manaˈo ai mai tera?” Ia poro te tahi atu taeae ma te faanaho-ore-hia e i te mau vahi taata, e ui oia i te feia e tamarii ta ratou, “Eaha ta oe e oaoa roa ˈˈe na roto i te riroraa ei metua?” I muri iho, e ui oia, “Eaha ta oe e tapitapi roa ˈˈe?” A tapao na e e tauturu teie mau uiraa i te mau taata ia faaite i to ratou mau manaˈo ma te ore e faahuru ê ia ratou. I te mea e ua rau te mau tupuraa, e mea tia paha ia faatano tatou i te huru e te taˈiraa o ta tatou mau uiraa i nia i te feia o ta tatou tuhaa fenua.
3 E haaparaparau anaˈe i te taata: Mai te peu e ua ineine te mau taata i te faaite i to ratou mau manaˈo, a faaroo maite ma te ore e tâpûpû faufaa ore noa i te parau. (Iak. 1:19) A haamauruuru maitai no ta ratou mau pahonoraa. (Kol. 4:6) E nehenehe noa outou e parau e, “Mea anaanatae te reira. Mauruuru i to oe faaiteraa mai i te reira.” A haapopou ia ratou mai te peu e e nehenehe outou e na reira ma te haavare ore. A ui ma te mǎrû i te tahi atu mau uiraa ia itea mai eaha to ratou manaˈo e no te aha ratou e na reira ˈi i te manaˈo. A imi i te niu e tu ai te manaˈo. Ia hinaaro outou e aratai i to ratou ara-maite-raa i nia i te hoê irava, e nehenehe outou e parau e, “Aita anei outou i feruri aˈenei e e nehenehe te reira e tupu?” Eiaha e faaetaeta aore ra e tataˈu atu.—Tim. 2, 2:24, 25.
4 Ua taai-rahi-hia ta vetahi ê huru pahonoraa i ta tatou mau uiraa i ta tatou huru faarooraa. E nehenehe te taata e faaite mai e te faaroo ra anei tatou ma te haavare ore. Ua tapao te hoê tiaau ratere e, “Ia faaroo outou ma te aau tae i te taata, e ohipa te reira ma te maere no te aratai mai e e faaiteraa faahiahia te reira i to outou iho anaanatae mahanahana.” Na roto i te faarooraa ia vetahi ê, te faaturahia ra ïa ratou, e e nehenehe te reira e turai ia ratou ia faaroo i te parau apî maitai ta tatou e imi ra i te faaite.—Roma 12:10.