Te haere-tamau-raa i te mau putuputuraa: te hoê fa matamua
1 O te haere-tamau-raa i te mau putuputuraa te fa matamua a te mau utuafare Kerisetiano. Teie râ, i teie mahana te faatupu nei te mau titauraa o te oraraa i te tahi taime i te mau fifi. Te rave riirii ra anei ta tatou ohipa fare, ta tatou ohipa aore ra ta tatou ohipa haapiiraa i te taime faataahia no te haamori ia Iehova? E tapea maite tatou i ta tatou mau fa matamua ia hiˈo tatou i te mau mea ia au i ta Iehova hiˈoraa.—Sam. 1, 24:6; 26:11.
2 I te hoê mahana, aita te hoê ati Iseraela i haapao i ta Iehova hiˈoraa ma te ohi haere i te raau i te mahana Sabati. Peneiaˈe ua manaˈo o ˈna e te haapao ra oia i te mau hinaaro o to ˈna utuafare, aore ra e ere i te haapaoraa ohipa. Na roto râ i te haavaraa a Iehova, ua faaite oia e mea ino ia rave i te mau ohipa au noa i te taime faataahia no te haamoriraa.—Num. 15:32-36.
3 E nafea ia faaruru i te mau fifi: E rave rahi taata e aro nei ia ore ta ratou ohipa e haafifi ia ratou ia haere i te mau putuputuraa. Ua aparau atu te tahi pae e to ratou paoti, ua taui i ta ratou ohipa e to ratou mau hoa ohipa, ua imi i te hoê ohipa tano aˈe aore ra ua faaohie i to ratou huru oraraa. Papu roa, mea au na te Atua taua mau haapaeraa ra no te haamoriraa mau.—Heb. 13:16.
4 E nehenehe atoa te mau ohipa haapiiraa e riro ei fifi. “E rave au i te hoê tuhaa o ta ˈu ohipa haapiiraa na mua ˈˈe i te putuputuraa e te toea ia hoˈi au i te fare,” ta te hoê potii Kerisetiano ïa e parau ra. Ia ore te ohipa haapiiraa a ta ratou mau tamarii e oti roa i te mau po putuputuraa, ua faataa te tahi mau metua i te mau orometua haapii e e fa matamua te haereraa i te mau putuputuraa Kerisetiano no to ratou utuafare.
5 E mea titauhia te faanahonahoraa e te haa-amui-raa no te rave i te mau ohipa fare ia tae te taatoaraa o te utuafare i te mau putuputuraa. (Mas. 20:18) E nehenehe atoa te mau tamarii apî e haapii i te oomo i te ahu e i te ineine no te haere i te putuputuraa i te hora faataahia. Na roto i to ratou hiˈoraa, e nehenehe te mau metua e faataa i ta ratou mau tamarii i te faufaaraa o te mau putuputuraa.—Mas. 20:7.
6 A maraa ˈi te mau faaheporaa a teie nei faanahoraa o te mau mea, e mea faufaa roa ia haere tamau tatou i te mau putuputuraa a te amuiraa. Ia tamau noa tatou i te hiˈo i te mau mea ia au i ta Iehova hiˈoraa e ia riro noa te haere-tamau-raa i te mau putuputuraa ei fa matamua!—Heb. 10:24, 25.