Pahonoraa i ta outou mau uiraa

◼ Eaha te mau vahi maitatai ia haere i te amuiraa i te tuhaa fenua i reira tatou e noho ai?

Na roto i te arai o te amuiraa, e fanaˈo tatou i te mau faaitoitoraa o te ‘faaaraara ia rahi te aroha e te mau ohipa maitatai ra.’ (Heb. 10:24, 25) Maoti te reira e haapii ai tatou i te parau mau e e aravihi ai tatou no te haapao i ta tatou ohipa faauehia e faariro i te taata ei pǐpǐ. (Mat. 28:19, 20) E haapuai-atoa-hia tatou no te faaoromai ma te taiva ore i te mau tamataraa e te vai ra te mau tiaau î i te aroha o te tauturu mai ia faaruru i te mau faateimaharaa e te mau ahoaho e rahi noa ˈtu ra. Papu maitai e e mea faufaa roa te amuiraa e ora ˈtu ai tatou i te pae varua. Teie râ, te vai ra anei te mau vahi maitatai ia haere i te amuiraa i te tuhaa fenua i reira tatou e noho ai?

Mea taa ê te huru tupuraa o te taata taitahi, e e nehenehe e rave rau tuhaa mai te ohipa, te hoê hoa faaipoipo e ere i te Ite aore ra te parau o te faurao e ohipa i nia i ta tatou faaotiraa no nia i te reira. Tera râ, te vai ra te mau vahi maitatai, i te pae varua e i te tahi atu pae, ia haere i te amuiraa e haapao ra i te tuhaa fenua ta tatou e faaea ra. I roto i te hoê tupuraa ru, e mea ohie aˈe ïa no te mau matahiapo ia farerei i te feia poro. I mutaa ihora, ua haafaufaa te mau tumu parau Pahonoraa i ta outou mau uiraa i te tahi atu mau vahi maitatai.—Me 1991, Atete 1976 e Me 1967 na roto i te reo Farani.

E pinepine, mea ohie aˈe ia haere i te mau putuputuraa fatata i ǒ tatou, e nehenehe hoi e tae oioi no te paraparau e te tahi atu, no te haapao i te mau ohipa faufaa rau e no te apiti i roto i te himene e te pure haamataraa. Mai te peu e i te vahi ta tatou e faaea ra, te vai ra te tahi mau taata no anaanatae noa maira i te parau mau, e mea ohie aˈe ia farerei ia ratou, ia haapii i te Bibilia e o ratou e ia faahaere ia ratou i te mau putuputuraa fatata aˈe.

Te tiaturi papu nei matou e e feruri te mau upoo utuafare i tera tumu parau i roto i te pure e i te mau tuhaa atoa no te faaoti i te mea au aˈe no te vai-maitai-raa i te pae varua e i te pae tino o to ratou utuafare.—Tim. 1, 5:8.