E ahu anaˈe i te haehaa
1 Te tiaturi nei te hoê tiai mamoe apî ia Iehova e te aro nei oia i te hoê taata tamaˈi puai. (Sam. 1, 17:45-47) Te faaoromai nei te hoê taata ona i te ati. (Ioba 1:20-22; 2:9, 10) Te arue nei te Tamaiti a te Atua i to ˈna Metua no ta ˈna haapiiraa. (Ioa. 7:15-18; 8:28) I roto i na hiˈoraa e toru, e tuhaa faufaa roa te haehaa. Hoê â i teie tau, e mea faufaa roa te haehaa i roto i te mau tupuraa rau ta tatou e farerei nei.—Kol. 3:12.
2 I roto i te pororaa: Ei tavini Kerisetiano, te tufa nei tatou ma te haehaa i te parau apî maitai na te mau huru taata atoa, ma te ore e haava oioi ia ratou i nia i to ratou iri, taˈere, aore ra huru oraraa. (Kor. 1, 9:22, 23) Ia ore te tahi mau taata e faatura mai aore ra ia patoi mai ratou i te poroi o te Basileia ma te teoteo, eita tatou e tahoo, e tamau râ tatou i te imi ma te faaoromai i te feia e au. (Mat. 10:11, 14) Eaha e tamata i te haamaere ia vetahi ê i to tatou aravihi aore ra ite, e huti râ tatou i to ratou ara-maite-raa i nia i te Parau a te Atua, ma te ite e e mea papu aˈe i ta tatou mau parau. (Kor. 1, 2:1-5; Heb. 4:12) Mai ia Iesu, e faatae tatou ia Iehova ra i te mau arueraa atoa.—Mar. 10:17, 18.
3 I roto i te amuiraa: E mea tia ‘ia ahu’ te mau Kerisetiano “i te haehaa.” (Pet. 1, 5:5) Ia hiˈo tatou i to tatou mau taeae ei mea rahi aˈe ia tatou, e imi ïa tatou i te mau ravea e tavini ai ia ratou eiaha râ e tiai e na ratou e na reira mai. (Ioa. 13:12-17; Phil. 2:3, 4) Eiaha tatou e manaˈo e ua faaerehia tatou i te ohipa mai te tamâraa i te Piha a te Basileia.
4 E tauturu te haehaa ia tatou ia ‘faaoromai te tahi i te tahi ma te aroha,’ e e paturu hoi i te hau e te auhoêraa i roto i te amuiraa. (Eph. 4:1-3) E tauturu ia tatou ia auraro i te feia i faatoroahia no te aratai ia tatou. (Heb. 13:17) E turai te reira ia tatou ia farii i te mau faaueraa e te aˈoraa e horoahia mai. (Sal. 141:5) E faaitoito atoa ia tatou ia tiaturi ia Iehova no te haapao i te mau fanaˈoraa taa ê i horoahia mai i roto i te amuiraa. (Pet. 1, 4:11) Mai ia Davida, te taa ra ia tatou e eita te manuïaraa e noaa i te mana o te taata i te haamaitairaa râ a te Atua.—Sam. 1, 17:37.
5 I mua i to tatou Atua: Hau roa ˈtu â, e mea tia ia “faahaehaa ia [tatou] iho i raro aˈe i te rima mana o te Atua.” (Pet. 1, 5:6) Mai te peu e e roohia tatou i te hoê tupuraa fifi mau, e tiai ru paha tatou i te tamǎrûraa a te Basileia. E tauturu râ te haehaa ia tatou ia tiai ma te faaoromai ia faatupu Iehova i ta ˈna mau parau fafau i te taime ta ˈna i faataa. (Iak. 5:7-11) Mai ia Ioba tei taiva ore, ta tatou tapitapiraa matamua o te ‘haamaitairaa ïa i te iˈoa o Iehova.’—Ioba 1:21.
6 No te mea ua ‘faahaehaa’ te peropheta Daniela ‘ia ˈna iho i mua i te aro o te Atua,’ ua fanaˈo oia i te farii maitai a Iehova e te fanaˈoraa taa ê e rave rahi. (Dan. 10:11, 12) Mai ia ˈna, e ahu anaˈe i te haehaa, ma te ite e “te utua o te faahaehaa e te mǎtaˈu ia Iehova, o te taoˈa rahi ïa, o te tura ïa, o te ora ïa.”—Mas. 22:4.