Te taviniraa Kerisetiano: ta tatou ohipa matamua
1 E mau ohipa rau ta tatou paatoa o te ore e nehenehe e ape. Ei hiˈoraa, e titauraa na te Atua te haapaoraa i te mau hinaaro o to ˈna utuafare. (Tim. 1, 5:8) Eiaha râ te ohipa hinaarohia no te haapao i taua titauraa ra e haamoe ia tatou i te ohipa pororaa i te Basileia e te faariroraa i te taata ei pǐpǐ.—Mat. 24:14; 28:18, 19.
2 Ua vaiiho mai Iesu i te hoê hiˈoraa e pee no nia i te ‘mataraa i te imi i te basileia.’ (Mat. 6:33; Pet. 1, 2:21) Ua faataa o ˈna i to ˈna taime taatoa no te rave i te hinaaro o to ˈna Metua noa ˈtu â e mea iti ta ˈna i te pae materia. (Luka 4:43; 9:58; Ioa. 4:34) Ua tutava oia i te horoa i te faaiteraa i te mau taime atoa. (Luka 23:43; Tim. 1, 6:13) E ua aˈo oia i ta ˈna mau pǐpǐ ia faatupu i te hoê â aau tae no te ohipa auhune.—Mat. 9:37, 38.
3 E pee anaˈe ia Iesu: E nehenehe tatou e pee i te hiˈoraa o Iesu ma te faaitoito i te faaohie i te oraraa niuhia i nia i te taviniraa Kerisetiano. Mai te peu e ua mâha to tatou mau hinaaro faufaa, e pee anaˈe i te aˈoraa bibilia eiaha e imi i te titau rahi atu â i te taoˈa. (Mat. 6:19, 20; Tim. 1, 6:8) E mea au aˈe e imi i te faarahi i ta tatou apitiraa i roto i te ohipa pororaa. Mai te peu e e mea iti ta tatou i te pae moni, e tutava anaˈe i te ohipa mai ia Iesu, ma te ore e vaiiho i te mau tapitapiraa o te oraraa ia haamoe ia tatou i ta tatou ohipa matamua: te faaiteraa i te parau apî maitai o te Basileia.—Luka 8:14; 9:52-62.
4 E tuu atoa te mau taata e mea rahi ta ratou hopoia i te ohipa pororaa i te parahiraa matamua. Te parau ra te hoê taeae e utuafare rahi to ˈna, e hopoia rahi ta ˈna e e matahiapo o ˈna i roto i ta ˈna amuiraa e: “E hiˈo vau i te taviniraa ei toroa no ˈu.” Area te hoê tuahine pionie, te parau ra ïa e: “Aita hoê aˈe toroa hanahana e aifaito i te taviniraa pionie.”
5 Noa ˈtu eaha to tatou huru tupuraa, e pee anaˈe i te hiˈoraa o Iesu. E nafea? Ma te faariro i te taviniraa Kerisetiano ei ohipa matamua na tatou.