Te pororaa i roto i te hoê ao e taui noa
1 Auê te ao nei i te taui oioi e! Ma te tupu taue, e nehenehe te hoê ati natura, te hoê fifi i te pae faanavairaa faufaa, te arepurepuraa i te pae poritita aore ra te hoê peapea i paraparau-rahi-hia e riro ei tumu parau tauaparauraa. Tera râ, e huri oioi atoa te mau taata i to ratou ara-maite-raa i nia i te tahi atu ohipa. (Ohi. 17:21; Kor. 1, 7:31) I roto i teie nei ao e taui noa, e nafea ia huti i te ara-maite-raa o to tatou taata-tupu a nehenehe atu ai e faaite i te poroi o te Basileia?
2 E ite anaˈe i to ratou mau haapeapearaa: Te hoê ravea maitai no te huti i te ara-maite-raa o te paraparauraa ïa i te mau tupuraa apî. Ei hiˈoraa, ua faahiti o Iesu i te hoê mahana i te mau fifi o tei vai noâ i roto i te feruriraa o te feia e faaroo ra ia ˈna ia feruri maite ratou i to ratou roo i mua i te Atua. (Luka 13:1-5) Ia poro atoa tatou i te parau apî maitai, e mea au ia faahiti i te hoê tupuraa apî aore ra i te hoê tumu parau no te fenua nei o te haaputapû i te mau taata o ta tatou tuhaa fenua. Ia ara râ tatou eiaha e paturu i te mau tumu parau poritita aore ra totiare.—Ioa. 17:16.
3 E nafea ia ite eaha te haapeapea ra i te mau taata i te taime e farerei ai tatou ia ratou? Te ravea maitai aˈe o te uiraa ˈtu paha ia ratou e te faarooraa ˈtu i ta ratou pahonoraa. (Mat. 12:34) E turai to tatou anaanatae i te feia e faaroo ra ia tatou ia haapao i to ratou manaˈo e ia ui i te tahi atu mau uiraa ma te faatano i te parau. E faahiti ohie paha te hoê taata i te mau tapitapiraa o te feia e rave rahi o te tuhaa oire e e horoa mai o ˈna i te hoê omuaraa parau ineine noa.
4 E faaineine anaˈe i te hoê faaiteraa: I mua i te faaineineraa ia tatou e poro i roto i te hoê ao e taui noa, te horoa maira te buka ra Haaferuriraa i te mau manaˈo tauturu, te ravea iho â râ e faahiti ai i te mau tupuraa apî i roto i ta tatou faaiteraa. E nehenehe tatou ei hiˈoraa e hiˈopoa i te mau tumu parau “Parau apî” e “Taparahiraa taata/Oraraa ma te ino ore,” i te mau api 13-4. Te vai ra te tahi atu mau manaˈo i roto i Ta tatou taviniraa i te Basileia no Tetepa 2000, api 4. Eiaha e haamoe i te faaineine i te taio i te hoê irava e tano i roto i ta tatou faaiteraa.
5 Ia haapao tatou i te mau tapitapiraa e taui noa o te mau taata o ta tatou tuhaa fenua, e mea tia iho â ia faatano tatou i ta tatou faaiteraa i te parau apî maitai. Ia na reira tatou, e paraparau tatou i ta ratou e tapitapi ra, e e tauturu atoa tatou e rave rahi atu taata ia ite i Tei ore e taui i te mau huru maitatai e te mau ture aveia.—Iak. 1:17.