Te maa varua i te taime tano
1. E nafea te Ezekiela 36:29 e tupu ai i teie mahana?
1 “E na ˈu . . . e parau i te sitona, na ˈu e faarahi, e ore au e hopoi atu i te oˈe i nia ia outou,” o te parau ïa a te Arii e Fatu ra o Iehova. (Ezek. 36:29) Te tano nei tera mau parau tohu i to te Atua nunaa i teie mahana. Ei auraa taipe, ua faatupu rahi Iehova i te maa sitona ia nehenehe to ˈna feia haamori ia ora noa. Te faahohoˈa maitai ra te maa varua operehia i te taime mau ra i ta tatou mau tairururaa mataeinaa i taua tupuraa ra.
2. E nafea Iehova e faaohipa ˈi i te mau tairururaa mataeinaa no te horoa mai i te maa varua i te taime tano?
2 I te tairururaa i tupu i Columbus, i Ohio, i te matahiti 1931, ua aratai Iehova i to ˈna feia haamori ia amo ratou i te hoê iˈoa apî—Ite no Iehova. (Isa. 43:10-12) I te matahiti 1935 te ite-papu-raahia te feia rahi roa o te Apokalupo 7:9-17. I te matahiti 1942, ua horoa o Taeae Knorr i te oreroraa parau ra “Te hau—e vai maoro anei?” Ua faaitoito atu â tera oreroraa parau i te ohipa pororaa taatoa e ua faatupu i te haamauraa o Gileada, te Haapiiraa bibilia a te Watchtower. Noa ˈtu e e haamanaˈo-taa-ê-hia aˈe te tahi mau tairururaa i te tahi atu, te pûpû nei te tairururaa taitahi i te hoê amuraa maa î i te maa varua maitai operehia i te taime mau.—Sal. 23:5; Mat. 24:45.
3. Eaha te mea tia ia rave e faufaahia ˈi tatou i te amuraa maa pae varua operehia i ta tatou tairururaa mataeinaa?
3 Te tamaa maitai ra anei outou? E nehenehe tatou e haaatihia e te maa e e ore râ tatou e amu maitai mai te peu e eita tatou e faaitoito i te amu. (Mas. 26:15) E mea mau atoa i te pae varua. I te tahi mau tairururaa, ua itehia e i te roaraa o te porotarama e rave rahi o te ori noa ra aore ra o te tauaparau ra. Noa ˈtu e e tuhaa faufaa te aparauraa o te patu ia tatou o te tairururaa, e “taime” to te reira na mua ˈˈe e i muri aˈe i te rururaa taitahi. (Koh. 3:1, 7) Mai te peu e aita tatou i to tatou parahiraa a faaroo maitai ai, e nehenehe tatou e ere i te hoê manaˈo faufaa. E nehenehe te mau tiaau o te hoê tuhaa tairururaa e te mau taeae o te apiti i te porotarama e ite i te faufaaraa i te tahi taime ia tauaparau i te mau ohipa o te tairururaa a tupu ai te mau rururaa. Taa ê atu i te reira, e mea tia ia horoa ratou i te hiˈoraa ma te faaroo maitai. Eiaha hoê o tatou ia ere i te tahi noa ˈˈe maa varua i horoahia mai.—Kor. 1, 10:12; Phil. 2:12.
4. E nafea tatou e nehenehe ai e mauruuru roa no te rahiraa maa varua ta Iehova e horoa ra?
4 Auê tatou i te oaoa i te pue parau mau pae varua rahi ta Iehova e horoa ra, tei taa ê roa i te mau haapiiraa hape paia ore a te Amuiraa faaroo Kerisetiano! (Isa. 65:13, 14) Hoê ravea e nehenehe ai tatou e ‘mauruuru roa i te Atua,’ o te faariroraa ïa i te tairururaa ei ravea e haapiihia ˈi tatou e Iehova. (Kol. 3:15) A hiˈo na nia ˈˈe i te taeae e horoa ra i te oreroraa parau, e a ite e no ǒ roa mai te poroi i to tatou “Orometua Rahi roa ˈˈe.” (Isa. 30:20, 21, MN; 54:13) A faaroo maitai. A tapao poto noa i te mau manaˈo faufaa. A hiˈo faahou i te mau manaˈo faufaa o te porotarama i te mau po atoa. A faaohipa i ta outou i haapii.
5. Eaha te mau tumu e oaoa ˈi tatou ta te mau tairururaa mataeinaa e horoa mai?
5 E upootiaraa i nia ia Satani te tairururaa taitahi hou Aramagedo, faatupuhia i roto anei i te hoê puhapa feia horo ê, i te hoê fenua amahamaha i te tamaˈi, aore ra i te hoê vahi hau roa! Ei hui taeae tahoêhia, e poihere tatou i te neheneheraa tatou e amui paatoa i te mau tairururaa mataeinaa. (Ezek. 36:38) E tiaturi tatou e e tuu mai â Iehova ma te here i te “tufaa maa i te tufaraa mau ra.”—Luka 12:42.
[Tumu parau tarenihia i te api 4]
To outou mauruuru no te amuraa maa a Iehova
◼ A faaroo maitai
◼ A tapao i te mau manaˈo faufaa
◼ A hiˈo faahou i te mau manaˈo faufaa o te porotarama i te mau po atoa
◼ A faaohipa i ta outou i haapii