Te hoê ohipa turuhia e te Atua
1 E mea iti te tavini a te Atua i fanaˈo i te hoê haapiiraa faahiahia, te taoˈa aore ra te hoê tiaraa teitei i roto i teie faanahoraa o te mau mea. No reira te tahi mau taata e vahavaha ˈi i ta tatou taviniraa. (Isa. 53:3) Ua hopoi râ ta tatou ohipa haapiiraa bibilia i te tamǎrûraa e te tiaturiraa na te mau mirioni taata na te ao nei. Mea nafea i noaa ˈi i te mau taata au noa te mau faahopearaa faahiahia? Maoti noa ïa te turu a te Atua. (Mat. 28:19, 20; Ohi. 1:8) Ua faataa te aposetolo Paulo e “ua maiti . . . te Atua i te mea paruparu o te ao nei ei faahaamaraa ˈtu i te feia puai.”—Kor. 1, 1:26-29.
2 No te rahiraa, ‘e taata haapii-ore-hia e te itea ore’ te mau aposetolo e te tahi atu mau Kerisetiano no te senekele matamua. (Ohi. 4:13) Teie râ, ua rave ratou ma te itoito i ta ratou ohipa faauehia e poro i te parau apî maitai, e ua haamaitai Iehova i ta ratou mau tutavaraa. Noa ˈtu te mau haafifiraa e te patoiraa, ‘ua tupu noa te parau a Iehova i te rahi e ua vai puai noa ma te mana.’ Aita e mea e tia ia tapea i te ohipa no te mea ua turuhia te reira e te Atua. (Ohi. 5:38, 39; 19:20, MN) Oia atoa i to tatou nei tau. Aita atoa te patoiraa uˈana a te feia faatere mana i haafifi i te parau apî maitai ia puai e ia tupu i te rahi.—Isa. 54:17.
3 No te Atua te hanahana atoa: E tano anei ia faaahaaha tatou no to tatou tupuraa taa ê ei tavini a te Atua? Mea papu e e eita. Ua papai o Paulo no nia i te taviniraa Kerisetiano e: “Te farii nei . . . matou i taua taoˈa nei i te farii repo nei, ia riro te mana rahi maitai ra i te Atua, eiaha ia matou.” (Kor. 2, 4:7) Ua taa ia Paulo e e nehenehe o ˈna e rave i ta ˈna taviniraa na roto noa i te puai ta te Atua i horoa ia ˈna.—Eph. 6:19, 20; Phil. 4:13.
4 Ua ite atoa tatou e auaa noa e ua “turuhia” tatou “e te Atua” i ravehia ˈi te ohipa pororaa i teie nei mahana. (Ohi. 26:22) Na roto i te pororaa na te ao nei, te faaohipa nei Iehova ia tatou ma te puai no te faaaueue i te mau nunaa, ei tapao no te haamouraa e fatata maira i te mahana haavaraa. (Hag. 2:7) Auê ïa fanaˈoraa taa ê e e ‘hoa rave ohipa tatou no te Atua’ i roto i te ootiraa rahi pae varua!—Kor. 1, 3:6-9.