E tauturu Iehova i te feia e tiaturi ia ˈna
1 Te manaˈo nei te taata e rave rahi e o te moni, te mana e te aravihi taata te taviri o te manuïaraa. (Sal. 12:4; 33:16, 17; 49:6) Ua ite râ te feia e mǎtaˈu ia Iehova e e tiaturi ia ˈna, mai ta te Bibilia e parau ra, e “oia to ratou tauturu e to ratou paruru.” (Sal. 115:11) E hiˈo tatou e piti tuhaa e titauhia ˈi ia tatou ia faaite i to tatou tiaturi ia Iehova.
2 Ei tavini Kerisetiano: I te mau taime atoa e horoa ˈi tatou i te hoê tumu parau i mua i te amuiraa aore ra e haapii ai tatou i roto i te pororaa, e mea titauhia ia tiaturi tatou i to tatou Atua. A haamanaˈo ia Iesu. Noa ˈtu e e Tamaiti o ˈna na te Atua, aita o ˈna i tiaturi i to ˈna iho paari aore ra aravihi, ua tiaturi roa râ oia i to ˈna Metua i te raˈi. (Ioa. 12:49; 14:10) E hau atu â ïa tatou i te titauhia ia na reira atoa! (Mas. 3:5-7) Maoti noa i te haamaitairaa a Iehova e faahanahana ˈi ta tatou mau tutavaraa haihai i to tatou Atua Poiete e e faufaahia ˈi vetahi ê.—Sal. 127:1, 2.
3 Te faaite nei tatou e te tiaturi nei tatou ia Iehova ia pure tatou ia noaa ta ˈna aratairaa e te tauturu a to ˈna varua moˈa. (Sal. 105:4; Luka 11:13) Te faaite atoa nei tatou i to tatou tiaturi ia ˈna ma te niu i ta tatou haapiiraa i nia i ta ˈna Parau. E mana to te poroi bibilia no te haaputapû i te aau e no te taui i te oraraa. (Heb. 4:12) Ia ‘[tavini] tatou ia au i [te puai] ta te Atua e horoa,’ te faahanahanahia ra ïa o Iehova.—Pet. 1, 4:11; MN.
4 Ia faaruru i te mau fifi: E mea tia atoa ia ani tatou i te tauturu a Iehova i roto i te mau tupuraa fifi. (Sal. 46:1) Ei hiˈoraa, peneiaˈe eita to tatou paoti e hinaaro e horoa mai i te mahana faaearaa ohipa no te apiti i te hoê tairururaa, aore ra e fifi utuafare to tatou. E faaite ïa tatou i to tatou tiaturi ia Iehova ma te pure uˈana ia ˈna e ma te haafaufaa i te aratairaa ta ˈna e horoa na roto i ta ˈna Parau e ta ˈna faanahonahoraa. (Sal. 62:8; 119:143, 173) Te ite nei te mau tavini a te Atua o te na reira nei e, i roto i to ratou oraraa i te mau mahana atoa, te tauturu nei Iehova ia ratou.—Sal. 37:5; 118:13, 16.
5 O Iehova iho teie e parau nei e: “E ao to te taata i tiaturi ia Iehova, o to ˈna ïa uruairaa mau o Iehova.” (Ier. 17:7) E faaite anaˈe ïa e te tiaturi nei tatou ia ˈna i roto i te mau mea atoa ta tatou e rave nei!—Sal. 146:5.