E ruru tatou no te arue ia Iehova
1. Eaha te manaˈo tumu o te tairururaa, e no te aha e au ai ia Iehova ta tatou arueraa?
1 E mea Manahope o Iehova, e mea paari roa ino, e mea parau-tia roa ino e o oia iho te aroha. Ei Atua Poiete, ei Tumu o te ora e ei Arii o te ao taatoa, e au ia ˈna anaˈe ta tatou haamoriraa. (Sal. 36:9; Apo. 4:11; 15:3, 4) E haapapu te tairururaa mataeinaa o teie matahiti “A faahanahana i te Atua” i ta tatou faaotiraa e arue ia ˈna ei Atua mau hoê roa.—Sal. 86:8-10.
2, 3. E nafea te faaineine-maitai-raa e tauturu ai ia tatou ia faufaa-roa-hia i te tairururaa?
2 Te faaineine-maitai-raa: Ia faufaa-roa-hia tatou i te amuraa maa pae varua ta Iehova i faanaho, e mea faufaa roa ia faaineine maitai tatou ia tatou. (Eph. 5:15, 16) Ua afaro anei te parau o te nohoraa, te faurao e te mahana faafaaearaa (ohipa aore ra haapiiraa)? Eiaha e tiai i te taime hopea. Ia faataere outou i te ani i te hoê mahana faafaaearaa, e nehenehe outou e mairi hoê tuhaa o teie tairururaa oaoa. E mea titauhia hoi ia tae tatou i te mau rururaa atoa.
3 Ei fa na outou, a tae oioi atu i te vahi tairururaa i te mau mahana atoa. E nehenehe ïa outou e parahi i nia i to outou parahiraa hou te himene matamua e e faaroo i te haapiiraa e vauvauhia mai. E matara te mau opani i te hora 8 i te poipoi i te mau mahana atoa. A faataa noa i te mau parahiraa no te mau melo o to outou utuafare aore ra no te feia ta outou i faahoro mai.
4. No te aha e anihia ˈi ia afai mai te taatoaraa i ta ratou maa no te avatea i te tairururaa?
4 Te anihia ˈtu nei ia afai mai outou paatoa i ta outou maa, ia faarue maori i te vahi tairururaa i te taime faafaaearaa i te hora 12 no te haere e hoo mai i te maa. Ia paturu mai outou i roto i teie tuhaa, e tupu ïa te hau e e nehenehe outou e paraparau maoro atu â e to outou mau hoa Kerisetiano. (Sal. 133:1-3) A haamanaˈo e eita te mau farii hiˈo e te ava e fariihia i te vahi tairururaa.
5. E nafea tatou e haamata ˈi i te faaineine i to tatou aau no te tairururaa?
5 E faaroo e e haapii anaˈe: Ua pure o Ezera no te faaineine i to ˈna aau ia farii i te parau a te Atua. (Eze. 7:10) Ua imi to ˈna aau i te mau haapiiraa a Iehova. (Mas. 2:2) Hou atoa tatou e faarue ai i to tatou fare, e nehenehe tatou e faaineine i to tatou aau no te tairururaa ma te feruriruri i te manaˈo tumu e ma te paraparau atu e to tatou utuafare.
6. Eaha te tauturu ia tatou ia haapao maite i te porotarama? (A hiˈo i te tumu parau tarenihia.)
6 I roto i te hoê fare rahi, e nevaneva ohie noa tatou no te mau mea e tupu ra e ati aˈe ia tatou, e ore atu ai tatou e faaroo i te taeae orero. Ia tupu te reira, e ere ïa tatou i te mau manaˈo faufaa. E tauturu mai te mau manaˈo o te tumu parau tarenihia ia haapao maite atu â tatou i te porotarama.
7, 8. E nafea tatou e tâuˈa ˈi ia vetahi ê?
7 E tâuˈa anaˈe ia vetahi ê: E nehenehe e faaohipa i te pata hohoˈa aore ra te taviri hohoˈa mai te peu e eita tatou e haapeapea ia vetahi ê ma te faaea noa i nia i to tatou parahiraa. A faatano i te vini e te bipeur ia ore vetahi ê e haapeapeahia. Eiaha e tamau i ta outou iho mau matini i nia i te faanahoraa uira e te faanahoraa haapurororaa parau.
8 Te tiai ru nei tatou i te taime e ruru ai tatou no te arue ia Iehova. E faaoti maite anaˈe i te faahanahana ia ˈna ma te haere i te mau rururaa atoa, ma te faaroo maitai e ma te faaohipa i ta tatou e haapii mai.—Deut. 31:12.
[Tumu parau tarenihia i te api 3]
E nafea ia faaroo i te mau tairururaa
▪ A feruri i te upoo parau o te mau oreroraa parau
▪ A imi i te mau irava bibilia
▪ A rave i te mau tapaopaoraa poto
▪ A tapao i te mau manaˈo e faaohipa
▪ A hiˈo faahou i ta outou i haapii