E haapii anaˈe i te haaferuri maitai aˈe i te feia ta tatou e paraparau ra
1. Teihea tupuraa bibilia ta tatou e hiˈopoa mai, e no te aha?
1 E hiˈoraa faahiahia te oreroraa a te aposetolo Paulo i roto i te sunago i Anetiohia i Pisidia, tei faahitihia i roto i te Ohipa 13:16-41, no te haaferuri i te taata e faaroo maira. Ua haapao Paulo i te huru oraraa o te feia e faaroo maira e to ratou huru feruriraa, e ua faatano i ta ˈna oreroraa o te parau apî maitai i te tupuraa. E hiˈo faahou mai tatou i tera tupuraa e e uiui anaˈe e nafea tatou e nehenehe ai e na reira atoa i roto i ta tatou taviniraa.
2. Eaha ta tatou e haapii mai i roto i te huru e haamata ˈi Paulo i ta ˈna oreroraa?
2 E imi anaˈe i te hoê mea e tu ai te manaˈo: No nia i te tiaraa faufaa o Iesu i roto i te faatupuraa i te opuaraa a te Atua te poroi ta Paulo i poro; aita râ o Paulo i haamata i ta ˈna oreroraa na nia i tera manaˈo. Ua vauvau râ o ˈna i te hoê tumu parau o ta ˈna iho â i farii e te feia e faaroo maira e ati Iuda te rahiraa: te tuatapaparaa o te nunaa ati Iuda. (Ohi. 13:16-22) E nehenehe atoa tatou e fanaˈo i te mau faahopearaa maitatai aˈe ia tutava tatou i te imi i te hoê mea e tu ai to tatou manaˈo e to te feia ta tatou e paraparau ra. No reira, e mea tia paha ia turai tatou ia ratou ia paraparau ma te tuu i te mau uiraa ma te faatano i te parau, e ia faaroo maitai ia ratou no te haroaroa i te mau tumu parau e mea faufaa mau no ratou.
3. No te aha te feia e faaroo maira ia Paulo e fifihia ˈi i te farii e o Iesu te Mesia tǎpǔhia?
3 Ia ˈna i faahiti i te tuatapaparaa o te mau ati Iuda, ua haamanaˈo Paulo i te feia e faaroo maira e ua fafau te Atua i te faatupu i te hoê Faaora no roto mai i te opu o Davida. Te tiai ra râ e rave rahi ati Iuda i te hoê aito faehau o te faaora ia ratou i te haavîraa uˈana Roma e o te faateitei i te nunaa ati Iuda i nia ˈˈe i te tahi atu mau nunaa atoa. Ua ite ratou ma te feaa ore e ua patoihia Iesu e te mau aratai haapaoraa ati Iuda no Ierusalema, ua tuuhia ˈtu i te hau Roma e ua taparahi-pohe-hia. E nafea Paulo e manuïa ˈi i te haapapu ia ratou e o te Mesia tǎpǔhia tera?
4. Mea nafea to Paulo haaferuri-maite-raa i te mau ati Iuda e faaroo maira ia ˈna?
4 E faatano anaˈe i ta tatou manaˈo paturu: Ma te ite i te huru feruriraa o te feia e faaroo maira ia ˈna, ua faaohipa Paulo i te mau Papai no te haaferuri ia ratou i nia i te niu o te mau manaˈo o ta ratou i farii aˈena. Ei hiˈoraa, ua faataa o ˈna ia Iesu mai te fetii huaai o Davida e mai te hoê taata o tei faataahia e Ioane Bapetizo, o ta te rahiraa o te mau ati Iuda i farii ei peropheta a te Atua. (Ohi. 13:23-25) Ua haamahitihiti o Paulo e na roto i te patoiraa ia Iesu e na roto i te faautuaraa ia ˈna i te utua pohe “ua faatupu” te mau aratai haapaoraa i “te parau a te mau peropheta.” (Ohi. 13:26-28) Hau atu â, ua faataa o ˈna e te vai ra te mau ite no te haapapu e ua faatiahia Iesu mai te pohe mai, e ua huti o ˈna i te ara-maite-raa i nia i te mau irava matauhia o te mau Papai o tei tupu i tera tia-faahou-raa.—Ohi. 13:29-37.
5. (a) Mea nafea Paulo i te faatanoraa i ta ˈna manaˈo paturu ia ˈna i paraparau i to Heleni? (b) E nafea tatou e nehenehe ai e pee ia Paulo ia poro tatou i roto i te tuhaa fenua a ta tatou amuiraa?
5 Ia ˈna râ i paraparau i to Heleni i te Areopago i Ateno, ua faaohipa o Paulo i te tahi atu manaˈo paturu. (Ohi. 17:22-31) Tera râ, hoê â niu to te poroi ta ˈna i faaite, e i roto i tera na tupuraa e piti, ua faatupu ta ˈna mau tutavaraa i te mau faahopearaa maitatai. (Ohi. 13:42, 43; 17:34) Oia atoa i teie mahana, e maitai atu â ta tatou taviniraa ia imi tatou i te hoê mea e tu ai to tatou manaˈo e to te feia ta tatou e paraparau ra e ia faatano tatou i ta tatou manaˈo paturu i to ratou huru oraraa e i to ratou huru feruriraa.