Te hoê tauturu i horoahia i te taime au
1 I to te aposetolo Petero taaraa i te hinaaro o to ˈna mau hoa i te faaitoitoraa, ua turai to ˈna anaanatae no ratou ia horoa i te mau haamanaˈoraa e te mau faaitoitoraa î i te here. (Pet. 2, 1:12, 13; 3:1) Ua faaue o ˈna i ‘te feia i noaa ia ratou te faaroo’ ia tamau i te faarahi i te mau huru maitatai faahiahia i te pae varua ia ore ia “toaruaru e te hotu ore i te ite i to tatou Fatu ia Iesu Mesia ra.” (Pet. 2, 1:1, 5-8) Ua hinaaro o ˈna e tauturu ia ratou ia haapapu i to ratou parauraahia e te maitiraahia e Iehova, ia ‘roohia mai ratou e ana ma te hau, ma te porao ore e te hapa ore.’ (Pet. 2, 1:10, 11; 3:14) Ia au i te rahiraa, ua tae mai teie faaitoitoraa i te taime au.
2 I teie mahana, hoê â ta te mau tiaau Kerisetiano tapitapi. I teie “mau taime ati rahi faaruru atâ,” te manaˈonaˈo nei ratou i te mau tavini a Iehova, mea rahi o te titauhia ia faaruru i te mau tupuraa fifi. (Tim. 2, 3:1, MN) Ia roohia ratou i te fifi i te pae faanavairaa faufaa, i te pae o te utuafare aore ra to ratou iho, e farii te tahi pae i teie manaˈo o Davida: “Ua haaatihia hoi au e te ino e rave rahi; ua roohia vau i ta ˈu nei mau hara, e eita e tia ia nânâ noa ˈtu i nia ra; e rahi te reira i te io rouru i to ˈu nei upoo; e teie nei, ua taiâ tau aau i roto ia ˈu nei.” (Sal. 40:12) E nehenehe teie mau fifi e riro ei faateimaharaa e ore atu ai tera mau Kerisetiano e haapao i te mau ohipa pae varua faufaa roa e e ore ai e ohipa faahou i roto i te taviniraa. Noa ˈtu râ to ratou mau fifi, ‘aore i moe ia ratou te parau a Iehova.’ (Sal. 119:176) Teie te taime no te horoa i te tauturu e titauhia.—Isa. 32:1, 2.
3 No te pahono i taua hinaaro ra, aita i maoro aˈenei, ua faaitoitohia te mau matahiapo ia tutava taa ê i te tauturu i te feia aita e poro faahou ra. Te tupu nei taua ohipa ra e e tamau i te avae Mati. Te anihia ra i te mau tiaau no te haapiiraa buka ia farerei i te feia aita e poro faahou ra no te pûpû atu i te turu i te pae varua ia ratou ia tavini faahou ratou i roto i te amuiraa. Mai te peu e e titauhia, e faaotihia e faatere i te hoê haapiiraa bibilia e o ratou. I te tahi taime, e anihia te tauturu a te tahi atu feia poro. Ia anihia ˈtu ia outou, e manuïa ta outou mau tutavaraa mai te peu e e apitihia mai te hamani maitai e te maramaramaraa.
4 E oaoaraa no te taatoaraa te iteraa i te hoê melo o te amuiraa ia ohipa faahou. (Luka 15:6) E riro mau â ta tatou mau tutavaraa e rave no te tauturu i te mau Kerisetiano tei faaea i te poro mai te hoê ‘parau ia parauhia i te taime mau ra.’—Mas. 25:11.