Te hoê tairururaa mataeinaa o te faaitoito ia tatou ia haere e te Atua

“Teie te eˈa: e na reira i te haere”: ua faahiti-papu-hia teie aˈoraa maramarama a te Atua i te roaraa o te tairururaa mataeinaa “E haere anaˈe e te Atua.” (Isa. 30:21) Na tatou i teie nei e faaohipa i te haapiiraa tei noaa mai, ia ‘ara tatou ia tia te haerea,’ e ia feruriruri i ta tatou i haapii, no te ‘tamau i te haapao i te parau mau.’—Eph. 5:15; Ioa. 3, 3.

A faaohipa i te mau uiraa i muri nei ia au i ta outou mau tapaopaoraa no te faaineine i te haamanaˈoraa o te tairururaa mataeinaa i mairi aˈenei e no te apiti atu. E tupu te haamanaˈoraa i te Putuputuraa no te taviniraa i te hebedoma o te 18 no Atopa.

1. Mea nafea to Enoha manuïaraa i te haere e te Atua noa ˈtu e ua ora oia i te hoê tau arepurepu? (Heb. 11: 1, 5, 6; Iuda 14, 15; “A haere e te Atua i teie tau arepurepu”)

2. I roto i teihea mau tuhaa e tano ai te faaueraa tumu o te Luka 16:10? (“Mea ‘haapao maitai’ anei outou ‘i te mea iti’?”)

3. (a) A horoa e maha haapiiraa e tano o te Hosea pene 6 e tae atu i te pene 9 o te tauturu ia tatou ia haere e te Atua. (Hos. 6:6, 7; 7:14; 8:7) (b) Eaha te mau manaˈo hau o te Hosea pene 10 e tae atu i te pene 14 e tauturu ia tatou ia haere e te Atua? (“E tauturu mai te parau tohu a Hosea ia haere e te Atua,” oreroraa parau tatuhaahia)

4. Eaha ta te mau Kerisetiano faaipoipo e nehenehe e rave roa no te haapaari tamau i to ratou faaipoiporaa? (Mas. 12:4; Eph. 5:29; “Eiaha e faataa ê atu i ‘ta te Atua i taati’”)

5. E nafea tatou e faaite ai i te faatura i ta tatou mau haaputuputuraa moˈa? (Koh. 5:1; Isa. 66:23; “E faatura anaˈe i ta tatou mau haaputuputuraa moˈa”)

6. (a) Eaha na tuhaa faufaa e toru o ta tatou pororaa e mea tia ia hiˈopoa tatou no te haapapu e te apiti maitai atu ra tatou? (Isa. 52:7; Zek. 8:23; Mar. 6:34) (b) Eaha te mau tuhaa taa ê o te buka rairai Une bonne nouvelle pour des gens de toutes nations e mea faufaa roa no outou? (“Parau apî maitai no te taata o te mau nunaa atoa”; “Ma te tauturu i te feia e paraparau ra i te tahi atu reo”)

7. E nafea tatou e tauturu ai i te mau taata apî ia faaite i te poroi o te Basileia ma te tiaturi rahi atu â? (Tav. 7:17; “Ma te tauturu i te mau nahoa taata ia apiti i te taviniraa”)

8. E nafea tatou e faaite ai i to tatou tiaturiraa e “ua fatata te mahana rahi o Iehova?” (Zeph. 1:14; “E haerea faaroo, e ere i te haerea ite mata”)

9. (a) E mea ino anei ia turori aore ra ia faaturori? (Mar. 9:42-48) (b) E nafea ia ore e turori? (Sal. 119:165) (c) E nafea ia ore e faaturori? (Kor. 1, 10:24; “Eiaha e ‘tuu i te turoriraa’”)

10. E nafea tatou ia vai faito noa ia imi tatou i te hoê hoa faaipoipo, ia haapao i te ea aore ra ia rave i te mau ohipa tapihoo? (Sal. 26:4; Mat. 6:25; Tim. 1, 6:9; “Ia itoito”)

11. (a) I to Iesu titau-manihini-raahia, eaha to ˈna huru faahiahia? (Luka 10:42; 24:32) (b) E nafea tatou e haamâha ˈi i to tatou hinaaro e faaanaanatae o te tamahanahana ia tatou e te tahi atu? (Kor. 1, 10:31-33; “Te mau ohipa maitatai e tamahanahana”)

12. Ia au i te Salamo 23, ei mamoe a Iehova, eaha te mau haamaitairaa e noaa mai e eaha ta tatou mau hopoia? (Kor. 1, 10:21; “O Iehova to tatou Tiai”)

13. E nafea te mau Kerisetiano e pee ai i te aˈoraa faauruhia ‘e faaherehere maite i te taime’? (Eph. 5:16; “Ma te faaherehere maite i te taime”)

14. (a) Eaha te ‘hora faautuaraa’ i roto i te Apokalupo 14:7? (b) E nafea tatou e faaite ai e ua faataa ê mau tatou ia Babulonia Rahi? (“‘E ara’—ua tae i te hora faautuaraa”) (c) Eaha te mau tuhaa ta outou i au i roto i te buka rairai E ara!

15. A faahiti e toru huru maitai o te opani ia tatou ‘ia faarue i te eˈa mau.’ (Pet. 2, 2:15; “A ara eiaha ‘e faarue i te eˈa mau’”)

16. E nafea te mau taurearea e ape ai i te “eˈa o te paieti ore ra”? (Mas. 4:14; “Feia apî—a haere na te eˈa parau-tia”)

17. (a) Mea nafea to Paulo riroraa ei hiˈoraa faahiahia o te faaoromai? (Ohi. 14:19, 20; 16:25-33) (b) No te aha eiaha ˈi e mǎtaˈu i te mau enemi o te haamoriraa mau? (Darama e oreroraa parau “A poro faahope roa i teie tau noa ˈtu te patoiraa”)

18. Eaha te mau haamaitairaa e noaa mai i te feia e haere ra e te Atua? (“E hopoi mai te haereraa e te Atua i te mau haamaitairaa i teie nei e a muri noa ˈtu”)

Ia faaoti papu tatou e faaroo i te ‘parau i muri mai ia tatou’ no te haere e to tatou Metua i te raˈi e a muri noa ˈtu.—Isa. 30:21; Ioa. 3:36.