Te tauturu nei te mau melahi ia tatou
1 “Inaha, tei pihai atoa iho ïa vau ia outou [i te mau mahana atoa], e tae noa ˈtu i te hopea o teie nei ao.” Auê ïa parau faaitoito no te feia atoa e pee nei i teie faaueraa a Iesu: “E teie nei, e haere outou e faariro i te mau fenua atoa ei pǐpǐ.” (Mat. 28:18-20; MN) Tei pihai iho Iesu i te mau Kerisetiano mau, na roto iho â râ i ta ˈna mau melahi. (Mat. 13:36-43) Auê i te faahiahia ia faaite, ma te tahoê, i “te evanelia e tia i te vairaa” i te pae o teie mau mea ora varua haapao maitai!—Apo. 14:6, 7.
2 I roto i ta tatou taviniraa: Te faaite nei te Bibilia e ua tonohia te mau melahi “ei tiai i te feia e noaa ia ratou te aiˈa ra i te ora.” (Heb. 1:14) I te senekele matamua, i nia i te tahi faito, na te mau melahi i aratai i te mau pǐpǐ a Iesu i te feia e au ia ratou ia faaroo i te poroi. (Ohi. 8:26) I teie nei â, te ite nei te mau tavini a te Atua e te aratai nei te mau melahi i te mau mea. E pinepine te feia i tatara mai i te opani i te parau e ua ani ratou i te tauturu a te Atua na mua noa ˈˈe ratou a tae atu ai! Auê ïa oaoaraa no tatou, e no te mau melahi atoa ia faaroo tera mau taata i te poroi o te Basileia!—Luka 15:10.
3 I mua i te patoiraa: Ua paruru Iehova na roto i te arai o te mau melahi “tei hau i te puai,” ia Daniela, to ˈna na hoa apî Hebera e toru, te aposetolo Petero e te tahi atu â a faaruru ai ratou i te mau tamataraa rahi. (Sal. 103:20; Dan. 3:28; 6:21, 22; Ohi. 12:11) Noa ˈtu e i te tahi taime e mea paruparu paha tatou i mua i te feia e patoi ia tatou, e nehenehe tatou e faaitoitohia maoti te hiˈoraa o te tavini a Elisaia, o tei ite e “e rahi to tatou e iti to ratou.” (Arii 2, 6:15-17) Noa ˈtu e ua faataa-ê-hia tatou ma te faahepohia i to tatou mau taeae Kerisetiano, eiaha tatou ia ere i te tiaturiraa. Te haapapu maira te Parau a te Atua e: “Te patia nei te melahi a Iehova i te puhapa e ati noa ˈˈe i te feia i mǎtaˈu ia ˈna.”—Sal. 34:7.
4 E fatata te mau nuu melahi i te haere mai na nia i te puaahorofenua no te faaore i te mau patoiraa atoa i te tiaraa arii o te Mesia. (Apo. 19:11, 14, 15) A tiai ai tatou i taua mahana ra, ia tamau tatou i te arue ma te itoito ia Iehova, ma te tiaturi roa i te turu puai a te mau nuu i te raˈi i raro aˈe i te faatereraa a te Mesia!—Pet. 1, 3:22.