Rata a te amaa

E te feia poro here i te Basileia e,

E mea hoona mau te matahiti taviniraa 2005, mea hotu e te haamaitaihia. Ua haa puai roa e ua ohipa maitai te taatoaraa o te feia poro o ta tatou tuhaa fenua i roto i te ohipa a te Basileia, ma te pee i te aˈoraa a Paulo i roto i te Korinetia 1, 15:58 o te na ô ra e: “E teie nei, e au mau taeae here e, ia itoito outou, eiaha e aueue, ia rahi â te rave i te ohipa a te Fatu eiaha e faaea, ua ite hoi outou e, e ere i te mea faufaa ore te ohipa a te Fatu ta outou e rave na.”

Na mua roa, ua papu ia matou e ua oaoa outou paatoa i te taioraa i te Annuaire des Témoins de Jéhovah 2005, o tei faahiti i te faatiaraa o te tuatapaparaa o te ohipa a te Basileia i to tatou fenua. Mea rahi tei haapii mai e rave rahi mea ta ratou i ore i ite, no nia iho â râ i te haamata-roa-raa o te ohipa i Tahiti e to ˈna mau motu. Ua tae atoa mai e rave rahi faatiaraa a te mau taeae e tuahine no te tahi atu mau fenua, o tei papai mai no te parau mai e ua au ratou i teie faatiaraa e ua itoito-atoa-hia ratou i te taioraa i te mau tutavaraa atoa o tei ravehia i na matahiti i mahemo e 50 ia nehenehe te parau apî maitai ia porohia i to tatou mau motu atoa. Ua riro te mau tutavaraa itoito e te î i te haapaeraa a te taeae e tuahine taiva ore e te itoito rahi e rave rahi ua paari i teie nei, ei mea faaitoito roa i teie mahana. Oia mau, e nehenehe e parau e ua tupu te faahitiraa a te Zekaria 4:10: “O vai tei vahavaha i te mahana parau rii haihai ra? e oaoa ratou.”

E tae roa mai i te haamataraa o te matahiti taviniraa i mahemo, e mea iti te ohipa i ravehia no te tauturu i te feia tariˈa turi o ta tatou tuhaa fenua. No reira, auê tatou i te oaoa i te iteraa e 47 feia poro e pionie o tei horoa i te mau rima tauturu no te fanaˈo i te hoê faaineineraa vitiviti no te haapii i te reo aparaa rima! Aita i maoro ua hoona tera mau tutavaraa. Noa ˈtu e hoê anaˈe hoi hoa tariˈa turi o te parau mau tei apiti na i ta tatou mau putuputuraa, e te reira ma te ore e hurihia, i teie nei fatata e 25 e tae atu e 30 feia tariˈa turi o te nehenehe e fanaˈo tamau i te haapiiraa a Iehova i te mau putuputuraa i roto e pae amuiraa no Tahiti e to ˈna mau motu i reira te vai ra te feia huri aravihi no te apa i te porotarama o te mau putuputuraa. I te tairururaa mataeinaa 2005, ua nehenehe matou e faanaho i te hoê tairururaa taatoa na roto i te reo aparaa rima i reira e 15 feia tariˈa turi o tei apiti mai. Eita e ore, ua oaoa tatou i te iteraa i to tatou tuahine tariˈa turi matamua o to tatou tuhaa fenua i te bapetizoraahia! Papu maitai, ua haamaitaihia te mau tutavaraa a te feia tei haa puai i roto i tera taviniraa taa ê e te hinaaro nei matou e haamauruuru ia ratou e e faaite i to matou mauruuru mahanahana ia ratou. E nehenehe aˈe ïa tatou e parau e ‘aore roa o tatou viivii i te toto o te taata atoa’ o ta tatou tuhaa fenua, e oia atoa ta tatou hopoia i nia i te feia tariˈa turi.—Ohi. 20:26.

Ua rave maite roa atoa to tatou mau taeae o te tomite paturaa no te fenua i ta ratou tuhaa e ua ohipa puai no te patu i te hoê Piha a te Basileia apî i Rurutu, o tei tiai-maoro-hia. I roto noa e hitu avaˈe, ua rave vitiviti ratou i ta ratou ohipa e tae atu i te hopea. Ua mauruuru atoa matou i te mau rima tauturu o tei turu ia ratou i roto i tera tuhaa faufaa ê atu o te ohipa a te Basileia! Aita noa ratou i horoa i to ratou ite e to ratou aravihi i roto i te ohipa paturaa, ua ineine atoa râ ratou i te rave i ta ratou tau faafaaearaa e i te aufau i to ratou tere e tae roa ˈtu i tera motu no te turu i tera opuaraa. Tera atoa te tahi hiˈoraa nehenehe o te tamahanahana i to matou aau.

Eita atoa matou e hinaaro e haamoe i te taviniraa ite-ore-hia, mea itoito roa râ, ta to tatou mau taeae o te tomite tuatiraa e te fare maˈi i rave. Te farerei nei tera mau taeae ma te tuutuu ore i te mau taote tâpû e te mau taote faataoto o ta tatou tuhaa fenua no te faaite ia ratou i te mau haamaramaramaraa hopea e vai ra no nia i te mau ravea monoraa i te pâmuraa toto. Ua ineine atoa ratou i te mau hora atoa i te ao e te po no te tauturu i to ratou mau taeae e tuahine mea tia ia tâpûhia. E mea faahiahia mau to ratou pûpûraa ia ineine i te tauturu e te hinaaro atoa nei matou e faaite i to matou mauruuru rahi ia ratou.

O te taviniraa maoti te faaiteiteraa afaifai te tahi atu tuhaa faahiahia roa o ta tatou ohipa o te matahiti taviniraa i mahemo na roto i te mau aroâ. Ua itehia te hoê manuïaraa papu o te reira e te turu anaanatae a te taata poro e pionie e rave rahi. Ua fa te mau faaiteiteraa i te vahi e rave rahi na te oire e eita te reira e moe a horoa ˈtu ai i te hoê faaiteraa i mua i te taata. Ua hoona atoa teie ohipa, no te mea aita noa i operehia e rave rahi vea, tera râ na roto i tera ravea, ua nehenehe e haamatahia e rave rahi haapiiraa bibilia na roto i tera ravea e te feia o tei ore i farereihia na mua ˈˈe.

E nehenehe e umere mau i tera ohipa itoito rahi atoa o te paturu i te mau faufaa a te Basileia. Mea mauruuru roa atoa no ta outou turu i te pae moni horoa noa. (Mas. 3:9, 10) Ia haamaitai noa Iehova i ta tatou mau tutavaraa amui no te ‘arue i to ˈna ra maitai’!—Eph. 1:12.

To outou mau taeae,

Amaa no Tahiti