“Tatou atoa te faateitei i to ˈna iˈoa”
1. Eaha te ravea e vai ra ia tatou no te faateitei amui i te iˈoa o te Atua, e e nafea tatou e faaineine ai i teie nei?
1 “E haamaitai tatou ia Iehova; tatou atoa te faateitei i to ˈna iˈoa,” ta te fatu salamo ïa i himene. (Sal. 34:3) E ravea ta tatou tairururaa mataeinaa i mua nei “E haere anaˈe e te Atua” no te faateitei amui i te iˈoa o Iehova e to tatou mau taeae e tuahine no e rave rahi amuiraa. Ua rave anei outou i te mau faanahoraa no te nohoraa, te faurao, e no te mau mahana faaearaa ohipa? E mea paari ia haapao oioi tatou i te reira.—Mas. 21:5.
2. No te aha e mea faufaa ˈi ia faanaho no te tae oioi i te vahi tairururaa?
2 Ia tae tatou i te vahi tairururaa: E rave rahi ohipa ta tatou e ara ia tae tatou i te hoê tairururaa. E tauturu te haere-oioi-raa i te tairururaa ia ore tatou ia taere e ia nehenehe e parahi i to tatou parahiraa i te taime tano no te amui ma te aau tae i te himene e te pure haamataraa. (Sal. 69:30) Tau minuti na mua ˈˈe e haamata ˈi te rururaa, e haere te peretiteni e parahi i nia i te tahua a taˈi ai te upaupa o te Basileia. E mea tia ia parahi oioi tatou atoa ia nehenehe te porotarama e haamata ma te tura.—Kor. 1, 14:33, 40.
3. E nafea tatou e faaite ai e te haapao ra tatou ia vetahi ê ia imi tatou i te parahiraa?
3 Te aˈo ra te Parau a te Atua ia tatou “ia ravehia te mau mea atoa i roto ia outou na ma te aroha.” (Kor. 1, 16:14) Ia matara te mau opani i te poipoi, e tapea te haapaoraa ia vetahi ê ia tatou eiaha ia turai, ia horo, ia turairai no te haru i te parahiraa ta tatou e au. E nehenehe te mau parahiraa e faataahia no te feia noa e tere e o outou i roto i to outou pereoo aore ra e ora ra e o outou i te hoê â fare.—Kor. 1, 13:5; Phil. 2:4.
4. Eaha te mau faanahoraa no te taime tamaaraa, e e nafea te reira e faufaahia ˈi?
4 A afai mai na i ta outou maa ia ore outou e faarue i te vahi tairururaa no te hoo mai i te maa i te taime faafaaearaa. E tauturu ïa te reira i te taatoaraa ia oaoa i te amuimuiraa maitai o te patu e ia tae atu i te haamataraa iho â te rururaa i te taperaa mahana. Mai te peu e e titauhia, e nehenehe e rave i te hoê farii faatoetoeraa maa nainai e nehenehe e tuu i raro aˈe i te parahiraa. Eita te mau farii faatoetoeraa maa rarahi, te mau farii hiˈo e te ava e fariihia i te vahi tairururaa.
5. Eaha tei faanahohia no te feia tariˈa turi?
5 I te tairururaa mataeinaa e tupu i te 23 e tae atu i te 25 no Tiurai Erratum: 16 e tae atu i te 18 no Tiurai 2004 i te Piha tairururaa i Toahotu, e horoahia e rave rahi oreroraa parau na roto i te reo aparaa rima no te feia tariˈa turi. E tauturu taua faanahoraa ra i te feia tariˈa turi ia fanaˈo i te tahi mau tuhaa o te porotarama.
6. E nafea tatou e faatano maite ai i to tatou aau i te mau haapiiraa ta tatou e fanaˈo?
6 E amuraa maa pae varua te tiai maira ia tatou: O te arii Iehosaphata te hoê o tei ‘tano maite to ˈna aau i te imi i te Atua.’ (Par. 2, 19:3) E nafea tatou e faatano maite ai i to tatou aau hou te tairururaa? Te horoa ra te mau tumu parau o te mau api hopea o te Réveillez-vous! o te 22 no Me e te 8 no Tiunu i te hoê haapotoraa o te amuraa maa pae varua e tuuhia mai. No te aha e ore ai e rave i te taime no te feruriruri i taua mau tumu parau ra, no te faatupu i te anaanatae no ta Iehova e faanaho ra no tatou? E titau atoa te faatano-maite-raa i to tatou aau ia ani ia Iehova ia tauturu mai ia maramarama i te auraa o te mau haapiiraa ta tatou e fanaˈo e ia faaohipa ˈtu.—Sal. 25:4, 5.
7. Eaha to tatou hinaaro, e no te aha?
7 Te hinaaro ru ra tatou paatoa e haapii atu â no nia i te Parau a te Atua, ma te ite e maoti te reira e paari ai tatou. (Pet. 1, 2:2) No reira, ia tae mau tatou i ta tatou tairururaa mataeinaa “E haere anaˈe e te Atua” e ia ‘faateitei tatou atoa i te iˈoa o Iehova.’—Sal. 34:3.
[Tumu parau tarenihia i te api 3]
Ravea no te faateitei i te iˈoa o te Atua
◼ Te faaineine-oioi-raa
◼ Te faaiteraa i te here ia vetahi ê
◼ Te faatano-maite-raa i to outou aau