Ia riro tatou ei hiˈoraa o te mau ohipa maitatai
1. No te aha tatou e haapao maitai ai i to tatou haerea i te tairururaa mataeinaa?
1 Ia ruru rahi tatou i te mau tairururaa mataeinaa, e ite te taata i to tatou haerea e to tatou huru i nia ia vetahi ê. No reira e titauhia ˈi ia haapao maite tatou i teie faaararaa bibilia: ‘Ei aau aoaoa ore to oe, ia riro oe ei hiˈoraa o te mau ohipa maitatai atoa ra.’ (Tito 2:6, 7) E mea titauhia paha ia tutava taa ê tatou ‘eiaha e haapao i ta tatou anaˈe ra, e haapao atoa râ i to vetahi ê ra maitai.’ (Phil. 2:4) E hiˈo mai tatou i te tahi mau tuhaa e auraro ai tatou i teie aˈoraa i ta tatou tairururaa mataeinaa i mua nei “A faahanahana i te Atua.”
2. Eaha te haamanaˈo no nia i te nohoraa?
2 Nohoraa: E fanaˈo tatou i te hoê taime maitai roa no te faahotu i te mau ohipa maitatai ia rave tatou i te mau faanahoraa no te nohoraa. A tarahu noa i te piha ta outou i opua i te rave. I te hotera, mai te peu e e mea rahi tatou e tiai ra i ta tatou taviri aore ra i te aufau, e tutava tatou i te faaite i te hotu a te varua o te Atua. (Gal. 5:22, 23) Ei hiˈoraa, eita paha te tahi pae e fanaˈo i te hoê piha no te feia puhipuhi ore i te avaava, noa ˈtu e ua ani atu ratou.
3. E nafea e ‘hamani maitai ai i te taata atoa’ i te hotera?
3 Mai te peu e e pûpûhia mai te inuraa taofe tamoni ore, e tâuˈa tatou ia vetahi ê ma te faaite i te manaˈo maruhi. Eita e tano ia afai i te tairururaa i te maa i faaineinehia no te mau hoani o te hotera. Te faaitoitohia ra tatou ia haapao maite i te faatureraa a te hotera e ia faatura i te mau rave ohipa. Mea na reira tatou e ‘hamani maitai ai i te taata atoa’ e horoa ˈtu ai i te hoê faaiteraa maitai.—Gal. 6:10.
4, 5. E nafea te mau tamarii e faahanahana ˈi ia Iehova, e eaha te hopoia a te mau metua?
4 Metua e tamarii: Te faahanahana ra ta tatou mau tamarii ia Iehova e ta ˈna faanahonahoraa ma te faataa ê mai ia ratou i te taatoaraa o te feia apî etene roa o te ao. Ua tupu mai râ te fifi i te tahi taime no te mea aita te mau tamarii i haapao-maitai-hia. (Mas. 29:15) E mea maitai ia haapao noa te mau metua i ta ratou mau tamarii, i te hotera anei, tae noa ˈtu i te vahi hopuraa pape, aore ra i te vahi tairururaa.
5 Ua manaˈo te tahi mau metua e mea faufaa, hou te tairururaa, ia haamanaˈo i ta ratou mau tamarii i te haerea e titauhia ia ratou. (Eph. 6:4) E faataa ˈtu ratou e “eita” te here Kerisetiano mau “e rave i te mea au ore” e “eita e imi i te maitai no ˈna iho.” (Kor. 1, 13:5) E taime fanaˈo roa te tairururaa mataeinaa e haapii ai o Iehova ia tatou. E faatura ïa te mau tamarii e te feia paari atoa i tera faanahoraa ma te faaite i te haerea maitai, eiaha noa i te vahi tairururaa, i rapaeau atoa râ.—Isa. 54:13.
6. Eaha te faahopearaa o to tatou haerea maitai i nia ia vetahi ê?
6 E tauturu rahi to tatou haerea maitai i te faaafaro i te mau manaˈo hape e i te faatae i te taata i te haamoriraa mau ra. (Mat. 5:16; Pet. 1, 2:12) Ia horoa ïa tatou, i ta tatou tairururaa mataeinaa, i te faaiteraa maitai i te feia atoa ta tatou e farerei, i roto i to tatou haerea e to tatou huru i nia ia ratou! Mea na reira ïa tatou ‘e riro ai ei hiˈoraa o te mau ohipa maitatai’ e faahanahana ˈtu ai ia Iehova.—Tito 2:7.
[Tumu parau tarenihia i te api 4]
A tâuˈa ia vetahi ê
▪ A tarahu noa i te piha ta outou i opua i te rave
▪ A faaoromai ia tae outou i te hotera e ia reva outou
▪ Eiaha e faaohipa hua i te inuraa taofe tamoni ore
▪ A haapao maitai i ta outou mau tamarii